Yoshuwa 20 - Luganuzi Luswanu Kuli Wanhu Wose 2002

Makaya go wutizizo

¹ Hanyuma Muwaha Mulungu yakamulonjela Yoshuwa,

² yawalonjele wana Waisilayeli yatye “Alu, muhagule makaya go wutizizo nha vyono namulajiliza Musa yamulonjelenyi.

³ Hono munhu wo wose mono komuwulaga muyagwe mhalanyuka, yasume kutiziza mumo, ho yeponye mu mawoko go munhu mono yakumulondola ho yamulipicize.

⁴ Ale yadahile kutiziza mwi'kaya limonga lya muli makaya gago, no kwima mwi'lango lye likaya, ha mwande ye wanyamhala, nayo kolavya nghani zono zamwijelela ha mwande ye wanyamhala. Nawo ho womukombola yenjile mwi'kaya wamupele ne hanhu ho kwikala, ho yasume kwikala mumo.

⁵ Na hono yu yulya munhu yamutyatye ho yamulipicize, wanhu wa mwi'kaya lilyo, walece kumukombola muwulaji kuli munhu yuyo. Langa yiwanojeye wamudime, hambi nha kawulaga mhalanyuka du, hamba si kwe 'kuwo yaye.

⁶ Kanyhi yajendelele kwikala mwi'kaya, sunga kolo yakuletwa hamwande ye wanhu wose, ho yaling'anizwe, sunga ku wufwe wo Mukohani Muwaha wa mu vilo vivyo. Hobaho munhu yuyo ho kokombolwa yawuye kanyhi kwawo kwi'tumbi lyakwe kono yatiza ha mwamulizo.”

⁷ Hobaho wakagawagula makaya go lubavu lwa kumwezi ya Yoludani. Wakagawagula makaya ga, Kedeshi ya ku Galilaya, mu yisi ye matunda ya Nafutali, na Shekemu mu yisi ye matunda ya Efulayimu, na Hebuloni mu yisi ye matunda ya Yuda.

⁸ Lubavu lwa kucilima lwa Yoludani mu nyika ya ku cilima ya ku Yeliko, wakagawagula makaya ga, Bezeli ya mu yisi ya Lubeni, na Lamoti ya mu Gileyadi, mu yisi ya Gadi, na Golani ya ku Bashani, mu yisi ya Manase.

⁹ Aga gali go makaya go wutizizo, gono gawagulwa ne wanhu wose Waisilayeli, na kuli wajenzi wose wono wali wekaye hamonga nawo. Ho munhu wo wose mono yamuwulaga muyagwe kwa mhalanyuka, yasume kutuga ha wutizizo kuli munhu mono yakumulondola kumulipiciza. Nayo yalece kuwulagwa, sunga kolo yakondya kwima calinze ha wuling'anizi.