Yoshuwa 6 - Luganuzi Luswanu Kuli Wanhu Wose 2002

Wugwe we likaya lya Yeliko

¹ Baho malango ge likaya lya Yeliko, gekalaga madindwe, kanyhi galanjililwaga muno muno, ho Waisilayeli walece kwinjila. Kukawa kusina mono yakwinjila hamba kulawila mwi'kaya.

² Muwaha Mulungu yakamulonjela Yoshuwa yakamutya, “Alu neza kukupela likaya lya Yeliko, no mutemi wayo, hamonga ne wasilikale wayo.

³ Mulimo wenyu'nye wowa kulipilima likaya du vilo vyose kamonga kamonga mu vilo mutandatu.

⁴ Na mwi'zuwa lyo mupunghati, wakohani mupunghati, wasole munhu ndulele monga ye hembe lya nduwilu, walongolele ku mwande ye Lisanduku lye Cilagane. Nagwe, hamonga ne wasilikale wako, mulipilimaje likaya, sunga kali mupunghati, akuno i wakohani nawo wajendeleye du wakutowa zindulele zawo.

⁵ Ninga mu nghanghulo yo mupunghati, i wakohani watowe zindulele wazozize muno muno, ko mulilo we kweneza. Nanye kolo mukuhulika nhavivyo, ale i wanhu wose, wazozeze hamonga kwe mazi mawaha muno muno, hobaho i majinji ge likaya, gose gogwa hasi lwa kamonga. Nalyo lipuga lyose lye wasilikale, wawe kwinjila mwi'kaya lwa kamonga.”

⁶ Yoshuwa u mwana wa Nuni, yakawacema wakohani wose, yakawatya, “Ale mulidinghule Lisanduku lye Cilagane, na muli nyenye, wayenyu wanji mupunghati, walongole ku mwande ye Lisanduku, akuno wazidinghuye ne zindulele.”

⁷ Hobaho yakawa kuwalajiliza wanhu wakwe, wanze kulipilima likaya. Nawo wono wali wena ne vitwalo vyo wulugu, wakawa walongoleye kumwande ye Lisanduku lye Cilagane.

⁸ Na lono Yoshuwa yali yawalonjela wanze kulipilima likaya; lipuga lye wasilikale wono wali wena vitwalo vyo wulugu, likalongolela kumwande ye wakohani wono watowaga zi ndulele, hanyuma ho wakatyatya i wakohani wono wali walidinghuye Lisanduku lye Cilagane.

⁹ Kanyhi ho wakatyatya wasilikale. Na mu cipango cico cose, zindulele zali zijendeleye zikutowa.

¹⁰ Ninga Yoshuwa yali yakondya kuwalonjela wanhu walece kuzoza, kanyhi walece kulavya hamba yizi, sunga mweneco yawalonjele.

¹¹ Hobaho yakalilonjela lipuga lye wanhu wawa, wajendelele hamonga ne Lisanduku lye Cilagane lyo Muwaha Mulungu walipilime likaya kamonga du. Hanyuma wakawa kuwuya kugona ku nghambi yawo.

¹² Ne mitondo yaco, Yoshuwa yakelawa kwinuka hakali mitondo muno muno ne wakohani nawo wakalidinghula Lisanduku lye Cilagane lyo Muwaha Mulungu. Na mwi'zuwa lilyo lye kejete, i wakohani ne wasilikale, wakalipilima kanyhi likaya mu wityatye wu wulya du wono wanoza mwi'zuwa lilongozi. Wakalongola i wasilikale wono wena vitwalo vyo wulugu, hanyuma wakatyatya wakohani mupunghati wono watowaga zindulele mupunghati.

¹³ Hanyuma wakatyatya i wakohani wono wali walidinghuye Lisanduku lye Cilagane lyo Muwaha Mulungu, hanyuma ho wakatyatya i wanhu wose. Na mu vipango vivyo vyose, zindulele zajendelelaga kutowa du.

¹⁴ Na mwi'zuwa lilyo lye kejete, wakalipilima kanyhi likaya kamonga du, wakawuya kugona ku nghambi yawo. Wakanoza nhavivi, vilo mutandatu.

¹⁵ Mwi'zuwa lyo mupunghati, wakelawa hakali mitondo muno muno. Wakalipilima likaya kali mupunghati. Ne lizuwa lili, lyali lyo lizuwa limonga du, lyono walipilimila likaya kali mupunghati mwizuwa limonga.

¹⁶ Ne nghanghulo yiyo yo mupunghati, lono i wakohani wali weza kwanza kuzitowa du zindulele, Yoshuwa yakawalonjela wanhu wose wazoze muno muno. Kanyhi yakawatya. “Muwaha Mulungu yakondya kumupelenyi likaya!

¹⁷ Holeka lu likaya lili, na vyose vyono vili mugati yalyo, yinojeye vyose viticimizwe no moto, ciwe cilavywa kuli Muwaha Mulungu. Langa Lahabu u musenyha, hamonga na vya mu nyumba yakwe, mulece kuwatendela vibi, hambi nha yawahundika i watandizi wetu wono cawatuma.

¹⁸ Ninga anye, mulecele lukulu kusola cinji co cose cono cinojeye citicimizwe, na hono yunji yejelele du yasole, moleta magayo no wongomele mu nghambi ye Waisilayeli.

¹⁹ Kanyhi cinhu co cose cono cinozezwe fweza, hamba zahabu, hamba shaba, hamba ca cuma, vivyo, vyelile so Muwaha Mulungu. Vinojeye viwikwe mu viwutwa vyo Muwaha Mulungu.”

²⁰ Hobaho i wakohani wakatowa zi ndulele. Nawo wanhu wali weza kuzihulika du zi ndulele, wakazoza muno muno, ne majinji ga Yeliko gakawa kugwa. Lulo lulo lipuga lyose lye wasilikale, likamangha musunho likukola mucanyha ye malowanjila ge majinji. Wakenjila mwi'kaya no kuliteka.

²¹ Wakawawulaga wanhu wose kwe mimaje, walume ne we cicekulu, wadodo ne wakombi sunga ne zimitugo, zingholo ne zindogowe ne zing'ombe.

²² Hanyuma Yoshuwa yakawa kuwalonjela wawalya wejete i watandizi, yakawatya, “Alu mwinjile mu nyumba ya Lahabu u musenyha, mumulete mwene hamonga ne wanduguze, nha vyono mwamwihuwiza.”

²³ Hobaho wakenjila no kumuleta Lahabu kudeha, hamonga no sogwe, no nyina, ne wanduguze wose, wa mu mhuga yakwe. Wakawasola wose, Lahabu ne mhuga yakwe yose, hamonga ne wetumami wawo wose, wakawawika wapolile behi ne nghambi ye Waisilayeli.

²⁴ Hanyuma wakawa kulipembela moto likaya, wakaliticimiziza lukulu lyose, hamonga ne vinhu vyose vyono vyali vili mumo. Langa i vinhu vyono vyali vinozezwe zahabu, fweza ne shaba hamonga na vye cuma, avyo wakavisola no kuviwika mu ciwutwa co Muwaha Mulungu.

²⁵ Langa Yoshuwa yakamuponya Lahabu u mucekulu musenyha, hamonga ne wanduguze wose, vyono mwene yakawahundika i watandizi wejete, wono mwene Yoshuwa yawatuma ku Yeliko. (No lulelo lwa Lahabu, wanji wakali wasigaye mu yisi ya Isilayeli sunga nalu.)

²⁶ Lulo Yoshuwa yakawelahiza, yakawatya, “Munhu wo wose mono kokwijelela yalizenje kanyhi likaya lya Yeliko, kowa mulijitwe hali Muwaha Mulungu. No munhu wo wose mono kokwijelela yawice musinji wayo, kofwilwa no mwanagwe mulongozi kulelwa.” No munhu wo wose mono kokwijelela yawicile malango gayo, kofwilwa no mwanagwe u muziwanda.

²⁷ Muwaha Mulungu yakawa hamonga na Yoshuwa. No lukumyo lwa Yoshuwa lukamanyika mu yisi yose.