Yona 2 - Luganuzi Luswanu Kuli Wanhu Wose 2002

Wulombe wa Yona

¹ Yona yakamulomba Muwaha Mulungu wakwe, ku wulawa mugati ye lilenga mu'nda ye lisomba,

² yakatya, “Mu magayo gangu, 'gwe Muwaha Mulungu, ane nghakucema, nagwe wukamhitula. Na ku wulawa mugati ku yinze ye wafu, ane nghakulilila so wutazi, nagwe wukahulika.

³ Hambi 'gwe nha wanhajila mu cisolo mwi'lenga mugati, hanhu hono malenga gamhilime mbavu zose, ne mawingo gako ge vilungo no wuyumba-yumbe wose, wukukola mucanyha yangu.

⁴ Ane nghwihwesa nha vyono nakondya kuwuka ku wulawa ha mwande yako, hamba sinosuma yaye kuwuwona no wuhembelo wako kanyhi.

⁵ Malenga nha gangubika, sunga no kwehela kose, hamba si nghusuma yaye, ne lilenga lyakondya kumhilima, sunga ne malungwi gayo, gandawiliza mu mutwe wangu.”

⁶ Ane nadodomela sunga hasi ye matunda, sunga ku yisi ye wafu, yono i milango yayo midindwe cibitilila. “Ninga agwe, go Muwaha Mulungu wangu, wambusa nili mumi ku wulawa mu visolo mono nikaye.

⁷ Ne nhumbula yangu yali yeza kuzilika, ane nghakulomba gwegwe go Muwaha Mulungu, nagwe wukahulika mu wulawa mu Nyumba yako.

⁸ Nawo wono wakuyihemba milungu ye vihwani yono yisina cambuzi, wakondya kuwuleka u wihuwilwa wawo kuli'gwe.

⁹ Ninga ane nokwimbila gwegwe lwimbo lo lukumyo, nokulavizya ne likumbiko, kanyhi nokwituma nha vyono nehuwiza. Hambi mhonelo nha yikulawa kuli Muwaha Mulungu!”

¹⁰ Hobaho u Muwaha Mulungu yakalilajiliza lisomba likamudece Yona, nalyo likawa kubita kumudeka mu yisi nghavu.