Yoshuwa 13 - Luganuzi Luswanu Kuli Wanhu Wose 2002

Yisi yikujendelela kusolwa

¹ Ale baho, lono Yoshuwa yali yeza mukombi muno muno, Muwaha Mulungu yakamulonjela yakamutya, “Alu 'gwe wakombipa, ninga yikali koyili yisi mbaha yono yisigaye yono mosakwa muyisole.

² Yisi yose ya ku Wafilisiti na ku Geshuli,

³ hamonga ne yisi yose ya Avimu, ya kulubavu lwa kutakama, Yisi yono yilawiliye mu cikolongo ca Shiholi, ha mupaka we Wamisili, sunga kulubavu lwa kusumuka, ku mupaka wa Ekiloni wono wehweseswaga vyono we Wakanani, ne watemi wahano we Wafilisiti, wekalaga ha Gaza, na Ashidodi, na Ashikeloni, na Gati na Ekiloni, hamonga ne Wavimi,

⁴ kulubavu lwa kutakama. Hamonga ne yisi ye Wakanani, na Meyala (yono yili kulubavu lwe Wazidoni,) sunga ku Afeki ku mupaka we Waamoli,

⁵ ne yisi ye Wagabali yose, ya ku Lebanoni, sunga kucilima, wulawilila Baali-gadi, yono yili kulubavu lwa kutakama ye litunda lya Helemoni, sunga ko ku Hamati Pasi.

⁶ Nayo yisolile ne zi'si zose za ku Sidoni, wono wekaye mu yisi ye matunda, haciligati ye matunda ga ku Lebanoni, na Miselefoti-mayimu. Ane nowawinga wanhu wawa wose, mu nghango ye Waisilayeli vyono wowa wakujendelela kwihoma nawo. Nagwe yikunojeye wuyigawe yisi kuli Waisilayeli, nha vyono nakulajiliza.

⁷ Alu wuyigawe yisi yiyi kuli we milango yicenda, hamonga ne nusu ya wo mulango wa Manase ho yiwe yawo, wayiteme.”

Wugawe we yisi ya kulubavu lwa kucilima ya Yoludani

⁸ Wo mulango wa Lubeni, na wo mulango wa Gadi, hamonga, ne we nusu nyagwe ya wo mulango wa Manase, wali wakondya kuyibocela yisi yono Musa, u mwitumami wo Muwaha Mulungu yali yawapela. Yali yili ku lubavu lwa kucilima ye likolongo lya Yoludani.

⁹ Yisi yawo yali yijendeleye sunga ko ku Aloweli, (mu mwejelele we lilolo lya Alinoni.) Na mwi'kaya lya haciligati ye lilolo lilyo. Kanyhi yikasola ne yisi yo wuhihi yono yilawiliye Madeba sunga ko ku Diboni.

¹⁰ Kanyhi yikajendelela sunga ko ku mupaka we Waamoni, yikasola ne makaya gose, gono yali yatemile u mutemi Sihoni we Waamoli, mono yali yayitemile Heshiboni.

¹¹ Yikasola ne yisi ya Gileyadi sunga na mu mupaka we Wageshuli, na Wamakati ne litunda lyose lya Helemoni, ne Bashani yose, sunga ko ku Saleka.

¹² Yikasola ne zisi zose zono zali mu wutemi wo mutemi Ogu, u mutemi wo mudumilizo we Walefayi, mono yali yatemile ku Ashitaloti na ku Edeleyi. Musa yali yakondya kuwasuma wose wawa, sunga yakawawinga na mu yisi.

¹³ Ninga, hamba nhavivyo, Waisilayeli siwawawinga wanhu wa ku Geshuli hamba Wamakati, wanhu wawa wakali wekaye mu Isilayeli sunga nalu.

¹⁴ Langa Musa si yawapela yisi, wo mulango wa Lawi, nha vyono Muwaha Mulungu yali yamulajiliza Musa. Hambi wene u wuhazi wawo, nha wali wa muli vilavywa vinyanywe vya mu cikumbicilo, vyono wamulavizyaga Muwaha Mulungu u Mulungu we Waisilayeli.

I yisi yono yapegwa Lubeni

¹⁵ Musa yali yakondya kuwapela we zi mhuga za wo mulango wa Lubeni, nusu ye yisi ho yiwe yawo.

¹⁶ Ne yisi yawo yali yibitile sunga ko ku Aloweli (Mu mwejelele we lilolo lya Alinoni) hamonga ne likaya lya haciligati ye lilolo, yisolile ne yisi yo wuhihi, yono vidomile ne Madeba.

¹⁷ Kanyhi, yikawa yisolile ne yisi ya Heshiboni, hamonga ne makaya aga gose gono gali gali mu yisi yo wuhihi. Diboni, na Bamoti-baali, Bete-baalimeyoni, na

¹⁸ Yahazi, Kedemoti, na Mefati.

¹⁹ Kiliyatayimu, na Sibima, Zeleti-shahali na mwitunda lya mwi'lolo,

²⁰ Bete-peyoli na mu nhenenhuko ye litunda lya Pisiga na Bete-jeshimoti.

²¹ Yikasola ne makaya gose ga mu yisi yo wuhihi, hamonga ne yisi yose ya mu wutemi wa Sihoni mutemi we Waamoli, mono yali yatemile yisi ya Heshiboni. Musa yakamusuma, hamonga ne walongola wa ku Midiyani, na Evi, na Lekemu, na Zuli na Huli na Leba. Wose wawa, wali watemile mu yisi yo mutemi Sihoni, wakawa nha watazi wakwe.

²² Nayo u mutowa cisangu, mono yacemwaga Balamu, u mwana wa Beyoli, yali muyagwe na wawo wono wawulagwa ne Waisilayeli.

²³ Ne likolongo lya Yoludani, wukawa wo mupaka wa ku lubavu lwa kumwezi, wa wo mulango wa Lubeni. Ago gali go makaya ne matumbi, gono wagawilwa we mhuga za wo mulango wa Lubeni gawe gawo weneco.

I yisi yono yapegwa Gadi

²⁴ Musa yali yakondya kuwapela we zinhuga za wo mulango wa Gadi yisi yiwe yawo.

²⁵ U mupaka wawo, wali wusolile na Yezeli hamonga ne makaya gose ga Gileyadi, ne nusu ye yisi ye wana wa Amoni. Mupaka wukajendelela sunga ko ku Aloweli, kulubavu lwa kucilima ya Laba.

²⁶ Ne yisi yawo, yikajendelela wulawilila ku Heshiboni sunga ko ku Lamati-mizipe, sunga ko ku Betonimu. Na wulawilila Mahanayimu, sunga ko ku mupaka wa Debili.

²⁷ Sunga mwi'lolo lye likolongo lya Yoludani, yikasola na Bete Halamu, na Bete-nimela na Sukoti na Zafoni, masigazwa go wutemi wa Sihoni wa ku Heshiboni. No mupaka wawo ku lubavu lwa kumwezi, wukawa likolongo lya Yoludani, no kujendelela kulubavu lwa kusumuka sunga ko ku mwejelele we lilamba lya Galilaya.

²⁸ Ago go makaya ne vitumbi vyono wapegwa i wana wo mulango wa Gadi, ho gawe gawo.

I yisi yono wapegwa wa Manase wa ku lubavu lwa kucilima

²⁹ Musa yali yakondya kuwapela we nusu ye mhuga ya wo mulango we wana wa Manase yisi yiwe yawo.

³⁰ Ne yisi yawo, yali yificile sunga ku ko yisi ya Mahanayimu, yikasola ne yisi yose ya Bashani, ya mu wutemi wose wo mutemi Ogu wa ku Bashani, sunga ne matumbi gose makumi mutandatu ga ku Yayili, mu Bashani.

³¹ Yikasola sunga ne nusu ya Gileyadi, hamonga na Ashitaloti na Edeleyi, i makaya mawaha ga mu wutemi wa Ogu ku Bashani. Azi zose, wakapegwa hamonga ne nusu ye we mhuga yono yali ya Macili u mwana wa Manase.

³² Awu wali wo wugawe no wuhazi we yisi, wono Musa yawagawaniza yisi, yono yali yili kulubavu lwa kucilima ya Yeliko na Yoludani, lono yali yali mu yisi yo wuhihi ya Mowabu.

³³ Ninga Musa siyawagawila yisi yo yose i wanhu wa mu mhuga ya Lawi. Langa yawalonjela du vyono, i wene, wuhazi wawo, wowa wuli muli vilavywa vyono vikulavywa kuli Muwaha Mulungu, u Mulungu wa Isilayeli.