Zabuli 145 - Luganuzi Luswanu Kuli Wanhu Wose 2002

Lwimbo lo lukumyo

¹ Gwe go Mulungu, ane nozanza zo wuwaha wako, go mutemi wangu, nolikumya litagwa lyako, nhondo zose cibitilila.

² Nowa kukulumba nhondo zose, nolikumya litagwa lyako nhondo zose cibitilila.

³ Muwaha Mulungu yo muwaha mono, yanojeye kukumywa muno, no wuwaha wakwe wucizize wumanye wose,

⁴ Ne zindelo na ndelo, zojendelela kukumya ze metumo gako, gono wetuma, no kwanza ze metumo gako mawaha.

⁵ Zojendelela kuzilonga, zo wuwaha wo lukumyo lwako, nane nojendelela kuzihwesa, ze metumo gako go wizine.

⁶ Kanyhi wanhu wozilonga, ze metumo gako go wogofye, nane nokwanza zo wuwaha wako.

⁷ Wokwanza zo lukumyo lo winji wo wuswanu wako, hamonga no kwimba kuli zo wiling'ano wako.

⁸ Muwaha Mulungu yo munya nheto no lusungu, mwene si kakolwaga ne likuwo mbela, yena lusungu luwaha.

⁹ Muwaha Mulungu, yo muswanu kuli wanhu wose, kanyhi yali lusungu kuli viwumbwa vyakwe vyose.

¹⁰ Gwe go Muwaha Mulungu, viwumbwa vyako vyose vyokulumba, ne wanhu wako wehuwilwa nawo wokukumya.

¹¹ Kanyhi wokwanza, zo lukumyo lo wutemi wako, no kwanza ze vilungo vyako.

¹² Ho wasume kuwamanyiza wanhu, ze metumo gako mawaha, hamonga no lukumyo lo wutemi wako.

¹³ No wutemi wako, wo wutemi we cibitilila, no wulajilize wako, nha wikalaga cibitilila. U Muwaha Mulungu nha mwihuwilwa, mu wihuwizo wakwe, kanyhi yali lusungu mu nyituma yakwe.

¹⁴ Muwaha Mulungu kawatazaga wose, wono wali mu wugaye, kanyhi kawenulaga wose wono wagwiye.

¹⁵ Viwumbwa vyose vikulanjiliye gwegwe du, nagwe kuvipelelaga ndigwa mu vipango vyayo.

¹⁶ Nagwe kuvipelaga vyose vyono vikwiliye, mu nghango ye visakwa vyayo.

¹⁷ Muwaha Mulungu, yo yali ling'ani mu zinzila zakwe zose, kanyhi mwene muswanu muli milimo yakwe yose.

¹⁸ Muwaha Mulungu yali behi, na wose wono wakumucemeleza, kuli wose wono wakumucemeleza, kwe nhumbula yo winenenyhezi.

¹⁹ Muwaha Mulungu, kawapelaga visakwa vyawo wose wono wamogopile. Kacihulikaga cililo cawo no kuwaponya.

²⁰ Muwaha Mulungu kawadimaga wose wono wamwendile, ninga i wabi, kowongomeza wose.

²¹ Nokwanza zo lukumyo lo Muwaha Mulungu, ne viwumbwa vyose, vilikumye litagwa lyakwe lyono lyelile, ku wulawa lulu, sunga cibitilila.