Yoshuwa 19 - Luganuzi Luswanu Kuli Wanhu Wose 2002

Yisi yono yapegwa Simiyoni

¹ Ligawo lye kejete lyono lyawagwa, lyali lya wo lulelo lwe zimhuga zo mulango wa Simiyoni. Yisi yawo yikawa yinjiye sunga na mu wutemi we yisi ya wo mulango wa Yuda.

² Yikahanguliza makaya aga, Beli Sheba, Sheba, Molada,

³ Hazali Shuwali, Bala, Ezemu.

⁴ Elitoladi, Betuli, Holema,

⁵ Zikilaji, Bete-makaboti, Hazalisusa,

⁶ Betelebayoti na Shaluheni. Gose hamonga gali makaya yikumi na madatu, hamonga ne matumbi gono gali gagapilime.

⁷ Kanyhi hakawa hogali makaya ga Ayini, Limoni, Eteli na Ashani. Makaya mane hamonga ne matumbi gono gali gagapilime.

⁸ Yikahanguliza ne matumbi gose gono gali gagapilime makaya gago, sunga ko ku Balati-beli (wo wutya Lama) ya kutakama. Ayi yali yo yisi yono wapegwa we zimhuga zo wo mulango wa Simiyoni, yiwe wo wuhazi wawo.

⁹ Na vyono ligawo lye wana wa Yuda lyali yiwaha, kuciza nha vyono lyasakwaga liwe, holeka hakadumulwa lubavu lunji, wakapegwa kanyhi wo mulango wa Simiyoni.

Yisi yono yapegwa Zabuloni

¹⁰ Ligawo lye kadatu lyono lyawagwa, lyali lya wo lulelo lwa we zimhuga zo wo mulango wa Zabuloni. Ne yisi yono wagawilwa, mupaka wayo wali wuficile sunga ko ku Salidi.

¹¹ Walawilila Salidi, wukakolela lubavu lwa kumwezi sunga Malala, wukapamiza ha Dabaheti, ku cikolongo ca ku lubavu lwa kucilima ye Yokeneyamu.

¹² Na ku wulawilila ku lubavu luyagwe lwa Salidi, wukabita ku lubavu lwa kucilima sunga ko ku mupaka wa Cishiloti-taboli, hanyuma ku Debela, sunga ko ku Yafiya.

¹³ Wukajendelela ku lubavu lwa kucilima, sunga ko ku Gatihafeli na Etekazini. Kanyhi wukawuya ne nyuma, wukalanga ku Neya, nzila yono yibitile ku Limoni.

¹⁴ Nako ku lubavu lwa kusumuka, mupaka wukalanga ku Hanatoni, wukadumila mwi'lolo lya Ifitaheli.

¹⁵ Wukahanguliza makaya aga: Kata, Nahalali, Shimiloni, Idala na Betelehemu. Gose hamonga, gali Makaya yikumi na mejete, hamonga ne matumbi gono gali gagapilime.

¹⁶ Makaya ne matumbi gaga, gali gali mu yisi yono we zimhuga zo wo mulango wa Zabuloni, wapegwa yiwe wo wuhazi wawo.

Yisi yono yapegwa Isakali

¹⁷ Ligawo lye kane lyono lyawagwa, lyali lye zimhuga zo wo mulango wa Isakali.

¹⁸ Mupaka wawo wukawa wina makaya aga: Yezeleli, Cesuloti, Shunemu,

¹⁹ na Hafalayimu, Shiyoni, Anahalati,

²⁰ Na Labiti, Cishiyoni, Ebezi,

²¹ Lemeti, Ene-ganimu, Ene-hada na Bete-pazezi.

²² Mupaka wukafika ko ku Taboli, na Shahazuma na Bete Shemeshi, wukadumiliziza ha Yoludani. Wukahanguliza makaya yikumi na mutandatu, hamonga ne matumbi gose gono gali gagapilime.

²³ Makaya ne matumbi gaga, gali gali mu yisi yono we zimhuga za wo mulango wa Isakali wapegwa yiwe wo wuhazi wawo.

Yisi yono yapegwa Asheli

²⁴ Ligawo lye hano lyono lyawagwa, lyali lye zimhuga zo wo mulango wa Asheli.

²⁵ U mupaka wayo, wukahanguliza makaya aga: Helekati, Hali, na Beteni, Acisafu.

²⁶ Alameleki, Amadi na Mishali, kulubavu lwa kumwezi, wukafika Kalimeli na Shiholi-libinati.

²⁷ Na ku lubavu lwa kucilima, wukajendelela sunga ha Bete-dagoni, wukapamiza likaya lya Zabuloni ne lilolo lya Ifitaheli, mu nzila yono yidomile kusumuka, sunga ko ku Beti-emeki na Neyeli. Wukajendelela kusumuka, sunga wukafika Kabuli,

²⁸ Ebeloni, Lehobu, Hamoni, na Kana, wukajendelela sunga ko ku Sidoni.

²⁹ Kanyhi mupaka wawo wukapitucila ku Lama, wukafika kwi 'kaya lilya lye ligomawakali lya Tulo, kanyhi wukapitucila ku Hosa, no kudumiliziza he 'lenga lya Meditelaneya. Wukahanguliza na Mahalabi na Acizibu,

³⁰ Uma, Afeki na Lehobu. Makaya makumi mejete na mejete, hamonga ne matumbi gose gono gali gagapilime.

³¹ Makaya ne matumbi gose, gali gali mu yisi yono we zimhuga zo wo mulango wa Asheli, wapegwa wuwe wo wuhazi wawo.

Yisi yono yapegwa Nafutali

³² Ligawo lyo mutandatu lyono lyawagwa, lyali lya we zimhuga zo wo mulango wa Nafutali.

³³ Mupaka wayo, wukalawilila ku Helefu, sunga ku mubici wo munghola wono wali wuli ku Zananimu, sunga Adaminekebu na ku Jabineli, wukawa kujendelela sunga ko ku Lakumu, nawo wukadumiliziza mwikolongo lya Yoludani.

³⁴ Baho kanyhi, mupaka wukapitucila ku lubavu lwa ku mwezi, sunga ko ku Azinoti-taboli, na ku wulawilila kuko, wukajendelela sunga Hukoke, wukawa kwitang'anila no mupaka wa Zabuloni ku lubavu lwa kutakama. Wukaza sunga ku yisi ya Asheli, ku lubavu lwa kumwezi, nayo Yoludani yikawa ku lubavu lwa kucilima.

³⁵ Makaya ge magomawakali, gali aga, Zidimu, Zeli, na Hamati, Lakati, Cineleti,

³⁶ Adama, Lama, Hazoli,

³⁷ Kedeshi, Edeleyi, Ene-hazoli,

³⁸ na Iloni, Migidaleli, Holema, Bete-anati, na Bete Shemeshi, makaya yikumi ne 'cenda, hamonga ne matumbi gono gali gagapilime.

³⁹ Makaya ne matumbi gago gose, gali mu yisi yono we zimhuga zo wo mulango wa Nafutali wapegwa, wuwe wo wuhazi wawo.

Yisi yono yapegwa Dani

⁴⁰ Ligawo lyo mupunghati lyono lyawagwa, lyali lya we zimhuga za wo mulango wa Dani.

⁴¹ Mupaka wayo wukahanguliza makaya aga: Zola, Ashitayoli, Ili-shemeshi,

⁴² Salabimu, Ayaloni, Itila

⁴³ Eloni, Timina, Ekiloni,

⁴⁴ Eleteke, Gibetoni na Balati,

⁴⁵ Yehudi, Benebelake, Gatilimoni,

⁴⁶ Mejakoni, na Lakoni, hamonga ne yisi yono yipilime Yopa.

⁴⁷ Na lono wana wa Dani wali wayileka yisi yawo, wakabita ku Lishemu wakayihoma. Wakasuma no kuwawulaga wanhu wose wono wali wekaye mumo, wakayiteka yikawa yawo. Wakayitema, no kulikawaniza litagwa lye likaya lya Lishemu, wakalicemela Dani. Walicemela litagwa lyo sogo yawo Dani.

⁴⁸ Makaya gaga ne matumbi gaga gose, gali gali mu yisi yono wo lulelo lwe zimhuga zo wo mulango wa Dani, wapegwa wuwe wo wuhazi wawo.

Wudumilize wo wugawe we yisi

⁴⁹ Lono wanhu Waisilayeli, wali weza kukondya kugawana yisi, wakamugawila nayo Yoshuwa u mwana wa Nuni hanhu hanji, hawe hakwe.

⁵⁰ Wakamupela Yoshuwa mwana wa Nuni likaya lyono yalisakaga, likaya lya Timunati Sela lya mwi'tunda lya Efulayimu, nha vyono Muwaha Mulungu yali yalajilize. Yakalizenga likaya, yakekala baho.

⁵¹ Mukohani Eleyezali, na Yoshuwa u mwana wa Nuni, hamonga ne walongola wose, we zimhuga za we milango yose ye Waisilayeli, vyo wayigawa yisi ku Shilo ha mulango we Lihema lyono Lyelile, mu nzila yo kutowa kula, hali Muwaha Mulungu. Na mu nzila yiyo, wakawa wakondya mulimo wuwo wo kuyigawa yisi.