Yoshuwa 17 - Luganuzi Luswanu Kuli Wanhu Wose 2002

¹ Nusu ye yisi ya kumwezi ya Yoludani, wapegwa wacefu wa mu zimhuga zo mulango we wana wa Manase, u mwana wa Yusufu u mulongozi kulelwa. Macili u sogwe ya Gileyadi, yali mwana wa Manase u mulongozi kulelwa. Kanyhi yali yali citung'ati ku wulugu. Holeka mwene yakapegwa Gileyadi na Bashani, ku lubavu lwa kucilima lwa Yoludani yiwe yakwe.

² Ne yisi ya ku lubavu lwa kumwezi ya Yoludani, wakapegwa zimhuga zinji zono zali zisigaye ze mhuga ya Manase, nawo wo wano, Abiyeza, Heleki, Asiliyeli, Shekemu, Hefeli, na Shemida. Awa wali wo wana wa Manase u mwana wa Yusufu. Kanyhi wene wali wo walongola mu zimhuga zawo.

³ Zelofehadi u mwana wa Hefeli, mwana wa Gileyadi, mwana wa Macili, mwana wa Manase, mwene siyalela wana we cilume yaye, langa yalela wana wose we cicekulu du. Ne matagwa gawo gogano, Mala, Nowa, Hojila, Milika, na Tiliza.

⁴ I wahinza wawa, wakamubitila Eleyezali u mukohani, na kuli Yoshuwa u mwana wa Nuni, na kuli walongola wose. Wakawatya, “Muwaha Mulungu, yamulajiliza Musa vyono, yacigawile nase yisi yiwe yetu, nha vyono wagawilwa i wandugu zetu we cilume.” Hobaho wakawa kupegwa yisi muling'ano ne wandugu zawo we cilume nha vyono Muwaha Mulungu yali yalajiliza.

⁵ Na ku soko yiyo, holeka Manase yakabocela magawo yikumi, hamonga na Gileyadi na Bashani, ku lubavu lwa kucilima lwa Yoludani,

⁶ lono lulelo lwakwe lwe wana we cicekulu, hamonga ne wana we cilume, wose wali wapegwa yisi. Ne yisi ya Gileyadi yikagawilwa kuli wana wono wasigala wa mu lulelo lwa Manase.

⁷ Yisi ya Manase, yali yikoleye wulawilila Asheli, sunga ku Micemeta, ku lubavu lwa kucilima ya Shekemu. Hobaho mupaka wukakolela lubavu lwa kutakama, wukawahanza ne wanhu wose wa Eni-tapuwa.

⁸ Ne yisi yono yali yipilime Tapuwa, yikawa yisi ya Manase, langa likaya lya Tapuwa, mu mupaka, likawa yikaya lya wa mu lulelo lwa Efulayimu.

⁹ Mupaka kanyhi wukatenenhuka sunga ku mivwilo ya Kana. Makaya ga ku lubavu lwa kutakama lwe mivwilo yono yali ya Efulayimu, hamba gawe gali gali mu yisi ya Manase. Mupaka wa Manase nawo, wukajendelela mu nhumbi yo lubavu lwa kusumuka ye cikolongo, wukadumiliziza mwi'lenga lya Meditelaneya.

¹⁰ Efulayimu yali yekaye kulubavu lwa kutakama, nayo Manase, yali yekaye ku lubavu lwa kusumuka, ne lilenga lya Meditelaneya, wali wo mupaka wawo wa ku lubavu lwa kumwezi. Asheli yali yali kusumuka ye mwezi, nayo Isakali, yekalaga ku lubavu lwe sumuka ye cilima.

¹¹ Na mumo mu yisi ya Isakali na Asheli, mukawa mozili Belishani na Abileyamu, zono Manase yali yazitemile, hamonga ne vitumbi vyayo, hamonga na Doli, (yono yali yili mu mwejelele we lilenga.) Endoli, Tanaki, Megido, ne matumbi gono gali gagapilime.

¹² Ninga hamba nhavivyo, i wo lulelo lwa Manase, siwasuma kuwawinga wanhu wono wekalaga mu makaya gago. Holeka Wakanani wakajendelela kwikala mumo.

¹³ Hamba Waisilayeli lono wali wakondya kuwa ne vilungo, siwawawinga Wakanani, langa wawetumyaga du milimo yawo kwe vilungo.

Efulayimu na Manase ya ku lubavu lwa kumwezi, wakulomba wonjelezwe yisi

¹⁴ Wose wa mu lulelo lwa Yusufu wakamulonjela Yoshuwa wakamutya, “Alu nhawule kucigawila yisi hanhu hamonga du, na kumbe nase ho cili wenji muno, hambi Muwaha Mulungu nha yakondya kuciluguta.”

¹⁵ Nayo Yoshuwa yakawapitula yakawatya, “Hono muli wenji, ne yisi ya mu matunda ya Efulayimu ndodo hamba si yikumukwilenyi yaye, ale lu, mubite mu yisi ye Wapelizi ne Walefayi mukatemanje mbago mwikale.”

¹⁶ Wakamupitula wakatya, yisi ya mu matunda, hamba siyocikwila yaye. Hamba nhavivyo, Wakanani wa mu malolo, wena matuka go wulugu ge vyuma, hamonga na wono wali mu Betishani na mu matumbi gono gapilime, sunga na wono wali mwi'lolo lya Yezeleli nawo nhavivyo.

¹⁷ Yoshuwa yakawatya wanhu wa mu mhuga ya Efulayimu na wa Manase wa kumwezi, “Mbeka anye muli wenji muno, kanyhi muli vilungo. Holeka motuga du kanyhi yigawo linji.

¹⁸ Yisi ye matunda yowa yenyu. Hamba yiwe nha mbago, ninga 'nye motemanga no kwitujila wikalo mumo, wulawilila ku mhelo ayino, sunga ko kumhelo nzagwe. Mowawinga Wakanani hamba wawe wena matuka go wulugu ge vyuma kanyhi wali vilungo.”