Yoshuwa 2 - Luganuzi Luswanu Kuli Wanhu Wose 2002

Yoshuwa yakuwatuma i watandizi ku Yeliko

¹ Baho Yoshuwa mwana wa Nuni, yakawatuma watandizi wejete ku wulawilila baho ha nghambi ya Shitimu, ho wabite cinyele wakayitandile yisi ya Kanani, na ko muno likaya lya Yeliko. Nawo wali weza kufika mwi 'kaya, wakenjila mu nyumba yo mucekulu musenyha, mono yacemwaga Lahabu, wakagona baho.

² Nayo mutemi wa Yeliko yakahulika vyono Waisilayeli wanji waza baho cinyele mu cilo cico, ho wayitandile yisi.

³ Hobaho mutemi wa Yeliko yakatuma wanhu kuli Lahabu, yakamutya, “I wanhu wono wali mu nyumba yako, waza cinyele ho wayitandile yisi yetu yose! Alu wuwalavyanizaje kononze!”

⁴ Nayo Lahabu yakawapitula yakawatya, “Heya mbeka, wanhu wanji we cilume, wenjila mu nyumba yangu. Langa simanyile na kono walawile,

⁵ kanyhi wanhu wawa wawuka lono ne lizuwa lyali likali nagwila, na lono lilango lye likaya lyali likali nadindwa, nane hamba si niwawene na kono wabitile, ninga nitumbiye hono mujele kuwatyatya, mowebata mbela du.”

⁶ Ninga mwene Lahabu, yali yakondya kuwahundika mucanyha ye litembe lye nyumba yakwe, mu madulu ge mabeleje ge citani, gono yali yagalundice mumo mwi'tembe.

⁷ Ale, i wanhu wono watumwa no mutemi, wakawa kutuluka, wakawa kulawila kunze ye likaya, lilango lye likaya likawa kudindwa. Wakawa kubita, akuno wakuwalondola Waisilayeli wawalya i watandizi, sunga wakatang'aniza balabala yono yilowoce likolongo lya Yoludani.

⁸ Na lono i watandizi wawa wali wakali newikaniza ho wagone, Lahabu yakawabitila kuko mwi'tembe,

⁹ yakawalonjela yakawatya, “Ane nakondya kumanya nha vyono Muwaha Mulungu yakondya kumupenyi yisi yiyino. Hambi woga wuwaha nha wakondya kuwenjila wanhu wose wa mono yisi yiyi ku soko yenyu.

¹⁰ Hambi nha cahulika vyono Muwaha Mulungu, yalitemanula lilenga lya Shamu hamwande yenyu, mukakola hakavu, lono mwawucila ku Misili. Kanyhi cakondya kuhulika vyono mwawawulaga i watemi wejete we Waamoli, mutemi Sihoni no mutemi Ogu, wa kulubavu lwa kucilima ye likolongo lya Yoludani.

¹¹ Mbeka, caza kuzihulika zizi, cikogopa muno. Cikawa kudejepa, cikawula ne vilungo ku soko yenyu. U Muwaha Mulungu, u Mulungu wenyu, yo Mulungu wa ku wulanga kucanyha, na mono yinze yose.

¹² Holeka nghumunenenyi munyilahize kuli yuyo Mulungu wenyu, nha vyono moyitendela ziswanu mhuga yangu, nha vyono nane nimutendelenyi nyenye. Kanyhi mumhelaje ne citanjilo, cono conoza nane ho nimwitumbilenyi.

¹³ Kanyhi munyilahile nha vyono, mowaleka womi wa yaya na baba, ne wandugu zangu we cilume na we cicekulu, hamonga ne zimhuga zawo! Dedede, nhondo mulece kucileceleza ciwulagwe.”

¹⁴ Nawo wanhu wawalya wakamutya Lahabu. U Muwaha Mulungu, nhondo yaciwusize u wumi wetu, hono cilece kwituma nha vyono wulonjile! Hono nagwe wulece kumulonjela munhu wo wose zono cizize kwituma baha, cikukwilahila vyono u Muwaha Mulungu kolo yacipela yisi yiyi, nase cokutendela ziswanu.

¹⁵ Lahabu yekalaga mu nyumba yono yali yizenjigwe mugati ye lijinji lye ligomawakali lye likaya. Holeka yakawakoza wanhu wawo mwidilisha, yakawatimizya hasi ko mulejehe.

¹⁶ Baho Lahabu yakawatya, “Ale mubite mu matunda mukehundice kuko vilo vidatu, sunga kolo walemwa kumuwonenyi, baho nanye ho mojendelela no muhinzo wenyu.”

¹⁷ Nawo wanhu wawalya we cilume wakamutya Lahabu, “Nase cowukamisa muno muno wihuwizo wetu wono cikwihuwize.

¹⁸ Nase kolo cenjila, ceza kuyihoma yisi yiyi, cikukulomba nhondo wuwope mulejehe awu mudunghu he 'dilisha lyono wucikozize. Wasolaje ne walezi wako, hamonga ne wanduguzo ne mhuga yose yo Sogo, wuwakongholele wose hamonga, na wose muwe mumuno mu nyumba yako.

¹⁹ Nase kolo cikwinjila mu yisi yenyu, na hono yunji yalawile kunze ye nyumba yako, lifwa lyakwe lyowa nghani yakwe mweneco, ase cowa cisina yisutya muli munhu yuyo. Langa yunji wo wose wa muli wono wina nawo mu nyumba yako hono yatamiswe, yisutya lilyo langa lyowa muli sese.

²⁰ Ninga hamba nhavivyo kanyhi, nagwe hono wumulonjele yunji wowose zono cizize kwituma, nase sicosuma kuwibata wihuwizo wono cikwihuwize yaye.”

²¹ Lahabu yakavumila, hobaho yakawa kuwakombola, wakawa kutuluka. Nawo wali weza kutuluka du, Lahabu yakawusola wu wulya mulejehe mudunghu, yakawa kuwuwopa he 'dilisha lililya.

²² Nawo i watandizi wawalya, wakawa kubita mu matunda wakawa kwihundika. I wanhu wo mutemi, wawatyatilila mu zinzila zose, akuno wakuwalondola, vilo vidatu, ninga hamba si wawawona yaye, hodu wakawa kuwuya ku Yeliko.

²³ Hanyuma watandizi wawalya wejete, wakatima wulawa mu matunda, wakalowoka likolongo, wakawa kuwuya kuli Yoshuwa mwana wa Nuni. Nawo wakamulonjela Yoshuwa zose zono zawejelela kuko.

²⁴ Wakatya, “Mbeka cina witumbilo vyono Muwaha Mulungu yakondya kucipela yisi yiyilya yose. Hambi i wanhu wose wa mu yisi yiyo, nha wakucicima, kanyhi wakucogopa muno muno.”