Zabuli 148 - Luganuzi Luswanu Kuli Wanhu Wose 2002

Yinze yose yimulumbo Mulungu

¹ Mumulumbe Muwaha Mulungu! Ale, mumulumbe Muwaha Mulungu, wulawa ku wulanga, mumulumbe anye mono mwikaye ku canyha.

² Mumulumbe nanye nyo wamalayika wakwe, mumulumbe nanye nyo lipuga lyose lya ku wulanga.

³ Mumulumbe nanye nyo mwezi ne lizuwa, Mumulumbe nanye nyo zinyelezi, zose zono zikung'alala.

⁴ Mumulumbe nanye nyo wulanga ku canyha, sunga ne malenga gono gali ku canyha yo wulanga.

⁵ Litagwa lyo Muwaha Mulungu linojeye lilumbwe muno, hambi mwene nha yo yalajiliza na vyose vikawumbwa.

⁶ Nayo yakavimya hanhu hayo sunga cibitilila, navyo hamba si vyosuma kumubedegala yaye.

⁷ Mumulumbe Muwaha Mulungu wulawa kono'nze, nanye nyo visolo vye lilenga, hamonga ne mazoka gayo.

⁸ Mumulumbe nanye nyo moto, ne mvula ye mabwe hamonga ne seluji, hamonga nagwe go mbeho yo mukukunzo, mono wibate wulajilize wakwe.

⁹ Mumulumbe nanye nyo matunda ne vigongo, sunga nanye nyo mibici, ye mikalo hamonga ne mbago yose!

¹⁰ Mumulumbe nanye nyo vilimu vya mu mbago, sunga nanye nyo mitugo yose, sunga nanye nyo viwumbwa vyono vitambalaga hasi, hamonga ne zindeje zose!

¹¹ Mumulumbe nanye nyo watemi, we'nze hamonga ne wanhu wose walongola, ne walamuzi wose we'nze.

¹² Mumulumbe nanye nyo wazelelo ne wahinza, nyo wakombi hamonga ne wana wadodo!

¹³ Mulilumbe litagwa lyo Muwaha Mulungu, anye nyo wanhu wose hambi litagwa lyakwe, nha lilawiliciye, no lukumyo lwakwe, lucizize kono'nze na ku wulanga.

¹⁴ Yawapela vilungo i wanhu wakwe, wose ho wamulumbe mwene, ne wana wa Isilayeli wono yawendile. Mumulumbe Muwaha Mulungu!