Zabuli 132 - Luganuzi Luswanu Kuli Wanhu Wose 2002

Lukumyo lwe Nyumba yo Mulungu

¹ Gwe go Muwaha Mulungu, mukumbucile Dawudi, wukumbucile magazo gose gono yagatuga.

² Kanyhi 'gwe go Muwaha Mulungu, wukumbucile sunga no wihuwizo wono yakwihuwiza, no wilahize wono yakwilahiziza, agwe go Mudaha Vyose, go Mulungu wa Yakobo,

³ nha vyono yatya si kokwinjila mu kaya, hamba kugona mu citanda cakwe,

⁴ vyono si kosaka yagone nhongo, hamba kusinzila,

⁵ sunga kolo yakondya kukuzenjela, wikalo wako agwe go Mudaha Vyose, go Muwaha Mulungu wa Yakobo!

⁶ Nase cazihulika kuko ku Efulata, ze Lisanduku lye Cilagane, cikalyagana mu mawimbi ga ku Yeyalimu.

⁷ “Heya, alenyi ku kaya yo Mulungu, cikahembe he 'goda lyakwe lyo wutemi!”

⁸ Wuze ku Nyumba yako ne Lisanduku lye Cilagane, 'gwe go Muwaha Mulungu, ciwe co citanjilo ce vilungo vyako, nagwe wukekale kuko cibitilila.

⁹ Ne wakohani wako waweze ling'ani nhondo zose, ne wehuwilwa wako, nawo, watowe nyhenze zo wusangalale!

¹⁰ Na ku soko ya Dawudi mwitumami wako, go Muwaha Mulungu, holeka wulece kumulema yuyo mutemi wako, mono wamuhagula.

¹¹ Hambi nha yo gwegwe mono wamwihuwiza Dawudi, wihuwizo wono wukangaye, wono si kowubena yaye, lono watya, “Nomutemya yumonga wa muli wanago yawe mutemi, nayo kotema agwe kolo wakondya kufwa.

¹² Na hono wanago wasume kwibata cilagane cangu du, hamonga no kukamisa malajilizo gangu, gono nawalajiliza, ale ne wana wawo nawo, nhavivilya wojendelela kuwuhala wutemi wako, vilo vyose.”

¹³ Muwaha Mulungu yalihagula likaya lya Sayuni, yakasaka wuwe wo wikalo wakwe, yakatya,

¹⁴ “Ahano langa, ho wowa wo wikalo wangu, cibitilila, ho hanhu hono notema.

¹⁵ Nane nolipela likaya lya Sayuni, visakwa vyalyo vyose, kanyhi nowegutya zindigwa iwaciwa wayo.

¹⁶ Ne wakohani wayo nawo, nowamotya mu milimo yawo, ne wehuwilwa wayo nawo, wotowa nyhenze zo wusangalale.

¹⁷ Na mumo namo, mo nomunozeza yumonga, wa mu wana wa Dawudi, yawe mutemi mu waha, kanyhi nowusikamya wutemi, wo mutemi wangu muhagulwa.

¹⁸ Nane nowakoza cevu walugu wakwe, ninga wutemi wakwe womoteswa muno muno.”