Zabuli 11 - Luganuzi Luswanu Kuli Wanhu Wose 2002

Kumwitumbila Muwaha Mulungu

(Kuli mwimbizi: Zabuli ya Dawudi)

¹ U Muwaha Mulungu wo wutizizo wangu Alu anye mosuma nhawule kunyitya, “Ale wuguluce nha ndeje sunga ko kwi'tunda?

² Hambi wulanje ta i wabi vyono wakuwukunga wupinde, wakondya kutawika zisonga mu lukunzi lwo wupinde, ho wawagume i wanhu waswanu mu wutitu.

³ Alu hono musinji wuhodangwe, u munhu muswanu ho kotenda nhawule?”

⁴ U Muwaha Mulungu, yali mu Nyumba yakwe yono Yelile, ne ligoda lyo wutemi lyo Muwaha Mulungu, lili ku wulanga. Meso gakwe gakuwalanga wanhu wose, nayo yazimanyile zose zono wakwituma.

⁵ Muwaha Mulungu kawapimaga we ling'ani ne wabi, nayo kawasulaga muno muno i wanhu wakali.

⁶ Nayo kowalagaziza i wabi, makala go moto ne cibiliti, ne mbeho nghali muno muno, yowa co cilipicizo cawo.

⁷ U Muwaha Mulungu, mwene yo we ling'ani, nayo yendile ling'ani, ne wanhu wono wakwituma ze ling'ani, wawo wo wokwikalana nayo.