Zabuli 116 - Luganuzi Luswanu Kuli Wanhu Wose 2002

Lilumbo lyo munhu ku soko yo wuponywa mwi'fwa

¹ Ane nimwendile Muwaha Mulungu, hambi nha kahulikaga, hambi nha kahuliciza cililo co wulombe wangu.

² Mwene nha kahulicizaga lono nghumulilila.

³ Zimbali ze lifwa zali zimhilime, no wogofywe we citenjelo wukanyibata, nghawa no wugazice hamonga no wukalale.

⁴ Holeka nghamulilila Muwaha Mulungu nghatya, “Gwe go Muwaha Mulungu, nghunena wumhonye!”

⁵ Muwaha Mulungu yo munghala wuswanu wose, no wihuwilwa, Mulungu wetu, yo Mulungu wo lusungu.

⁶ Muwaha Mulungu kawakamisaga, wono wasina wutazi, hambi nha lono nali nili mu mbali, mwene yamhonya.

⁷ Holeka go nhumbula yangu, wutule muli'ne, hambi Muwaha Mulungu nha kanhendela ziswanu.

⁸ Kamhonya mwi'fwa, kagapata ne mahozi gangu, yakawa kundima ho ndece kanyhi kugwa mu musutye.

⁹ Holeka nane lu, nowa kujenda hali Muwaha Mulungu, mu yisi ye wanhu womi.

¹⁰ Nghawa nihuwiye du, sunga lono nalongaga nghutya, “Alu langa ane, nhondo neza kwajilila.”

¹¹ Nhondo sunga nghawa kulonga ko woga nghutya, “Mbeka wanhu hamba si wehuwilwa yaye.”

¹² Alu nomugomolela ci cici Muwaha Mulungu, ku soko ye ziswanu zose zono yanhendeye?

¹³ Nomulavizya Muwaha Mulungu cilavywa ca divayi, nimulumbe ku soko ye mhonelo yono yamhonizye.

¹⁴ Nomufisiliziza Muwaha Mulungu vipingo vyangu, ha mwande ye likungugo lyakwe lyose.

¹⁵ Muwaha Mulungu kawukalalilaga muno muno, wufwe wa wono wali ling'ani,

¹⁶ Gwe go Muwaha Mulungu, ane nili mwitumami wako, nili mwitumami wako du nha vyono yenha yaya. Nagwe wukanoza nghawa mwelecele.

¹⁷ Holeka nane lu, nokulavizya likumbiko lyo wulumbe, kanyhi nowa nghogopile muno muno.

¹⁸ Nane nokufisiliziza zose, zono nehuwiza, go Muwaha Mulungu, ha mwande ye likungugo lyako lyose,

¹⁹ kuko ku Yelusalemi mu Nyumba yako. Muwaha Mulungu yalumbwe!