Zabuli 108 - Luganuzi Luswanu Kuli Wanhu Wose 2002

Lilombo ku so wucitilwe kuli walugu

¹ Gwe go Muwaha Mulungu, inhumbula yangu yikamile, heya nghamile mu nhumbula yangu, holeka nokwimba, kanyhi nokusangalalila! Gwe go nhumbula yangu, alu wusinhuce!

² Musinhuce nanye nyo ndonondo ne masumbi, nane no mweneco nokwilawa kwinuka hakali mitondo!

³ Nane nokulumbila haciligati ye makungugo, 'gwe go Muwaha Mulungu, nokwimbila zo lukumyo haciligati ye wanhu.

⁴ Lusungu lwako lwinji lucizize wulanga, no wihuwilwa wako, wuficile sunga ko ku mwanya.

⁵ Gwe go Mulungu, wulawiliciye ku wulanga kucanyha, no lukumyo lwako luficile mono'nze yose.

⁶ Holeka wucikombolaje, co wanhu wako mono wucendile, wuciponye ko muwoko wako we vilungo, kanyhi wucihulicize no wulombe wetu.

⁷ Mulungu kalonga ku wulawa, hono helile hakwe katya, “Alu langa nosangalala, hono niyigawanule yisi ya Shekemu, ne lilolo lya Sukoti nalyo, noligawa kuli wanhu wangu.

⁸ Hambi Gileyadi nha yangu, sunga na Manase nayo yangu, Nayo Efulayimu nha yo kofiya yangu ye cuma, na Yuda nayo, yo nghome yangu yo wutemi.

⁹ Nayo Mowabu lye bakuli lyangu lyo kwizuguziza, nane noyigumilila Edomu cilatu cangu, ciwe co citanjilo vyono nayo yangu, kanyhi nozoza lizozo lyo wusume kuli Filisiti!”

¹⁰ Alu nani lo Gwe go Mulungu mono kosuma, kunhegula sunga kwi'kaya lye ligomawakali? Hamba nani mono konhonga sunga ko ku Edomu?

¹¹ Hamba lu wo wutya, wakondya kucilecela lukulu 'gwe go Mulungu? Alu yo hodu du, hamba sikowa wuli hamonga, kanyhi ne mapuga getu?

¹² Gwe go Muwaha Mulungu, cikukunena wucitaze kuli walugu wetu, hambi wutazi wono wukulawa kuli wanhu, nha si wokwila cinji yaye.

¹³ Nase mbeka cosuma du, hono Mulungu yawe yali ku lubavu lwetu. Mwene kowapondanjiza i walugu wetu.