Yoshuwa 18 - Luganuzi Luswanu Kuli Wanhu Wose 2002

U wugawe we yisi yono yali yisigaye

¹ Lono mhuga yose ya Isilayeli, waza kuwa wakondya kuyisuma yisi. Waketang'anila ha Shilo, wakalikoma baho Lihema lyono Lyelile.

² Kwali kukali kozili mhuga mupunghati ze wanhu wa Isilayeli, wono wali wakali sinapegwa ligawo lye yisi yawo.

³ Hobaho Yoshuwa yakawalonjela Waisilayeli yakutya, “Alo mocela sunga nili kwinjila, no kuyitema, yisi yono Muwaha Mulungu we walezi wenyu yakondya kumupelenyi?

⁴ Alu, mumhelaje ta wanhu wadatu wadatu, wulawa mu milango yenyu. Nane nowategula mu yisi yiyi yose, ho wakacole lamani ye yisi yono wosaka kuyisola, ho yiwe wuhazi wawo. Hanyuma wawuye kanyhi, waze wanonjele.

⁵ Ne yisi yogawa muli wene mu magawo mupunghati. Wo mulango wa Yuda, awo wokwikala mu yisi yawo yo lubavu lwa kutakama. Nawo wo mulango wa Yusufu, wokwikala mu yisi ya kulubavu lwa kusumuka.

⁶ Ale mwandice wulolose we magawo gago mupunghati, mundetele. Nane nogatowela kula hali Muwaha Mulungu, u Mulungu wetu, i magawo gago mupunghati so nyenye.

⁷ Ninga hamba nhavivyo, i Walawi, siwogawilwa yigawo lyo lyose lye yisi, hamonga nanye mono musigaye. Vyono i ligawo lyawo wene, lyowa lili mu mulimo wawo wo Wukohani wo kumwitumamila Mulungu. Hamba nhavivyo wo mulango wa Gadi, na wa Lubeni hamonga ne nusu ya wo mulango wa Manase, wono wekaye kulubavu lwa kucilima, awo wose wakondya kugawilwa yisi yawo, yo lubavu lwa kucilima ye likolongo lya Yoludani. Yisi yiyilya yono wakondya kupegwa na Musa u mwitumami wo Muwaha Mulungu.”

⁸ Nawo wanhu wawo, lono wali weza kusaka kutuluka, ho wabite ku wucola lamani ye yisi, Yoshuwa yakawa kuwalajiliza yakutya, “Alu, mubite mukayijendele yisi yose mucole lamani, hanyuma ho mumbuyile kanyhi baha ha Shilo. Nane nomutowelenyi kula hali Muwaha Mulungu.”

⁹ Hobaho i wanhu wawo, wakatuluka wakayikolela yisi yose. Hanyuma wakawa kwandika wulolose wawo, nha vyono wayigawile magawo mupunghati nha vyono linha liwalo lye makaya gayo. Hanyuma wakawa kuwuya kuli Yoshuwa ku nghambi ya ku Shilo.

¹⁰ Yoshuwa yakagatowela kula hali Muwaha Mulungu i magawo gago. Hanyuma yakawa kuwawagulila we milango yose ye Waisilayeli yono yali yisigaye, mulango ne 'gawo lyawo lye yisi.

Yisi yono yapegwa Benyamini

¹¹ Wo mulango wa Benyamini, wali wo walongozi kupegwa yisi yawo. Yisi yawo yali yili haciligati ya we milango ya Yuda na Yusufu.

¹² No lubavu lwa kusumuka, u mupaka wawo wali wulawiliye ha Yoludani, wukakolela mu nhenenhuko yo lubavu lwa kusumuka ya Yeliko, na ku lubavu lwa kumwezi, wukakolela mu yisi ye matunda, sunga wukadumiliziza mu nyika ya Betaveni.

¹³ Kanyhi, mupaka wukatenenhucila ku lubavu lwa kutakama ya ku Luzu, (wono wacemwaga Beteli.) Hanyuma wukatimila ku Ataloti-adali, behi ne litunda, lyo lubavu lwa kutakama, ku Bete Holoni ya ku wuhihi.

¹⁴ Kanyhi mupaka wukapilimila ku lubavu lwa kumwezi ye litunda, wukalanga kulubavu lwa kutakama, wukawa kubita sunga ko ku Kiliyati Baali (yo Kiliyati Yeyalimu,) ya wo mulango wa Yuda. Awu wali wo mupaka wawo wa kulubavu lwa kumwezi.

¹⁵ Mupaka wa ku lubavu lwa kutakama, wali wulawiliye mu mwejelele wa Kiliyati Yeyalimu, wukawa kubita sunga ko ku mivwilo ye cikolongo ca Nefetowa.

¹⁶ Kanyhi wukawa kubita sunga ko ku mwalambalo we litunda lyono vyali vidomile ne lilolo lye wana wa Hinomu, ku ndumilizo ya kulubavu lwa kusumuka ye lilolo lye Walefayi. Hanyuma, wukawa kujendelela ku lubavu lwa kutakama, wukakolela mwi'lolo lye wana wa Hinomu, ku lubavu lwa kutakama ku Yebusi, sunga ko ku Enelogeli.

¹⁷ Hanyuma wukapetela ku lubavu lwa kusumuka, sunga ko ku Eneshemeshi, sunga ku Geliloti yono vyali vidomile ne cizila ca ku Adumimu. Mupaka kanyhi, wukatenenhuka sunga kwi'bwe lya Bohani (Bohani yali yo mwana wa Lubeni.)

¹⁸ Wukajendelela sunga ko ku ndumilizo yo lubavu lwa kusumuka yono vidomile ne lilolo lya Yoludani. Hanyuma wukawa kutenenhucila mwi'lolo mugati,

¹⁹ wukoleye ku lubavu lwa kusumuka ye Bete-hojila, wukadumila mwiwoko-woko lye Lilenga lyo Mwino lyono malenga ga Yoludani genjilaga ku lubavu lwa kutakama.

²⁰ Yoludani wali wo mupaka wawo wa ku lubavu lwa kucilima. Ayi yali yo mipaka ye yisi yono wapegwa wa wo zimhuga zo wo mulango wa Benyamini, ho yiwe wuhazi wawo.

²¹ Ne makaya gono gali ge zimhuga zo wo mulango wa Benyamini, gali go aga, Yeliko, Beti Hojila, Emekikezizi,

²² Beti Aleba, Zemalayimu, Beteli,

²³ Avimu, Pala, Ofila,

²⁴ Cefalamoni, Ofini, na Geba. Makaya yikumi na mejete, hamonga ne matumbi gono gali gagapilime.

²⁵ Kanyhi hamonga na Gibeyoni, na Lama, na Beyeloti,

²⁶ Mizipa, Cefila, Moza,

²⁷ Lekemu, Ilipeli, Talala,

²⁸ Zela, Hayelefi, Yebusi, (hamba Yelusalemi,) na Gibeya, hamonga na Kiliyati Yeyalimu. Gose hamonga gali makaya yikumi na mane, hamonga ne matumbi gono gali gagapilime. Ayi yo yisi ye zimhuga zo wo mulango wa Benyamini, yono wapegwa yiwe wo wuhazi wawo.