Yoshuwa 7 - Luganuzi Luswanu Kuli Wanhu Wose 2002

U wubi wa Akani

¹ Lilajilizo lyo Muwaha Mulungu kuli Waisilayeli, lyono yawatya, walece kusola cinhu cocose ca mwikaya lya Yeliko, cono cali cinojeye congomezwe, wene Waisilayeli wakalibena. Kwali na munhu yunji, mono yacemwaga Akani, yo yalibena lilajiizo lilyo. Holeka u Muwaha Mulungu yakawakolelwa muno likuwo Waisilayeli. (Yuyo Akani, yali mwana wa Kalimi, kanyhi yali mwizukulu wa Zabudi, we mhuga ya Zela, mono kulubavu lunji, yali wo mulango wa Yuda.)

² Hobaho Yoshuwa yakatuma wanhu wulawa ku Yeliko wabite ku Ayi, likaya lyono lyali lili kulubavu lwa kucilima lwa Beteli, behi na Betaveni, wena no wulajilize, wabite wakayitandile yisi. Nawo wali kuyiwona,

³ wakawuya wakamulonjela Yoshuwa wakatya, “Hasina soko yo kuwategula wasilikale wenji, wabite wakayihome Ayi. Langa wutegule wanhu elufu nyejete hamba elufu yidatu du. Wulece kutegula wasilikale wose wakehome, hambi cikaya cico nha cidodo du.”

⁴ Holeka wakategulwa Waisilayeli elufu yidatu du wo wakabita kwihoma na Ayi. Ninga wakatowa, wakatiza.

⁵ Wanhu wa Ayi, wakawawinga ku wulawilila he 'lango lye likaya, sunga ko ku Shebalimu. Wakawatowa, no kuwawulaga Waisilayeli makumi madatu na mutandatu mu nzila, mu nhenenhuko ye cigongo. Hobaho Waisilayeli vilungo vyawo vikadejepa, wakenjilwa na woga wuwaha.

⁶ Baho Yoshuwa hamonga ne walongola we wanhu wa Isilayeli, wakavidemulanga vivwalo vyawo ko wusungu wuwaha, wakagwa wugubama ha mwande ye Lisanduku lye Cilagane lyo Muwaha Mulungu, wakawa watambalaye baho sunga lizuwa likaswa, wakemwajila manghundi mu mitwe yawo, wakulajila wukalale wawo.

⁷ Yoshuwa yakatya, “Gwe go Muwaha Mulungu! So cici wukacilowosa kwi'kolongo lya Yoludani? Ho wucitajile mu miwoko ye walugu wetu Waamoli wacongomeze? Alo nhawule sicekalilila ku nhumbi nzagwe ya Yoludani?

⁸ Gwe Muwaha Mulungu, alu nonje ci, lono Waisilayeli, nhondo weza kusumwa ne walugu wawo?

⁹ Alu Wakanani hamonga ne wanji wose, mono yisi yose, nha wozihulika zizi. Baho wocipilima no kuciwulaga sese wose yumonga yumonga! Alu ho kotenda wule Gwe go Muwaha Mulungu, ho wulutetele lukumyo lwe litagwa lyako?”

¹⁰ Muwaha Mulungu yakamulonjela Yoshuwa yakamutya, “Gwe Yoshuwa, ale winukaje! Nhawule wukwigalangaza hasi nhavivi?

¹¹ Isilayeli lu, wakondya kwituma wubi! Kanyhi wakondya kubena ne cilagane cangu cono nawalonjela webate. Hambi nha wasola vinhu vyo mwiko, vyono vyawagwa ho vyongomezwe, wakondya kuhiza, wavihundika no kuviwika hamonga ne vinhu vyawo.

¹² Ayi yo soko yono yikuleka Waisilayeli siwakusuma kwihoma ne walugu wawo. Wakuwatiza vyono wakondya kwiletela wongomezwe! Alu nane si nowa hamonga nanye kanyhi, sunga kolo mwaviticimiza vinhu vivyo vyono namulonjelenyi mulece kuvisola!

¹³ Alu winuce! Wuweze kanyhi wanhu, ho wuwawikanize wasejelele ha mwande yangu. Wuwalonjelaje vyono, i mitondo, weze wakondya kwiyeza no kwiwikaniza. Vyono ane no Muwaha Mulungu, u Mulungu we Waisilayeli, nina zo kulonga, vyono, Isilayeli mwasola vyo mwiko vyono namulonjelenyi muviticimize! Nalu hamba si mowasumila lukulu ng'o i walugu wenyu, sunga kolo mukuviwusa vinhu vivyo muli 'nye!

¹⁴ Holeka wuwalonjelaje vyono, i mitondo hakali mitondo, mowa kuletwa ha mwande yangu, wo mulango monga monga. No mulango wono nowuhagula, wawo wo wojendelela kukola mhuga monga monga. Ne mhuga yono noyihagula, nayo yojendelela kukola ha mwande yangu nyumba monga monga. Ne nyumba yono noyihagula, nayo yojendelela kukola ha mwande yangu, munhu monga monga.

¹⁵ Hobaho yuyo mono nomuhagula, mono kowa yena vinhu vivyo vyo mwiko, munhu yuyo koticimizwa mu moto, hamonga ne mhuga yakwe, ne vinhu vyose vyono yena, hambi nha yaleta cevu cibi muli Isilayeli, kanyhi yabena ne cilagane cangu.”

¹⁶ Hobaho i mitondo yaco, hakali mitondo muno muno, Yoshuwa yakawaleta Waisilayeli, no mulango wa Yuda wukahagulwa.

¹⁷ Yakawaleta wawo wo mulango wa Yuda, we mhuga ya Zela wakahagulwa. Yakawaleta we mhuga ya Zela nyumba monga monga. Ne nyumba ya Zabudi yikahagulwa.

¹⁸ Hobaho yakayileta nyumba ya Zabudi munhu monga monga. Baho Akani u mwana wa Kalimi, u mwizukulu wa Zabudi, yakahagulwa.

¹⁹ Yoshuwa yakamutya Akani, “Mwanangu Akani, wulonje ze mbeka lu hali Muwaha Mulungu, u Mulungu we Waisilayeli, kanyhi wunene wubi wuwo. Wunonjelaje lu ta cono witumile. Wulece kuhundicila 'ne nghani hamba monga.”

²⁰ Akani yakamupitula Yoshuwa yakamutya, “Nghani yiyo yili mbeka, ane nakondya kumusutizya Muwaha Mulungu, u Mulungu wa Isilayeli, na zono nitumile zozi.

²¹ Mu vinhu vyono caviteka, ane mumo nghawona kanzu swanu ya Cibabiloni, yono yali yina cifo ca kilo nyejete za fweza, hamonga ne 'bumundwa lya zahabu, lyono lyali lina wuzito wa nusu kilo. Nghendezwa navyo muno, nghawa kuvisola. Wubite mwi'hema lyangu kovyagana nivifucilize mumo hamonga ne fweza hasi ye Kanzu.”

²² Hobaho Yoshuwa yakawatuma wanhu, wakamangha sunga ko kwi'hema. Na mbeka, wakavyagana vinhu vyo mwiko vifucilizwe mwihema, hamonga na fweza hasi ye kanzu.

²³ Wakavilavyaniza, wakavitegula kuli Yoshuwa ne Waisilayeli wose. Wakaviwika hali Muwaha Mulungu.

²⁴ Nayo Yoshuwa hamonga ne wanhu Waisilayeli, wakamusola Akani, hamonga ne fweza, ne likoti ne libumundwa lye zahabu, ne wanagwe we cilume na we cicekulu, ne zing'ombe zakwe, ne zindogowe zakwe, ne zingholo, ne lihema lyakwe, hamonga ne vinhu vyose vyono vyali vya mu sawo yakwe, wakavitegula Kwi'lolo lya Akoli, (nhunizo yayo, “Lilolo lyo Wugazwe”).

²⁵ Baho Yoshuwa yakamutya Akani, “Ku sokoci waciletela wugaye wono winha wuwu? Alu u Muwaha Mulungu nayo, kokuletela nagwe wugazice!” Baho i wanhu wose, wakamutowanga Akani ne mabwe, sunga yakawa kufwa. Kanyhi wakawatowanga ne wanagwe wose wakawaticimiza mu moto, hamonga ne sawo yakwe yose.

²⁶ Nawo wakakonghola mabwe yilundo yiwaha, no kugajeleka mucanyha yakwe. Ne mabwe gago gali baho sunga nalu. Ne likuwo lyo Muwaha Mulungu nhondo ho likawa kuwuka. Yiyo yo yikuleka hanhu baho hajendeleye kucemwa Akoli, nhunizo yayo “Lilolo lyo wugazwe.”