Zabuli 102 - Luganuzi Luswanu Kuli Wanhu Wose 2002

Lilombo lyo muzelelo mono yali mu wugaye

¹ Gwe go Muwaha Mulungu, wuhulice wulombe wangu, ne cililo cangu cikuficile.

² Wulece kuwa kutali nane lono nili mu wugaye! Wuteje likutu lyako, wuhulice mbela lono nghulomba!

³ I vilo vyangu nha vikupuluta mbela mbela nha lyosi, ne mafupa gangu gakwaka nha moto.

⁴ Natemangwa, nawa nhe mahanze gono ganyalile. Nawa sina hamba nzala ya ndigwa.

⁵ Ku soko ye lizi lyo wugule wangu, mafupa gangu ganamatiye ne nghuli yangu.

⁶ Nehwana nhe zindeje za mu nyika, kanyhi nhe zinhuwi mu matongo.

⁷ Nghugona nuguye du, nihwanile, nhe ndeje nyhiwa, yono yili mwi'tembe mucanyha.

⁸ Nawo walugu wangu, wekalaga wakusimanga misi yose. Nawo wono wakunzwajiza, wakwitumamila litagwa lyangu ko kulilijitila.

⁹ Na ku soko yo wukali we likuwo lyako, mavu gaweza nha yo ndigwa yangu,

¹⁰ Nane nagahanza-hanza mahozi gangu, na co kung'wa cangu. Nagwe kunhondola no kunhaga kutali.

¹¹ No wumi wangu, wihwanile, nho mubeho we cinyamihe, nghunyala nhe mahanze.

¹² Ninga agwe go Muwaha Mulungu, wutemile cibitilila, ne litagwa lyako lyokumbucilwa mu zindelo zose.

¹³ Agwe kokwinuka, koliwonela lusungu likaya lya Sayuni, hambi cipango nha cafika cono cinojeye, co lusungu lwako, naco aci co cipango cono cinojeye muno.

¹⁴ Ninga wetumami wako, walyendile likaya lilyo lya Sayuni, hamba liwe lyawa matongo gose, ninga hamba nhavivyo, wakuliwonela lusungu du, hamba liwe lyakondya kuweyanjika muno.

¹⁵ Nago makungugo, gomogopa Muwaha Mulungu, ne watemi nawo, wose wolwogopa lukumyo lwakwe.

¹⁶ Nayo Muwaha Mulungu, kolo yakondya kulizenga, kanyhi likaya lya Sayuni, baho langa ho kokwijelela, vyono mwene yo wo lukumyo.

¹⁷ Nayo kowuhuliciza wulombe wo muciwa, no wulombe wawo hamba si kowulema yaye.

¹⁸ Ale, wuzandikaje zizino, ku soko yo lulelo lono lukuza, i wanhu wono wolelwa hanyuma, nawo wamukumye Muwaha Mulungu.

¹⁹ Nayo Muwaha Mulungu, ku wulawilila hono helile hakwe, yakalanga hasi, ku wulawilila ku wulanga, yakayilanga yinze.

²⁰ Yakacihuliciza cililo ca wono wafunjigwe, yakawawopolela wono wali waling'anizwe kufwa.

²¹ Ne litagwa lyo Muwaha Mulungu, lyokwanzwa ku Sayuni, heya, sunga no lukumyo lwakwe, nalo lokwanzwa ku Yelusalemi,

²² mwipango lono makungugo gose, gokwikongholelela hamonga, ne matemi gamuhembe Muwaha Mulungu.

²³ Mulungu kanyhepulila vilungo vyangu, lono nghali muzelelo, kacepula vilo vyo wikale wangu.

²⁴ Gwe go Mulungu wangu, wulece kusola lulu lono nghali muzelelo. Gwe go Mulungu, yo gwegwe, mono kwikalaga cibitilila,

²⁵ wayiwumba yinze katali na katali, wulanga wo mulimo we miwoko yako.

²⁶ Azo zokwajilila no kusakala nha mwenda, nazo zopuluta no kwajililila lukulu, ninga agwe kosigala baho du vyo winha.

²⁷ Hambi agwe, nha yo gwegwe du cibitilila, no wikale wako wusina ndumo.

²⁸ Ne wana wetu wokwikala wapolile, ko wudimi wako, ne wana wawo nawo, wowa wakamile hali'gwe.