Zabuli 10 - Luganuzi Luswanu Kuli Wanhu Wose 2002

Wulombe wo munhu mono yakwiwonelwa

¹ Gwe go Muwaha Mulungu, so cici wuli kutali? Nhawule wukwihundika lono cili mu wugaye?

² I wabi wakwidunhumula no kuwatyatilila i waciwa. Ninga 'gwe lece, mitego yawo yiwagwize weneco.

³ U munhu mubi kedunhumulilaga mu masulumizi gakwe mabi, nayo we masulumizi, kamukanaga Muwaha Mulungu no kumubeza.

⁴ U munhu mubi, mu wulawilila mu widunhumuzi wakwe, hamba si kamucelelelaga Mulungu, ne mahweso gakwe gose katezaga, “Hasina Mulungu.”

⁵ U munhu mubi katugaga cambuzi nhondo zose, hamba si kayimanyaga ne ning'aniza yo Mulungu, kanyhi kawabedegalaga i walugu wakwe wose.

⁶ Nayo kehwesaga mu nhumbula yakwe, “Ane si nokwihwelela cinji, hamba sinotuga magayo mu mikalile yangu.”

⁷ Mulomo wakwe wumemile wulijite no wukonji mupelu, ku wulonga makani mabi na ge cikomaza.

⁸ Yendile kwihundika mu vikaya, ho yawasepe no kuwawulaga cinyele, wanhu wono wasina yisutya lyolyose. Kawasepaga wanhu wono wasoceye,

⁹ kawazumhilaga nhinicizo ku wulawa mumo, mu wihundiko wakwe nha simba. Katejelaga ho yawebate waciwa, nayo kawagwizaga ko mutego wakwe, kawa kuwasola.

¹⁰ Kamuzumhilaga musocele no kumugwisa hasi, yakugwiswa ko wukali wo munhu mubi.

¹¹ Nayo munhu mubi kehwesaga mu nhumbula yakwe yakutya, “U Mulungu si kacelelelaga cinji, yafufunize, hamba si yakumbona yaye.”

¹² Gwe go Muwaha Mulungu, wuze wuwalipicize, kanyhi wulece kuwasemwa wono wali mu wugaye.

¹³ Gwe go Mulungu, alu so cici u munhu mubi yakukubedegala, no kutya, “Hamba si kosuma kundipiciza yaye?”

¹⁴ Na kumbe agwe ho kuwawonaga wono, wali mu wugaye hamonga ne magaziko, nagwe wiwikanize nhondo zose kuwataza. Nayo mono yasoceye kakwitumbilaga gwegwe, nayo mwana mono yasina walezi katugaga wutazi kuli'gwe.

¹⁵ Alu wuvibenanjizaje vilungo vye wabi, wuwudumyaje wubi wose ho wulece kwijela kanyhi.

¹⁶ Nayo Muwaha Mulungu, yo mutemi, cibitilila ne cibitilila! Ne makungugo gono si gamumanyile mwene, gokwajililila lukulu, hamba kwijela kanyhi mu yisi yakwe.

¹⁷ Gwe go Muwaha Mulungu, kubocelaga cililo co musocele, kumuhulicizaga no kumusikamya mu nhumbula yakwe.

¹⁸ Kowataza i wana wono wasina walezi, na wono wakwiwonelwa, munhu we nghuli ho yalece kuwogofya kanyhi.