Yoshuwa 14 - Luganuzi Luswanu Kuli Wanhu Wose 2002

U wugawe we yisi ya ku lubavu lwa kumwezi ya Yoludani

¹ Azi zono zityatizye, zikulolosa zo wugawanizwe we yisi kuli wanhu Waisilayeli, i yisi ya Kanani ya kulubavu lwa kumwezi ye likolongo lya Yoludani, nha vyono wagawanizwa na Eleyezali u mukohani, na Yoshuwa u mwana wa Nuni, hamonga ne walongola wa mu zimhuga za mu milango ye Waisilayeli.

² No wuhazi wawo wukatowelwa kula, kuli milango ye licenda na nusu, ya kulubavu lwa kumwezi ye likolongo lya Yoludani, nha vyono Muwaha Mulungu yali yakondya kumulajiliza Musa.

³ Musa yali yakondya kuyigawaniza yisi ya kulubavu lwa kucilima ye likolongo lya Yoludani, kuli milango ayilya i myejete ne nusu.

⁴ Wo mulango wa Manase (wa mu lulelo lwa Yusufu, wagawanizwa wakawa milango myejete. Wo mulango wa Manase na wo mulango wa Efulayimu.) Hamba nhavivyo, Musa siyawapela wuhazi we yisi, wo mulango wa Lawi. Langa, wapegwa makaya gono wowa kwikala mumo, hamonga ne mawimbi go wudimilo we matewa ge mitugo zawo.

⁵ Waisilayeli, wakagawana yisi nha vyono Muwaha Mulungu yamulajiliza Musa.

Kalebi yakupegwa yisi ya Hebuloni

⁶ Mwizuwa linji, wanhu wo mulango wa Yuda, wakamuziza Yoshuwa ha Giligali. Muyawo yunji mono yacemwaga Kalebi, u mwana wa Yefune, u Mukenezi, yakamulonjela Yoshuwa yakatya, “Agwe wumanyile vyono Muwaha Mulungu yamulonjela Musa u mwitumami wakwe, za kuli'ne, na gwegwe, lono cali cili ku Kadeshi Balineya.

⁷ Baho, ane nali ficile myaka makumi mane, lono Musa u mwitumami wo Muwaha Mulungu, yanhuma ku wulawilila ku Kadeshi-baleneya, ho nghayitandile yisi yiyi. Nghamugomolela Musa nghani ze mbeka za kuli zono naziwona mu yisi yiyi.

⁸ Ninga wanhu wono cabitana nawo, wakawogofya wanhu. Ninga ane nghawa mwihuwilwa kuli Muwaha Mulungu wangu.

⁹ Nane netuma zose zono Musa yandajiliza, holeka nayo Musa yakanyilahila yakatya, ‘Tuti i yisi yono zokanyaga zinzayo zako, nokupela gwegwe ne wanago ho wuwe wuhazi wenyu sunga cibitilila.’

¹⁰ Lanje luno! Yapuluta myaka makumi mane na mihano, wulawilila lono Muwaha Mulungu yalonjela zizi na Musa. Lono Waisilayeli wapilimaga mu nyika, na vyono Muwaha Mulungu yehuwiza, na mbeka yakondya kundima sunga, nalu nghali nili mumi. Nalu wunangaje, nafisa myaka makumi munana na mihano.

¹¹ Ninga vyo nghali nghamile du, kotya nhavyono nali ninha ha lulongozi, lono Musa yanhumila. Nghali nghamile, hamba ku wulugu nosuma kubita, hamba kwituma mulimo wunji wowose.

¹² Holeka lu, wumhelaje nane yisi ya mu matunda, yisi yono Muwaha Mulungu yanyihuwiza mwi'zuwa lililya, vyono komhela, lono ane hamonga ne, wanhu wono nali nina nawo, cakulonjelela zinghani za ku kuno, nha vyono kuko, kogali manhu mawaha gono gakucemwa Maanaki, gekaye mu makaya gono gena ne magomawakali. Na lunji Muwaha Mulungu kowa hamonga nane, nane nosuma kugawinga du, nha vyono Muwaha Mulungu yalonga.”

¹³ Ale baho Yoshuwa yakamulugutiza Kalebi u mwana wa Yefune. Hobaho yakamupela likaya lya Hebuloni liwe lyakwe yaliteme.

¹⁴ Sunga nalu Hebuloni yikali mu miwoko ya wo lulelo lwa Kalebi u mwana wa Yefune, Mukenezi. Vyono Kalebi yamuhulika Muwaha Mulungu u Mulungu, wa Isilayeli.

¹⁵ Hamwamulizo, Hebuloni yacemwaga likaya lya Kiliyati Aleba (Aleba yali yo muwaha muli Waanaki.) Nhondo yisi yikatula, yikawa no mulamu.