Zabuli 110 - Luganuzi Luswanu Kuli Wanhu Wose 2002

Muwaha Mulungu no mutemi wakwe muhagulwa

¹ Muwaha Mulungu yakamutya muwaha wangu mutemi, “Wikale ku muwoko wangu wo kulume, sunga kolo nawanoza i walugu wako, wawe cibawo co wusambo we migulu yako.”

² Hambi Muwaha Mulungu nha kotandaza, vilungo vyako wulawilila ku Sayuni, yakutya, “Ale wuwatemaje walugu wako!”

³ Nawo wanhu wako wokwilavya weneco, ko mutima muzelu, mwizuwa lyo kuwahoma no kuwasuma walugu wako. Nha vyono yinha buhe ya hakali mitondo, ale, nhavivyo ne wazelelo wako, nawo, vyo wolokuziza gwegwe, mu matunda gono gelile.

⁴ Muwaha Mulungu yelahiza, holeka hamba si kowukawaniziza, lukulu wuhile wakwe, “Agwe kowa wuli mukohani cibitilila, ku luto lo wukohani wa Melikizedeki.”

⁵ U Muwaha Mulungu yali lubavu lwako lo kulume, nayo kolo yakukolwa likuwo, kowapondanjiza watemi.

⁶ Kogaling'aniza makungugo, no kuwawulaga wanhu wenji muno, kowapondanjiza i walongola hanhu, hose mono'nze yose.

⁷ Na mu nzila, u mutemi kong'wa malenga, ga mu cikolongo, holeka kokwilumba so wusume.