Zabuli 140 - Luganuzi Luswanu Kuli Wanhu Wose 2002

Kulomba wudimi wo Mulungu

¹ Gwe go Muwaha Mulungu, wumhonye kuli wanhu wabi, wunyhitile kuli wanhu wawulaji.

² Hambi wanhu we liwala lilyo, nha wehwesaga zimbi du nhondo zose, kanyhi wekalaga wali ciwuma-wuma du nhondo zose.

³ Wena nimi nghali, zihwanile nha sumu ye zinzoka. Ne zinghani zawo zihwanile, ne sumu ye lizoka li nyamwilu.

⁴ Gwe go Muwaha Mulungu, wunyhitile kuli vilungo vyo mubi, kanyhi wunyhitile sunga na kuli wawulaji, wono wena wuhile wo kunyajiliza.

⁵ I wedunhumuzi wanhega ne mitego yawo, watandaze milejehe nha nyavu, kanyhi wahundice mitego yawo, mu nzila ho wangwize.

⁶ Nane nghamulonjela Muwaha Mulungu nghatya, “Agwe yo gwegwe go Mulungu wangu du.” Holeka wuhulicize lizi lyo wulombe wangu, 'gwe go Muwaha Mulungu wunhaze.

⁷ Gwe go Muwaha Mulungu, go vilungo vye mhonelo yangu, kunyhitila mu vilo vyo wulugu.

⁸ Gwe go Muwaha Mulungu, wulece kuwapela i wabi visakwa vyawo, kanyhi wulece kuwamotya mu wuhile wawo wubi,

⁹ Wulece kuwapela wusume walugu wangu, ne zimbali zawo ziwawuyile weneco!

¹⁰ Ne makala go moto gawagwile, wagwilizwe mu makombo, walece kulawila kanyhi.

¹¹ I wabalalizi si wosuma kwikala mono'nze, no wubi wuwagane i wawulaji, no kuwongomeza lwa kamonga!

¹² Nane manyiye lukulu, vyono Muwaha Mulungu komudima musocele, kanyhi koyitetela ne ling'ani yo muciwa.

¹³ Mbeka wono wali ling'ani wokulumba muno, kanyhi wokwikalana na gwegwe.