Yoweli 3 - Luganuzi Luswanu Kuli Wanhu Wose 2002

Mulungu kologaling'aniza makungugo

¹ Muwaha Mulungu yakutya, “Mu vilo vivyo, nolowugomola wumoteswe wa Yuda na Yelusalemi.

² Nane nologakonghola makungugo gose, nigategule sunga ko kwi'lolo lyono likucemwa, “U Muwaha Mulungu Yakuling'aniza. Nane nolowaling'aniza i makungugo gago ku soko ye metumo gawo gose gono wawatendela wanhu wangu Isilayeli. Ku soko waweyagaziza Isilayeli mu ma'si go wujenzi, no kuyigawa Isilayeli yisi yangu.

³ Nawo wakawagawa wanhu wangu mu nzila yo kuwatowela kula, ho yejele mono kosuma kuwasola wafungwa. Wakawaguza wana we cilume na we cicekulu ku wuwanda ho wetujile sawo yo kuwapela wasenyha, hamonga no kugula divayi wang'we.

⁴ “Alo nanye nyo Tulo na Sidoni, hamonga ne zi'si zose ze Wafilisiti, mukusaka mwitume nghanici kuli'ne? Hono muwe mukusaka kwituma nghani yinji yo yose kuli'ne, ale, ko kwenyu, ninga nane nomugomolelenyi nanye musunho zo wulipicizwe wenyu.

⁵ Hambi nha mwesolela nyo weneco fweza ne zahabu, ne vinhu vyangu viswanu, no kuvinjiza mu zinyumba zo wuhembelo wenyu.

⁶ Mukawasola wanhu wa Yuda na Yelusalemi, mukawategula kutali ne yisi yawo, mukawaguza ku Wagiliki.

⁷ Alu nane neza kubita kuwasola kuko kono anye mwawaguza, nane nomutendelenyi zose, nha vyono nanye mwawatendela wene.

⁸ Nane nowaleka wana wenyu we cilume na we cicekulu, waguzwe kuli wanhu wa Yuda, ne wanhu wa Yuda nawo wowaguza kutali ku wanhu wa Sheba, hambi ane no Muwaha Mulungu nha vyo nghutya.

⁹ “Muwalonjelaje makungugo gose mutye, ‘Mwiwikanizaje so wulugu, muwacemaje we citung'ati wenyu, mukonghole wasilikale wose wabite ku wulugu!

¹⁰ Mutyane masili genyu gawe mimaje, ne zihengo zenyu ziwe migoha, sunga na wono wasoceye nawo wose wabite ku wulugu.

¹¹ Ale musunhe muze, anye nyo makungugo gose mono muli mu mbavu zose, mwihangulizize mwi'lolo.’ ” Gwe Muwaha Mulungu, wutegule vitung'ati wako vikehome.

¹² “Makungugo gewikanizaje, gaze mwi'lolo lyono likucemwa, U Muwaha Mulungu Yakuling'aniza, ane no Muwaha Mulungu kuko ko nogaling'aniza makungugo ga mu zimbavu zose.

¹³ Hambi wene nha wabi muno, holeka wuwatemangaje wuwagwise hasi nha wuhemba mwi'pango lye ndudula, wuwakobonje nha zabibu vyono zikuwa kukobongwa mwi'tuli lyokukobonjela, sunga ne divayi yiwa kulawila.”

¹⁴ Mapuga na mapuga wali mwi'lolo lyo wuling'anizizwe. Na vyo yolowa mwi'zuwa lilyo lyo Muwaha Mulungu, nalyo likuza hamba si lyocela yaye.

¹⁵ Mwi'zuwa lilyo, mwezi ne lizuwa vyolotukuwala, ne zinyelezi si zolong'alala yaye.

Mulungu kowalugutiza wanhu wakwe

¹⁶ Muwaha Mulungu yakulonga ne lizi yiwaha ku wulawa mwi'tunda lya Sayuni, ne lizi lyakwe likudidima ku wulawa mu Yelusalemi, sunga ne yisi hamonga no wulanga navyo vikucicima, ninga mwene Muwaha Mulungu yo kowadima.

¹⁷ “Nagwe go Isilayeli baho ho kolomanyila vyono ane yo nene Muwaha Mulungu wako. Nikaye mu Sayuni mwi'tunda lyangu lyono lyelile. Nayo Yelusalemi yowa likaya lyangu lyono lyelile, hamba wajenzi si wolisuma yaye.

¹⁸ “Mu vilo vivyo, matunda golomema mizabibu yose, ne zing'ombe nazo, zolowa ziyagaye mu matunda gose, kanyhi kolowa na malenga menji ku soko ye vikolongo vya Yuda. Ne cikolongo colohuluma ku wulawilila mu kaya yo Muwaha Mulungu, sunga ne lilolo lya Shitimu nalyo, lyolowa lina malenga menji.

¹⁹ “Misili yolowa nyika nghavu, na Edomu yolohodangwa no wongomezwe, vyono wayihoma yisi ya Yuda, no kuwawulaga wanhu wono wasina masutya.

²⁰ Holeka nane nowalipiciza wawo wono wawawulaga, hamba sinowawonela lusungu yaye, ku soko ye lisutya lyawo lilyo. Ninga Yuda na Yelusalemi wokwikala cibitilila.

²¹ Nane nowalipiciza wono wawawulaga i wanhu wa Yuda hamba si nowalecela yaye i wasutyi. Nane ane no Muwaha Mulungu, nikaye mu Sayuni.”