Zabuli 141 - Luganuzi Luswanu Kuli Wanhu Wose 2002

Wulombe we cinya Mihe

¹ Gwe go Muwaha Mulungu, nghukucemeleza wuze wumhonye mbela! Wuhulicize lizi lyangu kolo nghukucemeleza!

² No wulombe wangu wukuficile nha wuvumba, sunga no winule we mawoko gangu, wuweze nhe likumbiko lya mwi'daha lye cinya mihe.

³ Gwe go Muwaha Mulungu wuwudime lulimi lwangu, wuwice mulindilizi ha mulomo wangu.

⁴ Wunyhitile kuli zo wituma zimbi, ndece kwilunza no wajilile wa wetuma zo wavu, kanyhi ndecele lukulu kuhanga nawo, mu zindigwa za mu zi sikukuu zawo.

⁵ Na ku soko ye cambuzi cangu, nokwenda munhu u muswanu, yafundile mu nzila yo kunhowa ninga, si nokwendela lukulu i wabi wanghumye, hambi 'ne nha nikalaga nghulomba, ku soko ye metumo gawo mabi.

⁶ Ninga i wawaha wawo, kolo wapondwapondwa mwi'talawe baho, langa ho womanyila, vyono wulonje wangu wali wa mbeka.

⁷ Nha vyono vinha vidumulwa-dumulwa vye zingwagu, ne mafupa gawo gowa geyagaye, ha mulango we citenjelo.

⁸ Ninga'ne nghwihuwiye gwegwe du, go Muwaha Mulungu, agwe yo gwegwe go wutizizo wangu, holeka wulece kundeka nili wene.

⁹ Nghukunena wunyhitile, kuli mitego yono wanhejile, wumhonye kuli zi nonga zawo, zono wakunhega wawo i wanhu wabi.

¹⁰ I wabi wegwize weneco mu mitego yawo, lono ane nghukola mholile. Kulomba wutazi.