Yohana 9 - Luganuzi Luswanu Kuli Wanhu Wose 2002

Yesu yakumuponya munhu mono yalelwa yali cibofu

¹ Nayo Yesu lono yapulutaga, yakamuwona munhu yunji, mono yali yali cibofu kuwulawa vyono yalelwa.

² Iwejizwa wakwe wakamuwuza wakutya, “Ati Mwijizi, alu nani mono yetuma wubi, yuyu mweneco, hamba i walezi wakwe, holeka mwene yakawa kulelwa yali cibofu?”

³ Yesu yapitula yakatya, “Ayu si vyono yetuma wubi, hambe walezi wakwe, holeka yalelwe yali cibofu. Ninga yalelwa yali cibofu, ho vilungo vyo Mulungu vijele vikwituma muli mwene.

⁴ Yicinojeye ciwitume u mulimo wa mono yanhuma lono hakali misi, hambi i cilo nha cikuza, lono munhu si kosuma kwituma.

⁵ Lono nghali nili mono yinze, ane nili wuzelu we yinze.”

⁶ Yaza kukondya kulonga zizi, yakafunya i mate hasi, yakavuwa lilongo ne mate, yakamubaka lilyo lilongo mu meso yuyo mubofu,

⁷ no kumutya, “Wubite wukezuguze mu cilamba ca Silowami.” (nhunizo ye litagwa lili, wo wutya “Mutumwe.”) Nayo u mubofu yakabita, yakezuguza, yakawuya yakuwona.

⁸ Holeka iwayagwe, na wono wamuwonaga katali, vyono yali muciwa na mwilombelezi, wakatya, “Si yo yuyu mono yekalaga yakwilombeleza?”

⁹ Wanji wakatya, “Yo mwene.” Ninga wanji wakatya, “Nye, ng'o. Langa vihwanile nayo.” Ninga u mwene mono yali yali cibofu, yakatya, “Nye, yo nene.”

¹⁰ Holeka wakamutya, “Alu meso gako gasuma wule kuwona?”

¹¹ Nayo yakawatya, “U Munhu mono yakucemwa Yesu, yo yavuwile lilongo, kawa kumbaka mu meso, hanyuma kawa kunyitya, ‘Wubite ku Silowami, ukezuguze,’ Nane niwa kubita kwizuguza, niwa kuwona.”

¹² Wakamutya, “Alu mwene yali hayi?” Nayo yakawatya, “Magu ta, ane si manyile.”

I Wafalisayo wakusaka kumanya u wuponywe wo mabofu

¹³ Hanyuma, wakamutegula kuli Wafalisayo yuyo munhu mono yali yali cibofu.

¹⁴ Ne lizuwa lilyo lyono Yesu yavuwile lilongo no kumunuguza meso yuyo munhu we cibofu, lyali lizuwa lye Sabato.

¹⁵ Nawo Wafalisayo wakamuwuza yuyo munhu wakutya, “Alo kusuma wule kuwona?” Nayo yakawatya, “Kambaka lilongo mu meso, gangu, niwa kwizuguza, nalu nghuwona.”

¹⁶ Wanji wa muli Wafalisayo, wakatya, “U munhu mono yanozize zizi, si munhu wo Mulungu yaye, ku soko si yakwibata u wulajilize we Sabato.” Ninga wanji wakatya, “Hambi u munhu mubi kosuma wule kunoza vitanjilo vyono vinha vivi?” Kukawa no witemanuce muli wene.

¹⁷ Wakamuwuza kanyhi munhu yuyulya mono yali yali cibofu, wakatya, “Alu agwe wukumutya wule munhu yuyo vyono yakunuguze i meso gako?” Nayo yakawatya, “U Mwene yo Muwizi.”

¹⁸ I walongola we Wayahudi si wehuwila vyono munhu yuyu yali yali cibofu kuwulawa wulelwe wakwe, nalu yakuwona, sunga wakawacema i walezi wakwe.

¹⁹ Wakawawuza wawo walezi wakwe, wakutya, “Ati, ayu yo mwana wenyu mono anye mukumutya yalelwa yali cibofu?” Alu kasuma wule kuwona?

²⁰ Nawo walezi wakwe wakatya, “Heya, cimumanyile yuyu vyono yo mwana wetu, na kanyhi vyono yalelwa yali cibofu.

²¹ Ninga vyono yatujile kuwona, magu, ase si cimanyile, hamba na mono yamunuguza meso gakwe, ase si cimumanyile. Holeka mumuwuzaje mweneco nha munhu mututu, mweneco kokwilonjela.”

²² Ninga i walezi wakwe walonga zizi, vyono wawogopaga iwalongola we Wayahudi, hambi iwalongola wawo nha wali walagane vyono, munhu wo wose mono komuvumila vyono Yesu yo Kilisito, yawinjilwe kunze ye nhang'anilo yo wuhembelo.

²³ Holeka ku soko yiyo, iwalezi wakwe wakatya, “Mwene nha munhu mututu, mumuwuzaje mweneco.”

²⁴ Hobaho wakawa kumucema lwe kejete, yuyulya mono yali yali cibofu, wakamutya, “Lonje mbeka hali Mulungu! Ase cimanyile vyono munhu yuyu yena wubi.”

²⁵ Nayo yakawapitula yakatya, “Hono yena wubi, ane si manyile. Langa ane manyile nghani monga du, vyono, nali nili cibofu, ninga alu nghuwona.”

²⁶ Kanyhi wakamutya, “Alo kakutendela wule? Kakunuguza wule meso gako?

²⁷ Nayo munhu yuyo, yakawatya, nha nimulonjelenyi lulu baha, nanye hamba si muhulicize, alu nhawule mukusaka muhulice kanyhi? Alo nanye mukusaka kuwa wejizwa wakwe?”

²⁸ Ninga wene wakamutovula wakatya, “Agwe yo gwegwe mwijizwa wakwe, ase langa cili wejizwa wa Musa.

²⁹ Ase cimanyile vyono u Mulungu yalonga na Musa, ninga ase si cimumanyile munhu yuyo kono yalawile.”

³⁰ Munhu yuyo yakapitula yakawatya, “Ayi yo mbuko he, hono anye si mumumanyile kono yalawile, ninga kanuguza imeso gangu!

³¹ Cimanyile vyono Mulungu si yakuwa kuwahulika wanyo wubi, ninga munhu hono yawe kamogopaga Mulungu no kwituma zo wuhile wakwe, yuyo langa u Mulungu kamuhulikaga.

³² Ku wulawa ku mwamulizo we yinze, yikali si nahulikwa za munhu mono yanuguza meso, ga munhu mono yalelwa yali cibofu.

³³ U munhu yuyu mhali si yalawile kuli Mulungu, si yali yasume kwituma cinji.”

³⁴ Nawo wakamupitula wakumutya, “Waco 'gwe, nha walelelwa mu wubi wose, alu ho kosuma nhawule kucijiza ase?” Hodu wakawa kumuwinjila kunze ye nhang'anilo yo Wuhembelo.

U wubofu wa mu nhumbula

³⁵ Yesu yaza kuhulika zizo zono zijeye, yakamwagana u munhu yuyo, yakamutya, “Alu agwe, wumwihuwiye u Mwana wo Munhu?”

³⁶ Nayo u munhu yuyo yakapitula yakatya, “Yo nani Muwaha, ho nimwihuwile?”

³⁷ Yesu yakamutya, “Nha wukumuwona, nayo yo mwene mono yakulongana nagwe lulu baha.”

³⁸ Nayo u munhu yuyo, yakatya, “Nihuwiye Muwaha.” Yakamuhemba.

³⁹ Yesu yakatya, “Ane naza akuno kononze ho ndavye wuling'anize, wono si wakuwona, watuje kuwona, na wono wakuwona, wabofule.”

⁴⁰ Iwafalisayo wanji wono wali hamonga nayo, wazihulika zinghani zizi, nawo wakamuwuza wakutya, “Hambi nase cili wabofu?”

⁴¹ Yesu yakawatya, “Mhali muwe wabofu, si mwali muwe no wusutye, ninga alu anye mukutya, ase cikuwona, na yiyo yo yikulajila vyono mukali mwina wusutye.”