Yoshuwa 5 - Luganuzi Luswanu Kuli Wanhu Wose 2002

¹ Nawo i watemi wose we Waamoli wa ku lubavu lwa kumwezi ya Yoludani, ne watemi wose we Cikanani, wono wekalaga mu mwalambalo we lilenga lya Meditelaneya, wali weza kuhulika nha vyono Muwaha Mulungu yalinyaza likolongo lya Yoludani, sunga i Waisilayeli wose wakalowoka hakavu. Hobaho wakenjilwa no woga wuwaha muno mu zinhumbula zawo ku soko ye Waisilayeli.

Calamo ca ku Giligali

² Hanyuma Muwaha Mulungu yakamulonjela Yoshuwa yakamutya, “Alu wunoze mimaje ye mabwe makavu, wuwategule lwe kejete kanyhi ku calamo Waisilayeli.”

³ Baho Yoshuwa yaketuma nha vyono Muwaha Mulungu yakamulajiliza, yakawategulila ku calamo Waisilayeli, i hanhu hono hacemwaga Gibeya-hayalaloti, (nhunizo yayo, “Citunda ce Calamo”).

⁴ Ninga wanhu Waisilayeli lono watulucila ku Misili, we cilume wose wali wakondya kwalama. Ninga hamba nhavivyo, mumulya mu muhinzo wa myaka makumi mane, yono wetumamila ku wulowoka mu nyika, wana wawo wose we cilume wono walelelwaga mu nzila, kwali kusina hamba monga mono yalame.

⁵ Hamonga na yiyo i wanhu mututu wono wali wawikanizwe so wulugu, lono wawucila ku Misili, wenji wali wakondya kufwa soko vyono wamubezaga Muwaha Mulungu.

⁶ Nha vyono Muwaha Mulungu yakelahiza vyono, sikolowakombolela lukulu wenjile mu yisi yiyo, yono yina wugoli no moso so vilimwa, nha vyono yali yawehuwiza i walezi wawo.

⁷ Alu i wana wawo we cilume, wali wakali sinalama. Holeka Yoshuwa yakawategula ku calamo, i wana we cilume wose wono walelelwa mu nzila. Na wawo wakawa lyo yikungugo yipya lyono Yoshuwa yalitegula ku calamo.

⁸ Ne calamo cali ceza kukondya, i nghungugo yose yikekala baho ha nghambi yiyo, sunga lono vilonda vikawa vyanoga.

⁹ Muwaha Mulungu yakamulonjela Yoshuwa yakamutya, “Zuwali, nakondya kumuwusizenyi cevu co wuwanda wenyu wa ku Misili.” Holeka i hanhu baho, hakacemwa “Giligali” nhunizo yayo “Wuwuse”, sunga nalu.

¹⁰ Na lono Waisilayeli wali wasimizye nghambi baho ha Giligali, mu yisi yo wuhihi ye behi na Yeliko, wakayinoza Pasaka mu vipango vye cinyamihe vya mwi'zuwa lye likumi na yine lya mu mwezi.

¹¹ Na mwizuwa lye kejete, lyali lyo lizuwa lilongozi, lyono walila zindigwa zono zikulawa mu yisi ya Kanani, wuhemba wono wukalinjigwe, hamonga ne mikate yono yisina cisase.

¹² Ne ndigwa ye mana, hobaho nayo yikaleka kulagala mwi'zuwa lilyo lye kejete, lyono walila zindigwa zono zikulawa mu yisi ya Kanani. Nawo Waisilayeli siwayituga mana kanyhi ku wulawa mwi'zuwa lilyo. Na mu wulawilila mwizuwa lilyo wakajendelela kulya du zindigwa za mu yisi ya Kanani mu mwaka wuwo.

Yoshuwa no munhu mono yali yena limaje

¹³ Na lono Yoshuwa yali yasejelela ha Yeliko, yakawona munhu nhinicizo, yemile ha mwande yakwe, yebate ne limaje. Yoshuwa yakamusejelela yakamuwuza yakamutya, “Agwe wuli lubavu lwetu, hamba wuli mulugu wetu?”

¹⁴ Nayo munhu yuyulya yakamupitula yakatya, “Aa! Ng'o. Ane niza, ho niwe citung'ati wo kulilongoza lipuga lye wasilikale wo wulugu lyo Muwaha Mulungu.” Yoshuwa yakafugama, no wusu wakwe wukapamiza ho hasi, yakahemba. Hanyuma yakamutya, “Gwe muwaha, ane nili mwitumami wako, alu wukuhila nitumeci?”

¹⁵ Citung'ati yu yulya we lipuga lye wasilikale wo wulugu lyo Muwaha Mulungu, yakamutya, “Yoshuwa vule malatu mu magulu gako, hambi baho hono wimile nhe helile.” Nayo Yoshuwa yaketuma nha vyono yalonjelwa.