Zabuli 143 - Luganuzi Luswanu Kuli Wanhu Wose 2002

Kulomba wutazi

¹ Gwe go Muwaha Mulungu, wuhulice wulombe wangu! Ku soko ye ling'ani yako, holeka wuhulice wulombe wangu! Kanyhi wumhitule ku soko yo wihuwilwa wako.

² Kanyhi wulece kuning'aniza ane no mwitumami wako, hambi hali'gwe nha hasina mono yali ling'ani, hamba yumonga bwete.

³ Hambi mulugu nha kanhyatilila, kasumila lukulu. Kawa kunyinjiza hanhu ha citi, niwa nhe wanhu wono wafwa katali.

⁴ Holeka na mu nhumbula nakatala, sunga nalu fwiye yitenene ku soko yo woga.

⁵ Nalu nghukumbucila ze vilo vyono vyapuluta, nghwihwesa muli zose zono wazinoza, nghwihwesa ze metumo gako gose.

⁶ Nane nghwaliye maganza gangu nghulomba, nghukaluciye muno, nehwana yisi nghavu yono yisina malenga.

⁷ Gwe go Muwaha Mulungu wumhitule mbela, hambi nha natimba muno mu nhumbula yangu. Wulece kuwa kutali nane, ho ndece kwihwana na awalya, wono wakubita ku yisi ye wafu.

⁸ Wumanyize zo lusungu lwako nhondo zose, hakali mitondo, hambi ane nha nghwitumbiye gwegwe du. Wuhulice wulombe wangu, wundajile ne nzila yono noyityatya,

⁹ Gwe go Muwaha Mulungu, ane nghutiziza kuli'gwe, wumhonye kuli walugu wangu.

¹⁰ Wunyijize ho sume kwituma zo wuhile wako, hambi nha yo gwegwe go Mulungu wangu! Na so wuswanu wako, wunhonje mu nzila yono yigolocile.

¹¹ Gwe go Muwaha Mulungu, wunghamise ho niwe mholile nha vyono wehuwiza, ale wumhonye mu wugaye ku soko yo wuswanu wako.

¹² Na ku soko yo lusungu lwako kuli'ne, wuwawulagaje walugu wangu, wuwongomeze wose wono wakunhendela zimbi, hambi ne nha nili mwitumami wako.