Zabuli 135 - Luganuzi Luswanu Kuli Wanhu Wose 2002

Lwimbo lo lukumyo

¹ Muwaha Mulungu yalumbwe! Likumyenyi litagwa lyakwe, anye nyo wetumami wo Muwaha Mulungu,

² anye mono mwimaga mu Nyumba yo Muwaha Mulungu, mu Nyumba yo Mulungu wetu.

³ Mukumyenyi Muwaha Mulungu, hambi nha muswanu, mulimbile litagwa lyakwe zo lukumyo, hambi nha vyo yinojeye.

⁴ Muwaha Mulungu yakehagulila Yakobo, yawe munhu wakwe, ne wanhu wa Isilayeli, wawe sawo yakwe mweneco.

⁵ Manyiye lukulu vyono, Muwaha Mulungu yo muwaha yacizize, u Muwaha Mulungu wetu, yo Yalawiliciye mu milungu yose.

⁶ Mwene Muwaha Mulungu wetu, kanozaga nha vyono yendile mweneco, ku wulanga, hamba mono'nze, hamba mwi'lenga, sunga na mu visolo vyayo.

⁷ Mwene kagaletaga mavunde, ku wulawa ku mhelo ye yinze, kayiletaga mvula mbaha mu nzila ye mamuli, kanyhi kayiletaga mbeho mbaha muno, ku wulawa ha wikalo wayo.

⁸ Yawawulaga i wana walongozi kulelwa wose, ku Misili, i wana we wanhu, sunga ne mana ge zinimu nhavivyo.

⁹ Nayo yakanoza mapoto, ne vitanjilo kuli'gwe go Misili, kuli Falawo hamonga ne wetumami wakwe wose.

¹⁰ Yakagongomeza makungugo menji, yakawawulaga sunga, ne watemi, wono wali wali vilungo,

¹¹ Sihoni, mutemi we Waamoli, na Ogu mutemi wa Bashani, sunga ne watemi wose wa mu Kanani.

¹² Yasola zisi zawo, yakawapela wanhu wakwe, yawapela Isilayeli wuwe wuhazi wawo.

¹³ Gwe go Muwaha Mulungu, litagwa lyako lyowa kukumbucilwa cibitilila, nagwe kokumbucilwa ne wanhu we zindelo zose.

¹⁴ Hambi Muwaha Mulungu, nha kowatetela wanhu wakwe, kanyhi kowa no lusungu kuli wetumami wakwe.

¹⁵ I milungu ye makungugo, nha milungu ya fweza na zahabu, minozwe ne miwoko ye wanhu.

¹⁶ Yina milomo, ninga hamba si yikulonga yaye, yina ne meso, ninga hamba si yikuwona ng'o.

¹⁷ Ne makutu yina nago, ninga hamba si yikuhulika bwete, hamba kwehela kose, si yehelaga yaye.

¹⁸ Holeka wose wono wayinoza, na wose wono wakuyitumbila, wokwihwana ne milungu yiyo!

¹⁹ Nye nyo wanhu wa Isilayeli, mukumyenyi Muwaha Mulungu! Nanye mo wakohani, mo lulelo lwa Haluni, mukumyenyi Muwaha Mulungu!

²⁰ Nanye mo Walawi, mukumyenyi Muwaha Mulungu! Sunga nanye mono mumogopile, Muwaha Mulungu, mukumyenyi!

²¹ Muwaha Mulungu yakumywe mu Sayuni, yakumywe sunga na mu wikalo wakwe ku Yelusalemi. Muwaha Mulungu yalumbwe!