Yoweli 2 - Luganuzi Luswanu Kuli Wanhu Wose 2002

Nzije zikuwa co citanjilo ce suguzi co wuze we Lizuwa lyo Muwaha Mulungu

¹ Towenyi ndulele ye citanjilo mu Sayuni, mwi'tunda lyono lyelile lyo Muwaha Mulungu. Wanhu wose mono mwikaye mu Yuda, mucicime. Hambi lizuwa lyo Muwaha Mulungu nha likuza, kanyhi lyasejelela.

² Nalyo kanyhi lyolowa yizuwa lya citi no wukalale, yizuwa lye mavunde no wutitu tuku. Hambi litewa yiwaha lye zinzije, nha lyologubika matunda kotya citi. Cikali hamba si nejela cinhu cono cinha vivi, mu vilo vyono vyapuluta, hamba mu vilo vyono vikuza si cilejela yaye.

³ Litewa lili lye zinzije zikulya vilimwa kotya moto wukutakamiza mahanze, ku mwande yazo, yisi yihwanile Busitani ya Adeni, ninga ku nyuma yazo, yihwanile kotya nyika yono yihodanjice. Hasina hamba cinji cono gasigaze.

⁴ Wijele we zinzije zizo, zikwijela zihwanile Fwalasi, kanyhi zikumangha kotya Fwalasi zo wulugu.

⁵ Na lono zikuguluka musunho mu vizuli vye matunda, cihumbi cazo cihwanile mituka yono yikubita ku wulugu, misindo yazo no mulilo we cihumbi cazo, kotya mahanze makavu gono gakutakamila mu moto. Zipanjile kotya wasilikale wono wewikanize kubita ku wulugu.

⁶ Na vyono zikucila kusejelela behi, wusu we wanhu wose wukusininghala so woga.

⁷ Zikwinjila kotya wasilikale wo wulugu, zikutambala mu majinji kotya we citung'ati, zose zidomile kumwande, hamba sizikuleka wulunji wazo hamba hadodo.

⁸ Zikukola mu nzila yono nyagwe yikolile, sunga na mu magomawakali gawo, zene zikubita zikupuluta du, hamba hasina cinji cono cosuma kuzimila yaye.

⁹ Zikwinjila musunho muno mwi'kaya, zikumangha mu majinji gawo sunga na mu matembe ge zikaya, kanyhi zikwinjilila mu madilisha nha wahizi.

¹⁰ Sunga ne yisi nayo yikucicima, no wulanga nawo wukusinjisika, ne lizuwa nalyo no mwezi vyatukuwala, sunga ne zinyelezi, hamba sizikusana yaye.

¹¹ Hambi Muwaha Mulungu nha yakuwalajiliza lipuga lye wasilikale wakwe kwe'zi yiwaha, nalyo lipuga lyono limuhulicile, wo wenji muno, kanyhi wali vilungo. Wugayeci wono wolowa, mwi'zuwa lilyo lyo Muwaha Mulungu! Nani 'mbi mono kolokangalila?

Lucemo lo wunene

¹² Alu Muwaha Mulungu yakutya, “Munene mu zinhumbula zenyu mumhitucile nene, ko wuleka kulya, no wulila muno.

¹³ Kanyhi muwulajilaje winenenyhezi wa mu zinhumbula zenyu ko wukalale wenyu. Hambi wudemulanga vivwalo vyenyu, nha si wukwiliye cinji yaye.” Mumupitucile Muwaha Mulungu, hambi mwene nha yo yena nheto no lusungu. Sikakolagwa ne likuwo mbela, mwene nhondo zose, yewikanize kunenela du, hamba si kulipiciza yaye.

¹⁴ Na lunji Muwaha Mulungu wenyu, komukumbucilenyi no kukawaniza lihweso lyakwe, no kumulugutizenyi, hamonga no kumonjelezezenyi vilimwa vyenyu. Nanye ho mosuma kumulavivya vilavywa vyo wusaje ne divayi.

¹⁵ Holeka mutowe ndulele mwi'tunda lya Sayuni, muwalajilize wanhu walece kulya cinji, wekongholele wose hamonga!

¹⁶ Muwakongholaje wanhu hamonga, muwawikanize so wihangulize wono welile. Muwaletaje ne wakombi, hamonga ne wana, ne wana wagalika wose, hamonga na bwana halusi na bibi halusi walece nyumba yawo, waze wose.

¹⁷ Nawo wakohani, hamonga ne wetumami wono wakumwitumamila Muwaha Mulungu, haciligati ye cikumbicilo no mulango we Nyumba yo Mulungu, yiwanojeye walile no kulomba muno muno, watye, “Gwe go Muwaha Mulungu, weze no lusungu kuli wanhu wako, wulece kugaleceleza makungugo ganji gacibedegale, hamba kucisekanga kose, wawe kutya, ‘Alu yali hayi Mulungu wenyu?’ ”

Mulungu koyigomolela yisi lulelo

¹⁸ Hobaho Muwaha Mulungu yakayiwonela nghalazi yisi yakwe, no kuwawonela lusungu wanhu wakwe.

¹⁹ Muwaha Mulungu yakawapitula yakawatya, “Alu nomupelenyi wuhemba, ne divayi, ne mafuta, nanye momoteswa, sunga ne makungugo ganji sigomubedegalenyi kanyhi yaye.

²⁰ Noliwusa litewa lye zinzije lyono lyaza ku wulawa kusumuka. Noziwinjila ku nyika, nago matewa ga ku mwande, nogategula ko kwi'lenga lyo mwino, nago ga mu nyuma ko kwi'lenga lya Meditelaneya. Nazo zofwila mumo, ne miwili yazo, yolavya munungho mumo mwi'lenga. Nozihodanga ku soko ya zose zono zamutendelenyi.

²¹ “Nanye mo migunda, mulece kogopa langa musangalale, kanyhi mweze ne nyemo, so zose zono Muwaha Mulungu yamutendelenyi.

²² Nyo vilimu nanye nhavivyo, mulece kogopa, hambi wudimo wenyu nha wasipuka, ne mibici nayo yikulela mikalo yayo, hamonga ne mikuyu, ne mizabibu yose, alu vyenjipa muno.

²³ “Holeka muweze ne nyemo anye wanhu wa Sayuni, musangalalile zono Muwaha Mulungu wenyu yamutendelenyi. Hambi mwene nha kamupelenyi mvula ye lifuku yono yikwiliye, kanyhi komutonyezezenyi ne mvula ye mhinga na ye mafuso ku soko yenyu, nhe vilo vyono vipulute.

²⁴ Ne vyuga vyenyu vyomema wuhemba, ne matuli go kukobonjela, gokwiguta divayi ne mafuta.

²⁵ Nomugomolelenyi kanyhi vilimwa vyenyu, vyono vyajilila mu myaka yono zinzije zalya. Hambi nha yo nene mono nalituma litewa lye zinzije kuli'nye.

²⁶ Holeka nanye mowa na vinji vyo kulya, kanyhi mokwiguta. Nanye momukumya Muwaha Mulungu, u Mulungu wenyu, mono yetuma mapoto ku soko yenyu, nanye nyo wanhu wangu hamba simobedegalilwa lukulu kanyhi.

²⁷ Holeka Isilayeli, momanya vyono ane nili hamonga nanye, kanyhi vyono yo nene Muwaha Mulungu wenyu, hasina Mulungu yunji kanyhi. Nanye nyo wanhu wangu, hamba simobedegalilwa lukulu kanyhi.

Lizuwa lyo Muwaha Mulungu

²⁸ “Yolowa hanyuma yayo, nolokwita zo muhe wangu muli wanhu wose, wana wenyu we cilume na we cicekulu wolowila ze nghani yangu, ne wakombi wenyu wololota ndoto, ne wazelelo wenyu nawo wolowona wugubulilwe.

²⁹ Mu vilo vivyo, nolokwita zo muhe wangu, mu wetumami wangu we cilume na we cicekulu.

³⁰ “Nane nololajila citanjilo ce lizuwa lilyo ku wulanga, na kono'nze kolowa sakami no moto ne mavunde ge nghungulyosi.

³¹ Lizuwa yolotukuwala, no mwezi nawo wolopituka wuwe mudunghu nha sakami, lono likali sinafika lizuwa lyo kogofya lyo Muwaha Mulungu.

³² Kanyhi munhu wo wose mono kololomba wutazi kuli Muwaha Mulungu, yuyo yo kolopona. Nha vyono Muwaha Mulungu yalonga yakatya, Wenji wa mu Yelusalemi wolopona, na wono nawahagula wolokwikala wapolile.”