Zabuli 118 - Luganuzi Luswanu Kuli Wanhu Wose 2002

Lilombo lyo wulumbe so wusume

¹ Mulumbenyi Muwaha Mulungu, hambi nha muswanu. No lusungu lwakwe nha lwikalaga cibitilila.

² Wanhu wa Isilayeli walonje watye, “Lusungu lwakwe lwikalaga cibitilila.”

³ Nawo Wakohani wo Mulungu walonje watye, “Lusungu lwakwe lwikalaga cibitilila.”

⁴ Na wose wono wamogopilo Muwaha Mulungu, nawo walonje watye, “Lusungu lwakwe lwikalaga cibitilila.”

⁵ Nane mu wugaye wangu, nghamulilila Muwaha Mulungu, nayo yakahulika, yakamhonya.

⁶ Muwaha Mulungu, yali hamonga nane, holeka nane si nghogopa cinji co cose, hambi munhu konoza cici?

⁷ Muwaha Mulungu yali hamonga nane, nayo yo yakunhaza, holeka nowawona walugu wangu wakusumwa.

⁸ Yili ciba kumwitumbila Muwaha Mulungu, sinha kumwitumbila munhu.

⁹ Yili ciba kumwitumbila Muwaha Mulungu, sinha kuwetumbila walongola we yinze yiyi.

¹⁰ Walugu wenji wali wamhilime, ninga nghawapondanjiziza wose, mwi'tagwa lyo Muwaha Mulungu.

¹¹ Wali wamhilime mbavu zose, ninga nane nghawapondanjiza wose, kwe vilungo vyo Muwaha Mulungu.

¹² Wakahungucila ko winji kotya nzuci, ninga wakatakamila wose, nhe cititika mu moto, nane nghawapondanjiza wose, kwe vilungo vyo Muwaha Mulungu.

¹³ Wakanzumhila, sunga nghawa nili behi, no kusumwa nawo, ninga Muwaha Mulungu yakanhaza.

¹⁴ Mbeka Muwaha Mulungu, yo kamhelaga vilungo no wusume, yo mweneco du mono yamhonizye.

¹⁵ Ale, hulicizenyi ta mazi, ge nyemo no wusume gono gakulawa, mu mahema ge wanhu wo Mulungu, gakutya, “Vilungo vyo Muwaha Mulungu, vyo vitumile zizi!

¹⁶ Vilungo vyo Muwaha Mulungu, vyo viletile wusume wo wulugu, Vilungo vyo Muwaha Mulungu yali wene, vyo vitumile zizi!”

¹⁷ Ane si nofwa yaye, langa nowumipa, nane nozanza ze metumo mawaha, go Muwaha Mulungu.

¹⁸ Muwaha Mulungu kandipiciza muno muno, ninga si yandeceleze nifwe.

¹⁹ Ndigulilenyi milango ye Nyumba yo Mulungu, nane nokwinjila, nimulumbe Muwaha Mulungu!

²⁰ Awu wo mulango wo Muwaha Mulungu, wono wadahile kuwukolela we ling'ani.

²¹ Gwe go Muwaha Mulungu, nghukulumba vyono wuhulicize, hambi nha yo gwegwe du mono wumheye wusume.

²² Libwe lyono walilema wazenji, lyo lyeza yibwe liwaha lyo musinji.

²³ Nayo Muwaha Mulungu, yo yetumile nghani yiyino, nayo yo nghani yo wizine muno muno kuli'se.

²⁴ Ali lyo lizuwa lyo wusume wo Muwaha Mulungu, holeka cisecelele kanyhi cisangalale.

²⁵ Wuciponye, 'gwe go Muwaha Mulungu wuciponye! Gwe go Muwaha Mulungu cikukunena wucipele wumoteswe!

²⁶ Yalugutwe yuyo mono yakuziza, mwi'tagwa lyo Muwaha Mulungu! Nase cikumulombelenyi wumoteswe, ku wulawa mu Nyumba yo Muwaha Mulungu.

²⁷ Muwaha Mulungu, yo Mulungu du yali wene, nayo kacimulicilaga mu wuswanu. Holeka ale mwibataje manhambi, mu miwoko yenyu, musangalale, mujendele hamonga sunga ko ku cikumbicilo.

²⁸ Agwe yo gwegwe Mulungu wangu, nane nghukulumba, kanyhi nokwanza zo wuwaha wako.

²⁹ Mulumbenyi Muwaha Mulungu, hambi nha muswanu, no lusungu lwakwe nha lwikalaga cibitilila.