Zabuli 12 - Luganuzi Luswanu Kuli Wanhu Wose 2002

Kulomba wutazi

(Kuli mwimbizi: Nho wimbe wa Sheminithi. Zabuli ya Dawudi)

¹ Ale, wucitaze, 'gwe go Muwaha Mulungu! Hambi wono wakogopile gwegwe nha wamalika, i wehuwilwa wose nha wakondya kwajililila lukulu.

² Wose welonjelaga nghani za wulambi du, ne zinghani zawo zose za wiyendezi du kanyhi za wukoci.

³ Gwe Muwaha, wuyidindaje milomo yiyo yo wulambi, wuzinyamazye zinimi zizo zono zilongaga zo widunhumuzi.

⁴ Wakutya, “Kwe milomo yetu, cina wusume, nase colonga nha vyono cendile nani 'mbi mono kocisuma?”

⁵ Ninga u Muwaha Mulungu yakutya nhavi, “Ku soko vyono wasocele wakwiwonelwa, ne waciwa wakung'ung'ulika, alu neza kuza, nane nowapela wuwo mulamu wono wakuwulanjilila.”

⁶ Wihuwizo wo Muwaha Mulungu wa mbeka, kanyhi welile, winha fweza yono yilenguywe mu moto, winha fweza yono yilenguywe nghanghulo mupunghati.

⁷ Gwe go Muwaha Mulungu wucikamisaje, no kucicitila kuli lulelo lulu.

⁸ I wabi wakupilima hanhu hose, no wajilile wukulumbizwa muli wanhu.