Yoshuwa 21 - Luganuzi Luswanu Kuli Wanhu Wose 2002

Makaya ge Walawi

¹ Ale, nawo i walongola we zimhuga ze Walawi, wakamubitila Eleyezali Mukohani, na Yoshuwa u mwana wa Nuni, na kuli walongola wose we zimhuga ze milango yose ye Waisilayeli.

² Wakalongana nawo bahalya ha Shilo mu yisi ya Kanani wakawatya, “U Muwaha Mulungu yalajiliziza muli Musa, vyono, yicinojeye nase cipegwe makaya gono cowa kwikala, hamonga no wudimilo we mitugo zetu, behi ne makaya getu.”

³ Hobaho Waisilayeli, wakawapela Walawi makaya go wuhazi wawo ho wekale mumo. Wakawapela hamonga no wudimilo we mitugo zawo, wulawa mu yisi yawo, nha vyono Muwaha Mulungu yali yalajilize.

⁴ Ale baho, wo lulelo lwe Wakohati, wa mu mhuga ye Walawi, wali wo walongozi kupegwa makaya gawo. Nawo we zimhuga ze wana wa Haluni mukohani, wakapegwa makaya yikumi na madatu, gono galawa mu yisi ya Yuda, na ya Simiyoni na ya Benyamini.

⁵ Nawo wanji wono wali wakali wasigaye, wa mu mhuga ye Wakohati, nawo wakapegwa makaya yikumi, ga mu yisi yo wo mulango wa Efulayimu, na wa Dani, na ga we nusu ya Wamanase wo lubavu lwa kumwezi.

⁶ Nawo wana wa Gelishoni wakapegwa makaya yikumi na madatu, ga mu yisi yo wo mulango wa Isakali na ya Asheli, na ya Nafutali, na ya Wamanase wa ku lubavu lwa kucilima.

⁷ Nawo we zimhuga ze wana wa Melali, wakapegwa makaya yikumi na mejete ga mu yisi yo wo mulango wa Lubeni, na ya Gadi na ya Zabuloni.

⁸ Waisilayeli, wawagawila Walawi makaya gago, hamonga no wudimilo we mitugo zawo, mu nzila yo kutowa kula, nha vyono Muwaha Mulungu yali yalajilize muli Musa.

⁹ Aga go matagwa ge makaya, ga muli makaya ga mu yisi yo wo mulango wa Yuda, na wa Simiyoni, gono wapegwa,

¹⁰ i wana wa Haluni, wono wali wo we mhuga ye Wakohati, wono wali wo wana wa Lawi. Wali wo walongozi kupegwa ligawo lyawo.

¹¹ Wakapegwa likaya lya Aleba (Aleba yali yo sogwe wa Anaki), ninga alu likucemwa Hebuloni, mu yisi ye matunda ya Yuda, hamonga ne mawimbi gono gayipilime go wudimilo we mitugo zawo.

¹² Hamba nhavivyo i migunda ya mwi'kaya, hamonga ne matumbi gayo, vyali vyakondya kugawilwa Kalebi u mwana wa Yefune, wuwe wo wuhazi wakwe.

¹³ Nawo wana wa Haluni mukohani, wakapegwa likaya lya Hebuloni, (Hebuloni lyali limonga lya mu makaya go wutizizo) hamonga ne makaya gono gatyatizye: Libina,

¹⁴ Yatili, Eshitemowa,

¹⁵ Holoni, Debili

¹⁶ Ayini, Yuta, na Bete Shemeshi hamonga no wudimilo we mitugo zawo. Aga makaya yicenda, gali ga muli makaya ga mu yisi yo wo mulango wa Yuda na wa Simiyoni.

¹⁷ Wakawonjeleza kanyhi makaya mane, mu wulawa mu yisi yo wo mulango wa Benyamini, Gibeyoni, Geba, Anatoti na

¹⁸ Alimoni, hamonga no wudimilo.

¹⁹ Holeka gose hamonga, gakawa makaya yikumi na madatu, gono wapegwa wakohani i wana wa Haluni, hamonga no wudimilo we mitugo zawo.

²⁰ Nawo wanji wa mu mhuga ye walawi i wana wa Kohati, wakapegwa makaya ganji gono gali gali mu yisi yono yali ya Efulayimu.

²¹ Wakapegwa makaya mane, nago goga: Shekemu, hamonga no wudimilo, mu yisi ye matunda ya Efulayimu, limonga lya muli makaya go wutizizo, hamonga na Gezeli,

²² na Kibizayimu na Bete Holoni, hamonga no wudimilo.

²³ Kanyhi wakapegwa makaya mane mu wulawa mu yisi ya Dani, nago goga: Eleteke, na Gibetoni,

²⁴ Ayaloni, na Gati limoni hamonga no wudimilo.

²⁵ Na mu yisi ya Wamanase wo lubavu lwa kumwezi, nako wakapegwa makaya mejete. Tanaki na Gati-limoni hamonga no wudimilo.

²⁶ Mhuga zizi ze wana wa Kohati, wakapegwa makaya yikumi, hamonga no wudimilo we mitugo zawo.

²⁷ Mhuga yinji nayo ye Walawi ye wana wa Gelishoni, wapegwa makaya mejete, wulawa mu yisi ye wana wa Manase wa ku lubavu lwa kucilima, nago goga: Golani ya ku Bashani likaya lyo wutizizo, na Be-eshitela, hamonga no wudimilo we mitugo zawo.

²⁸ Na mu wulawa mu yisi ya Isakali, nako wakapegwa makaya mane, nago goga: Cishiyoni, Dabelati,

²⁹ na Yalemuti na Ene-ganimu, hamonga no wudimilo we mitugo zawo.

³⁰ Na mu wulawa mu yisi ya Asheli, wakapegwa makaya mane, nago goga: Mishali, na Abidoni,

³¹ na Helekati na Lehobu, hamonga no wudimilo we mitugo zawo.

³² Na mu wulawa mu yisi ya Nafutali, wakapegwa makaya madatu, nago goga: Kedeshi ya ku Galilaya, likaya lyo wutizizo, hamonga no wudimilo, na Hamoti-doli, na Katani, hamonga no wudimilo wayo.

³³ Mhuga zose hamonga za mu wana wa Gelishoni, zapegwa makaya yikumi na madatu, hamonga no wudimilo wayo.

³⁴ Ne zimhuga ze Walawi zono zali zikali zisigaye ze wana wa Melali, nazo zikapegwa makaya mane mu wulawa mu yisi ya Zabuloni, nago goga: Yocineyamu, na Kalita,

³⁵ na Dimina na Nahalali hamonga no wudimilo we mitugo zawo.

³⁶ Mu wulawa mu yisi ya Lubeni, wakapegwa makaya mane, nago goga: Bezeli, na Yahazi,

³⁷ Kedemoti, na Mefati, hamonga ne mawimbi gayo go wudimilo we mitugo zawo.

³⁸ Na mu wulawa mu yisi ya Gadi, wakapegwa makaya mane, nago goga: Lamoti, ya mu Gileyadi likaya lyo wutizizo hamonga no wudimilo we mitugo zawo. Na Mahanayimu,

³⁹ Heshiboni na Yazeli hamonga no wudimilo we mitugo zawo.

⁴⁰ Ale, wose wa mu wana wa Melali, wapegwa makaya yikumi na mejete hamonga no wudimilo we mitugo zawo.

⁴¹ I Walawi wakapegwa makaya makumi mane na munana hamonga no wudimilo we mitugo zawo,

⁴² mu wulawa mu yisi yose yono Waisilayeli wali wapegwa nha wuhazi wawo.

Waisilayeli wakuyisola yisi no kuyitema

⁴³ Nha vivyo, Muwaha Mulungu vyo yakawapela Waisilayeli yisi yose, yono yali yawelahiza i walezi wawo, vyono kowapela. Nawo waza kuwa wayisola no kuyitema, wakekala mumo.

⁴⁴ U Muwaha Mulungu yakawapela mulamu mu yisi yiyilya yose, nha vyono yali yelahize kuli walezi wawo. Hakawa hasina mulugu wawo hamba monga, mono yasuma kuwogofya kanyhi. Hambi Muwaha Mulungu, nha yali yakondya kuwapela Waisilayeli wusume, kuli walugu wawo wose,

⁴⁵ u Muwaha Mulungu yakawukamisa wihuwizo wakwe wose, wono yawehuwiza Waisilayeli, zose zikafisilizwa du nha vyono yehuwiza.