Yoshuwa 8 - Luganuzi Luswanu Kuli Wanhu Wose 2002

Wibatwe, no wongomezwe, we likaya lya Ayi

¹ Muwaha Mulungu yakamulonjela Yoshuwa yakamutya, “Alu wusole wasilikale wose, mubite mukalihome likaya lya Ayi. Mulece kogopa hamba kwihwelela mu zinhumbula zenyu. Ane nomupelenyi wusume, nanye momusuma du mutemi wa Ayi, hamonga ne wanhu wakwe, ne likaya, ne yisi yose, yowa yenyu nyenye.

² Holeka munojeye muyitendele Ayi, no mutemi wayo nha vyono mwayitendela Yeliko no mutemi wayo. Ninga muhinzo wuwu, muvisolaje vinhu vyayo vyose viswanu, viwe vyenyu, hamonga ne mitugo zayo. Mwiwikanizaje mwinjile mulihome likaya, akuno muwicile ne watejezi ku mhilimo yalyo.”

³ Hobaho Yoshuwa yakewikaniza yabite ku Ayi, hamonga ne wasilikale wakwe. Yakawasola cipuga ca wanhu elufu makumi madatu, wono wali vitung'ati mu wihomi, yakawategula ne cilo mugati.

⁴ Yakawalajiliza yakatya, “Mwihundikaje kulubavu lunji lwe likaya, ninga yilece kuwa kutali ku wulawa he 'kaya, mwiwikanize mulihome.

⁵ Wanhu wangu hamonga nane, colisejelela likaya. Na kolo i wanhu wa Ayi wakuciwona, wokwanza kuciwinga, nase cokwanza kuwuya ne nyuma lumangho ciwe nha cikuwatiza, nha vyono canoza ha mwamulizo.

⁶ Wene wojendelela kucityatya, sunga ciwakwejeleze ciwafise kutali ne likaya lyawo. Nawo wokwihwesa cikuwatiza nha vyono canoza hamwamulizo.

⁷ Alu baho nanye, ho molawaniza ku wulawilila mono mwali mwihundice, no kuliteka likaya. Hambi Muwaha Mulungu, u Mulungu wenyu, nha komupelenyi likaya.

⁸ Nanye kolo mwakondya kulibata likaya, mulipembelaje no moto, nha vyono Muwaha Mulungu yalajiliza. Aga go malajilizo genyu.”

⁹ Hobaho Yoshuwa, yakawa kuwakombola wabite ku wihundiko wawo, wakawa kubita kulubavu lwa kumwezi ye likaya lya Ayi, hagati ya Ayi na Beteli wakawa walindilize kuko. Ninga mwene Yoshuwa yakagona mu nghambi mu cilo cico.

¹⁰ I mitondo yaco, Yoshuwa yakenuka hakali mitondo muno muno, yakawakongholela wasilikale wose hamonga. Hobaho mwene hamonga ne walongola wose we Waisilayeli, wakawa kutuluka, wakawa kubita ku Ayi.

¹¹ I wasilikale, hamonga na Yoshuwa, wakawa kubita wawusonjile mulango muwaha wo kwinjilila mwi'kaya, wakawa kusimya nghambi yawo ku lubavu lwa kusumuka, kono kwali kolili lilolo, hagati ya Ayi na weneco.

¹² Yakawasola wanhu elufu yihano, yakawawika mu wihundiko ku lubavu lwa kumwezi ye likaya, hagati ya Beteli na Ayi.

¹³ I wasilikale wono wali wawikanizwe so wihomi, wakawikwa mu nghambi mbaha yo lubavu lwa kusumuka ye likaya. Awalya i watejezi, nawo, wakawikwa ku lubavu lwa kumwezi. Mu cilo cico, Yoshuwa yakagona mwi'lolo.

¹⁴ Nayo mutemi wa Ayi, yali yeza kuwawona wanhu wa Yoshuwa, hobaho mwene, hamonga ne wanhu wakwe, wakatuluka musunho walanjile kwi'kolongo lya Yoludani, ho wakawahome Waisilayeli, kukulya du kono wawahomela ha mwamulizo. Kumbe si yali yamanyile vyono, kowali watejezi wono wali wehundice, wono womuhoma ku wulawa ku mhilimo ye likaya.

¹⁵ Nayo Yoshuwa, hamonga ne wanhu wakwe, wakawa kwinoza nha wakutiza, wakawa kumangha wadomile ku nyika.

¹⁶ Nawo wanhu wose wa mwi'kaya, wakawa kwicemeleza hamonga, ho wawawinje Yoshuwa hamonga ne wanhu wakwe. Ninga mu nghango yono wacilaga kuwawinga, na vyo wacilaga kubita kutali ne likaya.

¹⁷ Ne wanhu wose wa mwikaya wakatuluka, wakawa kubita kuwalondelela Waisilayeli. Wakalileka likaya lili wene lisina hamba munhu wo kulilanjilila.

¹⁸ Muwaha Mulungu yakamulonjela Yoshuwa yakamutya, “Wulisonhaje likaya lya Ayi no mugoha wako, hambi nha nghukupela likaya lilyo liwe lyako.” Yoshuwa yaketuma nha vyono yalonjelwa.

¹⁹ Nayo yali yaza kuwinula mugoha wa mu muwoko wakwe, i wanhu wono wali wehundice, wakenuka mbela mbela, wakamanyhila mwikaya no kuliteka, lo lulo lulo wakawa kulipembela no moto.

²⁰ Nawo i wanhu wa Ayi, wali weza kupituka, walanje ku nyuma, wakawona lyosi likukomoka mu mavunde mucanyha. Kukawa kusina nzila yinji yo yose yono wotiziza, hambi i Waisilayeli wono wamanyhila ku nyika, nha wakawapitucila no kuwahoma.

²¹ Nayo Yoshuwa ne wanhu wakwe, waza kuwona vyono i wayawo wakondya kwibata likaya, na vyono lyaticimizwaga no moto, hodu wakawapitucila wanhu wa Ayi, no kwanza kuwawulaga.

²² Nawo Waisilayeli, wono wali wenjila mwi'kaya, wakatima mwi'lolo, wawataze wayawo kuwahoma walugu. Baho i wanhu wa Ayi, wakewona wakondya kupilimwa ne Waisilayeli. Nawo Waisilayeli, wakawawulaga wanhu wa Ayi wose, hakawa hasina mono yapona, hamba mono yajendelela kwikala mwi'kaya.

²³ Langa mutemi wa Ayi, ayo wamwibata wakamutegula kuli Yoshuwa.

²⁴ Nawo Isilayeli, wakawawulajila i walugu wawo wose kuko ku nyika. Hanyuma ho wakawa kuwuya kanyhi ku Ayi, wakawa kuwawulaga wanhu wose.

²⁵ Nayo Yoshuwa, yakawa vyo yajendeleye du kuwusonha mugoha wakwe ku Ayi, hamba siyawutimya muwoko wakwe hasi, sunga lono yali yaza kuwona vyono, i wanhu wose wa Ayi wakondya kuwulagwa.

²⁶ Wanhu wose wa ku Ayi wono wawulagwa mwizuwa lilyo, wali waficile elufu yikumi na nyejete liwalo lyawo, we cilume na we cicekulu.

²⁷ Waisilayeli wakawa kuzisola mitugo hamonga ne vinhu vyose vyono waviteka mwikaya, nha vyono Muwaha Mulungu yamulonjela Yoshuwa.

²⁸ Yoshuwa yakaliticimiza likaya lya Ayi, gakawa kwikala matongo sunga nalu.

²⁹ Yoshuwa yakamusola u mutemi wa Ayi, yakamutumbika mwi'bici, yakamunyonga, yakawuleka muwili wakwe baho wukutumbila, sunga cinyamihe. Lizuwa lyali lyeza kugwila, ho Yoshuwa yakalajiliza u muwili wuwo wuwuswe mwi'bici, wutagwe hasi ha winjililo we lilango lye likaya. Wakawa kuwulundicila mucanyha yilundo yiwaha lya mabwe, ne lilundo lilyo, lili baho sunga nalu.

Wulajilize wukusomwa he'tunda lya Ebali

³⁰ Hanyuma Yoshuwa yakazenga cikumbicilo co Muwaha Mulungu, u Mulungu Waisilayeli, mucanyha ye litunda lya Ebali,

³¹ yakacizenjela mu nzila yono Musa u mwitumami wo Muwaha Mulungu, yawalonjela Waisilayeli. Nha vyono yikulongwa mu Wulajilize wa Musa. “Cikumbicilo cizengwe kwe mabwe gono si maseswe ne vitwalo vye cuma.” Wakamulavizya Muwaha Mulungu cilavywa cinyanywe mu cikumbicilo cico, hamonga ne vilavywa vyo mulamu.

³² Na lono Waisilayeli wali walanjiliye, Yoshuwa yakawusolela wulajilize wono wandikwa na Musa, yakawandika mu mabwe mucanyha.

³³ Nawo Waisilayeli, ne walongola wawo, ne wawaha wawo ne wahakimu, hamonga ne wajenzi wono wekalanaga hamonga nawo, wose wakema akuno na akuno mu mhelo ye Lisanduku lye Cilagane lyo Muwaha Mulungu, wedomile ne wakohani Walawi, wono wali walidinghuye Lisanduku. Nusu ye wanhu, wakema akuno walipeye migongo litunda lya Gelizimu. Ne nusu yono yisigaye, nawo wakema walipeye migongo litunda lya Ebali. Nha vyono Musa u mwitumami wo Muwaha Mulungu, yawalajiliza wanoze nhavivyo mu vipango lono wakubocela wulugutizwe.

³⁴ Hobaho Yoshuwa yakawa kuwusoma wulajilize wose kwe'zi yiwaha, wulugutwe, no wulijitwe, nha vyono vyandicigwe mu citabu co Wulajilize.

³⁵ Nayo Yoshuwa yakawusoma Wulajilize wose wa Musa, ha mwande ye wanhu wose wono wali wehangulize, hamonga ne we cicekulu ne wana wawo, hamonga ne wajenzi wose wono vyekalanaga nawo.