Zabuli 146 - Luganuzi Luswanu Kuli Wanhu Wose 2002

Lukumyo kuli Mulungu Mukombozi

¹ Mumulumbe Muwaha Mulungu! Gwe go nhumbula yangu, wumulumbe Muwaha Mulungu!

² Nomulumba Muwaha Mulungu, mu vilo vyo wikale wangu wose, nomwimbila Mulungu wangu, vilo vyose vyono nghali mumi.

³ Mulece kuwetumbila wawaha, hambi muli wanhu nha musina mhonelo.

⁴ Hambi nha kolo wakufwa, wakugawuyila manghundi, kanyhi na mwizuwa lilyo mahweso gawo gakwajilila.

⁵ Holeka yo mumoti mono yakumunoza Mulungu wa Yakobo, kuwa yo mutazi wakwe, no witumbilo wakwe, wukuwa wuli muli Muwaha Mulungu wakwe,

⁶ mono yawumba wulanga ne yinze, ne lilenga, sunga na vyose vyono vili mumo. Mwene kawukamisaga wihuwizo wakwe cibitilila.

⁷ Mono yakuwanozeza ling'ani wono wakugazwa, kanyhi yakuwapela ndigwa wono wali nzala, Muwaha Mulungu kawawopolelaga, wono wadindiywe mu jela,

⁸ kanyhi Muwaha Mulungu, kawanuguzaga meso wono wabofuye. Muwaha Mulungu kawenulaga wono wagwiye, Muwaha Mulungu yawendile wono wali ling'ani.

⁹ Muwaha Mulungu kawadimaga wajenzi, wono wekaye mu yisi yetu, kanyhi kawatazaga wacekulu wafwile hamonga, ne wana wono wasina walezi, ninga nzila ye wabi, mwene kayibidyangaga.

¹⁰ Muwaha Mulungu yatemile cibitilila, Mulungu wako 'gwe go Sayuni, yo mutemi muli zindelo zose. Mumulumbe Muwaha Mulungu!