Zabuli 128 - Luganuzi Luswanu Kuli Wanhu Wose 2002

Cihumbilizwa kuli mono yamogopilo Muwaha Mulungu

¹ Wamoti wose wono wamogopilo Muwaha Mulungu, wono wakugatyatya malajilizo gakwe.

² I milimo yako, yo yokutujila ne visakwa vyako, kanyhi kowona nyemo no wumoteswe,

³ No mugolece wako, kowa yehwanile mu zabibu, wono wukulela muno, mu kaya yako, ne wanago wowa wehwanile vinhambi, vyo mu zabibu vyono vikutula, woyipilima meza yako yo wulilo.

⁴ Heya, nhavivyo vyo komoteswa munhu, mono yamogopilo Muwaha Mulungu.

⁵ U Muwaha Mulungu, yakulugute ku wulawa ku Sayuni! Nagwe wuwuwone wumoteswe wa Yelusalemi, mu vilo vyose vyo wikale wako.

⁶ Heya, wikale sunga wuwawone wana we wanago! Mulamu weze kuli Isilayeli!