Yoshuwa 23 - Luganuzi Luswanu Kuli Wanhu Wose 2002

Zinghani za Yoshuwa zo wilaje wakwe

¹ Vilo vinji vikapuluta, vyono Muwaha Mulungu yali yawapelile Isilayeli wucehe no mulamu, kuli walugu wawo wono wali wawapilime. Na mu vilo vivyo, Yoshuwa yali yakombipa muno muno.

² Baho Yoshuwa yakawakonghola Waisilayeli wose, i wawaha wawo, hamonga ne walongola, ne wahakimu, hamonga na wose wono wena wulajilize muli wanhu, yakawatya, “Alu ane nakombipa muno muno.

³ Nanye mwakondya kuziwona zose zono Muwaha Mulungu, u Mulungu wenyu, yawatendela i makungugo gaga gose ku soko yenyu. Hambi u Muwaha Mulungu, u Mulungu wenyu, nha yo yamulewelenyi 'nye.

⁴ Nane nakondya kumugawilenyi yisi mu milango yenyu wose, yisi yono ne zinghungugo zinji zikali zikaye mumo, hamonga ne yisi ye zinghungugo zose zono nakondya kuzisuma. Ku wulawilila kwi 'kolongo lya Yoludani kulubavu lwa kucilima, sunga ko kwi'lenga lya Meditelaneya, lubavu lwa kumwezi.

⁵ U Muwaha Mulungu, u Mulungu wenyu, kowalavyaniza kwe vilungo hali 'nye, kanyhi kowawinga ha mwande yenyu mu nghango ya vyono mowa kucila kwinjila, no kuyitema yisi yawo. Nanye moyisola yisi yawo nha vyono Muwaha Mulungu wenyu yamwihuwizenyi.

⁶ Holeka mulanjilile, mwitume zose zono zandicigwe mu citabu co Wulajilize wa Musa. Mulece kuyileka nghani hamba monga.

⁷ Kanyhi mulece kuhangahanga ne makungugo ge wanhu wono wasigaye mumo, hamba mulece kutambula ne matagwa ge milungu yawo, hamba kwilahiziza mu matagwa gago, hamba kuyihemba milungu yiyo, hamba kuyifugamila.

⁸ Langa 'nye mweze wehuwilwa kuli Muwaha Mulungu, u Mulungu wenyu, nha vyono muli wehuwilwa sunga nalulu.

⁹ Na munghango yono mukacila kwinjila mu yisi, nayo Muwaha Mulungu vyo yakacila kugawinga ku mwande yenyu, makungugo mawaha, kanyhi gono gali vilungo, hamba hasina yunji kanyhi mono yasuma kwima hamwande yenyu.

¹⁰ No munhu yumonga wa muli nyenye, kosuma kuwawinga wanhu elufu monga. Hambi Muwaha Mulungu, u Mulungu wenyu, nha yo yakumulewelenyi, nha vyono yehuwiza.

¹¹ Holeka mwilanjililaje, nanye mumwende Muwaha Mulungu, u Mulungu wenyu.

¹² Langa hono muwuye ne nyuma, no kwilunza ne zinghungugo zono zikali zisigaye muli'nye, no kwanza kwitolanila nazo,

¹³ ale, mumanye manyimanyi vyono, u Muwaha Mulungu, u Mulungu wenyu, sikoziwinga kanyhi zinghungugo zizi, hamba muwe mukwinjila mu'si yawo. Langa wowa mbali hali'nye, hambi nha wowa nha mutego kuli'nye, hamba kotya yikombo. Kanyhi wowa nha mukotya, wukukuna mu migongo yenyu, hamba mamiya gono gakucinya mu meso genyu. Na zizi sizoduma, sunga kolo anye wose mwakondya kwajililila lukulu, mweza muli musina mu yisi yiyino swanu, yono Muwaha Mulungu, u Mulungu wenyu, yamupelenyi.

¹⁴ “Lanjenyi ta, alu lipango lyangu lyo kufwa lyafika. Nanye mumanyile wose mu mitima na mu myuhe yenyu, vyono hasina cinhu cinji co cose, ce ziswanu zose, zono yehuwiza Muwaha Mulungu, u Mulungu wenyu, cono cicepuce. Wihuwizo wakwe wose nha waficilicila. Hasina hamba nghani yono yicepuce.

¹⁵ Holeka nha vyono mwene u Muwaha Mulungu, u Mulungu wenyu, yasuma kuwukamisa wihuwizo wakwe wono yamwihuwizenyi, nhavivyo kanyhi vyo komufisilizizenyi izimbi zose.

¹⁶ Hono mulece kukamisa cilagane cono u Muwaha Mulungu, u Mulungu wenyu, yamulajilizenyi mucikamise. Na hono muyitumamile no kuyihemba milungu yinji, komulipicizizenyi mwi'kuwo lyakwe, nanye wose mokwajilila mbela ku wulawa mu yisi yiyi swanu, yono Muwaha Mulungu yamupelenyi.”