Yoshuwa 12 - Luganuzi Luswanu Kuli Wanhu Wose 2002

I watemi wono wasumwa ne Waisilayeli

¹ Waisilayeli, wali wakondya kuwasuma no kuyitema yisi yose ya kulubavu lwa kucilima ye likolongo lya Yoludani, ku wulawilila mwi'lolo lya Alinoni, sunga ko kwi'lolo lya Yoludani, sunga ko ku lubavu lwa kusumuka ya kwi 'tunda lya Helemoni. Na kuko, wakawasuma watemi wejete.

² Sihoni u mutemi we Waamoli mono yali yatemile ku Heshiboni. No wutemi wakwe wali wusolile ne nusu ye yisi ya Gileyadi, ku wulawilila Aloweli, (mu mwejelele we lilolo lya Alinoni,) ne likaya lya haciligati ye lilolo lilyo, sunga ko kwi kolongo lya Yaboki, u mupaka we wana wa Amoni.

³ Yikahanguliza ne lilolo lya Yoludani, ku wulawilila kwi'lamba lya Galilaya, kulubavu lwa kutakama lwa Beti Yeshimoti, (kulubavu lwa kucilima ye Lilenga lyo Mwino) no kujendelela sunga ko ku nhenenhuko ye litunda lya Pisiga.

⁴ Kanyhi wakamusuma mutemi Ogu wa ku Bashani, mono yali yo wo mudumilizo we Walefayi, mono yali yatemile ku Ashitaloti na Edeleyi.

⁵ U wutemi wakwe, wali wusolile ne litunda lya Helemoni, na Saleka, ne Bashani yose, sunga ko ku mipaka ye Wageshuli na ye Wamakati, hamonga ne nusu ye yisi ya Gileyadi, sunga ko ku yisi yo mutemi Sihoni wa ku Heshiboni.

⁶ I watemi wawa wejete, wali wakondya kusumwa na Musa, hamonga ne Waisilayeli. Nayo Musa, u mwitumami wo Muwaha Mulungu, yakawapela yisi yiyo, wo mulango wa Lubeni na wa Gadi, na we nusu ya wo mulango wa Manase, ho yiwe yawo.

I watemi wono wasumwa na Yoshuwa

⁷ Yoshuwa ne wanhu wa Isilayeli, nawo wakawasuma watemi wose wa ku yisi ya kulubavu lwa ku mwezi ye likolongo lya Yoludani, ku wulawilila Baali-gadi mwi'lolo lya ku Lebanoni, sunga ko kwi'tunda lya Halaki, kulubavu lwa kutakama, behi na Edomu. Yoshuwa yakayigawa yisi yiyo mu we nghungugo ya Isilayeli, yiwe yawo, wayiteme.

⁸ No wugawane wuwu, wukasola ne zi'si za mu matunda, na mu nhenenhuko ya ku lubavu lwa kumwezi, sunga mwi'lolo lye likolongo lya Yoludani, na mu zi'si za musika ye matunda, hamonga ne zinhenenhuko za ku lubavu lwa kucilima, sunga ko ku yisi nghavu kulubavu lwa kutakama. Ne yisi yiyi, wali wo wikalo we Wahiti, ne Waamoli, ne Wakanani, ne Wapelizi, ne Wahivi, ne Wayebusi.

⁹ I wanhu wa Isilayeli wakawasuma i watemi wa mu makaya aga gono getyatizye: Yeliko, na Ayi, (behi na Beteli.)

¹⁰ Na Yelusalemi, Hebuloni, na

¹¹ Yelemoti, na Lakishi,

¹² Ejiloni, na Gezeli,

¹³ Debili, na Gedeli,

¹⁴ Holema, na Aladi,

¹⁵ Libina, na Adulamu.

¹⁶ Makeda, na Beteli,

¹⁷ Tapuwa, na Hefeli,

¹⁸ Afeka, na Lashaloni.

¹⁹ Madoni, na Hazoli,

²⁰ Shimiloni Meloni, na Acisafu,

²¹ Tanaki na Megido.

²² Kedeshi na Jokineyamu (wa Kalimeli),

²³ Doli (mu mwejelele we lilenga), na Gohimu, (mu Galilaya,)

²⁴ na Tiliza. Hamonga wose waficile watemi makumi madatu na monga liwalo lyawo.