Yoweli 1 - Luganuzi Luswanu Kuli Wanhu Wose 2002

¹ Ayi yo nghani yo Muwaha Mulungu yono yamuziza Yoweli Mwana wa Petuweli.

Wanhu wakulila so wuhodangwe we migunda

² Hulicizenyi ta, anye nyo wakombi, sunga nanye wose mono mwi'kaye mu'si ya Yuda, muhulicize. Wulenyi hono mukulanga, zono zinha zizi zowa zejela 'mbi mu vilo vyenyu hamba lunji mu vilo vye walezi wenyu?

³ Ale, muwalonjelaje zizi, wana wenyu, nawo wana wenyu wawalonjele wana wawo, i wana wawo nawo, wawalonjele lulelo lono lukuza.

⁴ Matewa na matewa ge zinzije genjila mu migunda yetu, galya vilimwa vyetu, na cono litewa lye zinzije, lisigaze, litewa lye mbilazi likulya, na cono litewa lye mbilazi lisigaze, litewa lye mang'ungu likulya, na cono litewa lye mang'ungu lisigaze, litewa lye mapanzi likulya.

⁵ Holeka nanye nyo wang'wela, mwenzeluce mulile muno muno, mulile ku soko ye divayi mhya, anye wose mono mung'wezaga divayi. Hambi zabibu zono muyinozezaga divayi mhya, nha zakondya kuhodangwa ne zinzije.

⁶ Hambi litewa lye zinzije nha linjila mu'si yetu, kanyhi lili vilungo, nzije nyinji muno sizikusumika hamba kuwuwalwe. Zina meno makali kotya meno ga simba ne majego gono genha ga simba nyhekulu.

⁷ Zahodanga sunga ne mizabibu yetu, zakondya kulya ne mikuyu yetu, zayikubulanga ne mabada gayo gose, ne manhambi gayo geza mazelu swee.

⁸ Anye nyo wanhu, mulile nho mwana munyacipale, mono yafwilwa no munhu mono yali hila kutolwa nayo.

⁹ Hambi vilavywa vyo wusaje hamba vye divayi, vyo kulavya mu Nyumba yo Mulungu, nha vyeza vili hasina lu. Iwakohani nawo wakulila ku soko i vilavywa vyo kumulavizya Muwaha Mulungu, alu vyeza vili hasina.

¹⁰ Hambi migunda nha yeza yisina cinji. Yisi nayo, yikulila ku soko wuhemba nha wahodangwa, sunga ne divayi yawula, ne mafuta geza sigakwijela.

¹¹ Ale, mukolwe cevu anye nyo walima migunda, nanye nyo walindilizi we migunda ye mizabibu, mulile ku soko yo wuhemba ne shayili, heya, hambi vilimwa vyose nha vyahodangwa.

¹² Hambi mizabibu nayo sunga ne mikuyu nha yakondya kunyala. Sunga ne mibici yose ye mikalo yakondya kunyala. Sunga ne wanhu wose nhondo, weza wasina hamba nyemo bwete.

¹³ Ale, muvwale magunila, mulile, anye nyo wakohani mono mwitumaga ha cikumbicilo! Mubite mu Nyumba yo Mulungu mukalile cilo cose! Hambi nha heza hasina vilavywa vyo wuhemba ne divayi, vyono momulavizya Mulungu wenyu mu Nyumba yakwe.

¹⁴ Mwiyezeze mu nzila yo wuleka kulya, mucemeleze wanhu waze ku wuhembi, muwakongholaje walongola, hamonga ne wanhu wose we yisi ya Yuda, wenjile mu Nyumba yo Muwaha Mulungu wenyu, mumulilile Mulungu.

¹⁵ Woyi he nye! Hambi lizuwa lyo Muwaha Mulungu, nha lyasejelela, lizuwa lyono Muwaha Mulungu u Mudaha Vyose kololeta wongomele!

¹⁶ Alu, ceza cisina witumbilo kanyhi, vyono vilimwa vyetu vyose vyakondya kuhodangwa. Sunga ne nyemo yose yeza yili musina mu Nyumba yo Mulungu wetu.

¹⁷ Hambi imbeyu nayo nha yahodanjicila mu muhangha mukavu, imadongha nago galekwa gasina hamba cinji, zinyumba zo wuwiko we madongha, nazo zamwaguka. Hambi wuhemba nha wanyala.

¹⁸ Ne zing'ombe nazo zikulila ku soko yiyo, hambi nha kweza kusina wudimo wazo, ne matewa ge zingholo nago gakugaya du.

¹⁹ Ane nghukulilila agwe go Muwaha Mulungu, ku soko yo wudimo hamonga ne mibici, vyono vyanyala kotya nha vitakamizwe no moto.

²⁰ Sunga ne zinimu za mu mbago nazo nha zikukulilila, ku soko ye malamba ne makolongo gono ganyala.