Yona 4 - Luganuzi Luswanu Kuli Wanhu Wose 2002

Yona yakuwukolelwa likuwo lusungu lo Mulungu

¹ Ninga Yona siyayisangalalila nghani yiyo, yakawa kukolwa ne likuwo.

² Yakawa kulomba yakutya, “Muwaha Mulungu, nghani ayi, si yo nghani yono nalonga lono nali nghali nawuka mu yisi yangu, nha vyono azi zo kokwituma? Kanyhi co caleka nghawa kutiziza ku Talishishi!” Hambi nha nali manyile vyono agwe wumemile lihewa, kanyhi wuli Mulungu wo lusungu, kanyhi si kusimbaga mbela, na nhondo zose agwe wiwikanize kuwukawaniza wuhile wako no kuleka kulipiciza.

³ Holeka 'gwe Muwaha Mulungu, wundekaje ane nifwe. Hambi nha viswanu nifwe si nha kwikala mumi.

⁴ Muwaha Mulungu yakamupitula Yona yakamutya, “Alu mwene wukwihwesa vyono, hono wukukolwa likuwo wukunoza viswanu?”

⁵ Yona yakawa kutuluka, yakawa kubita ku lubavu lwe cilima ye likaya, yakawa kwikala hasi. Yakenozeza cibanda, yakekala mu mubeho wayo, akuno yalindiye cono cokwijela ku Ninawi.

⁶ Lo lulolulo nayo Muwaha Mulungu yakacindya cilimwa, naco cikawiluka cikawa kumucita Yona, cikamupela Yona mubeho. Na ku soko yiyo Yona yakatuga wusangalale so wuwo mubeho. Lulo Yona yakendezwa no kusecelela muno so cilimwa cico.

⁷ Ninga lizuwa lye kejete, Mulungu yakategula ying'onyo he sina lye cilimwa likawa kucidumula cilimwa, naco cikawa kunyala.

⁸ Yikawa lizuwa lyali lyeza kuwalika, Mulungu yakawa kutegula mbeho ya kucilima yono yina livuce liwaha muno, na Yona yakawa kuzilika so wukali we lizuwa, lyono lyali lyamutowa muno mu mutwe wakwe. Holeka yakawona ciba hono yafwe. Yakawa kutya, “Ciba hono nifwe si nha kwikala mumi.”

⁹ Ninga Muwaha Mulungu yakamutya, “Alo nhawule wukucikalalila cilimwa?” Yona yakapitula yakatya, “Heya, ane nina soko yono yikuleka nghukolwa likuwo, sunga nifwe!”

¹⁰ U Muwaha Mulungu yakamulonjela yakamutya, “Cilimwa aci ciwiluka mu cilo cimonga, no kunyala kanyhi mu cilo ciyagwe, nagwe hamba siwitumile cinji muli cene, hamba kuciwilusa yaye, ninga kumbe wukuciwonela lusungu!

¹¹ Ma, si viswanu kuli'ne kuyiwonela lusungu Ninawi likaya alilya liwaha mono mowali wanhu wacizize elufu yigana limonga na makumi mejete, wono si wakusuma kumanya zimbi ne ziswanu, hamonga ne zimitugo nyinji!”