Yoshuwa 9 - Luganuzi Luswanu Kuli Wanhu Wose 2002

Wagibeyoni wakumukonga Yoshuwa

¹ I vilungo hamonga no wusume we Waisilayeli, vikamanyika muno mu watemi wa mu mhelo ye mwezi ye likolongo lya Yoludani, mu matunda na mu mwalambalo we matunda, na mu mwalambalo wo wuhihi we lilenga lya Meditelaneya, sunga kulubavu lwa kusumuka, ku Lebanoni. Ne watemi wawa wali wo watemi we Wahiti, ne Waamoli, ne Wakanani, ne Wapelizi ne Wahivi ne Wayebusi.

² Wawo wose wakawa kwilumbaniza hamonga, wakawa kuwakongholela hamonga i wasilikale wawo wo wulugu, wabite vikehome na Yoshuwa ne Waisilayeli.

³ Ninga i wanhu wa Gibeyoni wono wali Wahivi, wali wakondya kuzihulika zono Yoshuwa yetuma ku Yeliko na ku Ayi.

⁴ Holeka wakalamula wabite wakamukonje Yoshuwa. Ale wakabita, wakasola zindigwa wakapacila mu zindogowe zawo mu magunila gono gasakaye, wakasola divayi nayo wakayitajila mu mifuko ye zinyhingo zihuma.

⁵ Wakavwala myenda yono yisakaye, ne malatu gono gademuce gono wali wagawikaniza. Ne zindigwa zono wadinghula, zali zina no mumvulya.

⁶ Ale, wakawa kutuluka, wakawa kubita ku nghambi ya Giligali, wakawa kumulonjela Yoshuwa ne wanhu wa Isilayeli wakawatya, “Nye wayetu, ase cikulawilila ku yisi yo kutali, holeka cikuhila cilumbanize nanye cikalane.”

⁷ Ninga Waisilayeli wakawatya Wahivi, “Alo nhawule cilumbanize na nyenye? Yilece kuwa lunji mwikaye baha behi.”

⁸ Nawo wakamulonjela Yoshuwa wakamutya, “Ase cili wetumami wako.” Yoshuwa yakawawuza yakawatya, “Alo nyenye wa nani lo? Na kanyhi mukulawilila hayi?”

⁹ Nawo wakamuloloseza Yoshuwa wakatya, “Ase cilawilila ku yisi yo kutali muno gwe muwaha, vyono cazihulika zose zo Muwaha Mulungu, u Mulungu wenyu. Kanyhi cazihulika zose zono yetuma ku Misili,

¹⁰ sunga na zono yetuma kuli awalya i watemi wejete we Waamoli, wa ku nhumbi ye cilima ye likolongo lya Yoludani. Mutemi Sihoni wa ku Heshiboni no mutemi Ogu wa ku Bashani, wono wekalaga ku Ashitaloti.

¹¹ I walongola wetu hamonga ne wanhu wose wono wekaye mu yisi yetu, wacilonjela cisole zindigwa zetu, ciwikanize so muhinzo ho cize cimuhinjilizenyi. Cikalonjelwa vyono cize cilunze mu witumami wako. Kanyhi, cikulonjele vyono ase ciza ho cilumbanize nanye.

¹² Mulanje ta sunga ne mikate yetu. Lono catulucila kwetu ne mikate yiyi, yali yikali yili moto. Ninga lu lanjenyi ta! Yenjila mumvulya kanyhi yanyala.

¹³ Kanyhi lono catajilila divayi yiyi mu mifuko yiyi ye zinyhingo, mifuko yiyi yali yikali mipya. Ninga mulanje lu! Yakondya kusakala. Ne myenda yetu, hamonga ne malatu getu, vyose vyasakala so muhinzo wuwu mutali muno.”

¹⁴ Baho Waisilayeli wakabocela zindigwa ze Wagibeyoni, hamba si wamula kuwuza wutonji, kuli Muwaha Mulungu, so nghani yiyo.

¹⁵ Hodu Yoshuwa yakawa kunoza mulamu ne wanhu wawo Wagibeyoni, na vyono kowaleka womi. Nawo i walongola we mhuga yose ye Waisilayeli, wakelahiza vyono, wocikamisa cilagane cico.

¹⁶ Vyaza kupuluta vilo vidatu, wulawilila mwi'zuwa lyono wanozeza i cilagane nawo, nhondo Waisilayeli ho wakawa kumanya nha vyono wanhu wawa kumbe mbeka wali wekalane behi nawo.

¹⁷ Hobaho wanhu Waisilayeli wakawa kutuluka, wakajenda muhinzo wa vilo vidatu, wakawa kufika mu makaya gono wanhu wawa wekalaga, Gibeyoni, Cefila na Beyeloti, na Ciliyati-yeyalimu.

¹⁸ Ninga Waisilayeli siwasuma kuwawulaga, vyono i walongola wawo wali wakondya kunoza wilahize kuli wene, mwi'tagwa lyo Muwaha Mulungu, u Mulungu we Waisilayeli. Wanhu wose wakawang'ung'ulicila muno walongola, ku soko ye nghani yiyo.

¹⁹ Ninga wene walongola wakawapitula wakatya, “Ase cakondya kulavya wilahize wono wukamile kuli wene, mwi'tagwa lya Muwaha Mulungu, u Mulungu Waisilayeli. Holeka lu, sicidahile kuwatendela vibi kanyhi.

²⁰ Langa yicinojeye ciwalece wekale womi ku soko yo wilahize wetu. Na hono cilece kuwukamisa wilahize wetu, ho citume vibi kuli wawa, Mulungu nayo kocilipiciza.

²¹ Holeka ciwalekaje wekale womi, langa wene wowa kucitenyela zingwagu no kucinejela ne malenga.” Aga gali go mahweso gono walongola wakalavya. Nayo vyo yikawa nhavivyo.

²² Hobaho Yoshuwa yakalajiliza vyono, i wanhu wose wa Gibeyoni wategulwe ha mwande yakwe. Nayo yakawawuza yakawatya, “Socici mwali kucikonga, mukucilonjela vyono anye mwali walawa kutali, kumbe muli wekala mumu?

²³ Holeka vyono mwetuma zizi, u Mulungu nayo yakondya kumuling'anizenyi. I wanhu wenyu nhondo zose wowa wetumami. Wowa watenya ngwagu, kanyhi wanega malenga, mu nyumba yo Mulungu wangu.”

²⁴ Nawo Wagibeyoni wakamupitula wakamutya Yoshuwa. “Gwe muwaha, na mbeka ase canoza zizo vyono cali cakondya kumanya, vyono, Muwaha Mulungu, u Mulungu wenyu, yali yakondya kumulajiliza u mwitumami wakwe Musa, kumupelenyi yisi yiyi yose. No kuwawulaga wanhu wose i wekazi wa mumo, nha vyono mowa kucila kujendelela kubita ku mwande. Holeka nase cetuma nhavivyo, hambi nha cali kumogopenyi muno so wumi wetu.

²⁵ Aluno cili mu miwoko yenyu, holeka mudahile kucinozeza nha vyono nyenye mukuwona viswanu.”

²⁶ Nayo Yoshuwa yakawatendela viswanu, yakawaponya mu miwoko ye Waisilayeli, ho walece kuwawulaga.

²⁷ Ninga hamba nhavivyo, lo lulo lulo yakawanoza wawe wetumami, watenya zingwagu, kanyhi wanega malenga so Waisilayeli na so cikumbicilo co Muwaha Mulungu. Sunga nalu wakali wajendeleye kuwituma mulimo wuwo, hanhu hohose hono Muwaha Mulungu kohagula, wawe kumuhembela.