Zabuli 144 - Luganuzi Luswanu Kuli Wanhu Wose 2002

Mutemi yakumulumba Mulungu so wusume

¹ Muwaha Mulungu yalumbwe, mono yo mukamisi wangu, kanyhi yo mhonelo yangu, mono kanyijizaga'ne zo wihomi, kanyhi kambikanizaga kuli zo wulugu.

² Mwene yo mudimi wangu mwihuwilwa, kanyhi yo kanyhitilaga muli zose, kanyhi yo muponyi wangu. Mwene yo mudimi wangu mono nimwitumbiye, Mwene kagasumilizaga makungugo, no kugawika hasi yangu.

³ Gwe go Muwaha Mulungu, alo munhu co cici sunga wumukumbucile? Hamba munhu co cici, sunga wuwe kwikalaga wukumwihwesa?

⁴ Hambi munhu nha yehwanile mbeho, yono yikuputa du, sunga ne vilo vyakwe, vihwanile mubeho wono wupulutaga du.

⁵ Gwe go Muwaha Mulungu, wudemule wulanga wutime! Wugapamize matunda, nago golavya lyosi!

⁶ Wugumile limuli liweyagaze, lete zisonga zako, wuwahangavye watize!

⁷ Wuze sunga ho hasi ku wulawa ku wulanga, wumbuse amuno mu malenga menji, wumhonye mu vilungo vye wajenzi,

⁸ wono walongaga zo wulambi nhondo zose, kanyhi wendile kuhomelela, no kwilahiza kuli zo wulambi.

⁹ Gwe go Mulungu, ane nokwimbila lwimbo lupya, kanyhi nokutowela ndonondo nghwimbile lukumyo.

¹⁰ Agwe mono kuwapelaga watemi wusume, no kumuponya Dawudi mwitumami wako!

¹¹ Wumhonye kuli walugu wangu wawulaji, wumhonye mu vilungo vye wajenzi, wono wekalaga wakulonga zo wulambi nhondo zose, kanyhi wendile kuhomelela no kwilahiza zo wulambi.

¹² Ne wana wetu we cilume nawo, waweze nhe vilimwa vyono vikuwiluka viswanu, mu wuzelelo wawo, ne wana wetu we cicekulu nawo, waweze nhe masumbili ga mu zi nhuzi, gono makakate viswanu muno, mwi'kulu lyo mutemi.

¹³ Ne madongha getu nago, gamemywe nhwanga ye mawala gose, ne zingholo zetu nazo mu migunda yetu, zilele kali maelufu na maelufu.

¹⁴ Nazo zing'ombe zetu, zeze zina miwili miswanu. Kanyhi zili vilungo, ho zilele viswanu, kanyhi halece kuwa na cililo, co wugazwe mu wikalo wetu.

¹⁵ Limotile likungugo lyono, lyakondya kupegwa zizo! Wamotile iwanhu wono u Muwaha Mulungu, yo Mulungu wawo!