Yohana 4 - Luganuzi Luswanu Kuli Wanhu Wose 2002

Yesu no mucekulu Musamaliya

¹ Wafalisayo wahulika vyono Yesu yabaputizaga no kuwatuga wejizwa wenji si nha Yohana. (

² Ninga i mbeka, Yesu mweneco si yabaputizaga, langa wejizwa wakwe wo wabaputizaga du.)

³ Hobaho Yesu yaza kuhulika zizi, yakawuka ku Yudiya, yakawuya ku Galilaya.

⁴ Na mu wuwuye wakwe, yakakolela mu Samaliya.

⁵ Yakafika mwitumbi linji lya Samaliya lyono litezagwa Sukali, behi no mugunda wono Yakobo yali yamupela mwanagwe Yusufu.

⁶ Hanhu baho, hali ne lisima lya Yakobo. Nayo Yesu vyono yali yakataye muno so muhinzo, yakekala he 'sima. Nayo yali saa sita ne misi.

⁷ Yakaza mucekulu Musamaliya kunega malenga, Yesu yakamutya, “Wumhele ta malenga ning'we.”

⁸ (Na mwipango lilyo i wejizwa wakwe wali wabita ku mujini kugula ndigwa.)

⁹ Ninga u mucekulu yuyo Musamaliya, yakamutya, “Alu kosuma nhawule kunomba malenga, nane nili Musamaliya, nagwe wuli Muyahudi?” (Ku soko Wayahudi wali wasina wumonga ne Wasamaliya, mu vitumamilwa.)

¹⁰ Yesu yakamupitula yakamutya, “Mhali wuwe wumanyile i cipegwa ca kuli Mulungu, nayo yo nani mono yakukutya, wumhele malenga ning'we, nagwe wali wumulombe, nayo yali yakupele malenga go wumi.”

¹¹ U mucekulu yuyo, yakamutya, “Muwaha, agwe wusina ciya co kunejela, ne lisima nalyo yitali, alu kogasola hayi gago malenga go wumi?

¹² Hamba alu agwe, wukwinoza wuli muwaha si nho Sogo yetu Yakobo? Mwene Yakobo yacipela ase lisima lili, nayo yakang'wa mweneco i malenga ge lisima lili, ne wanagwe, sunga ne zimitugo zakwe?”

¹³ Yesu yapitula yakamutya, “Muli wose mono yakung'wa malenga gaga, kokaluka kanyhi.

¹⁴ Ninga muli wose mono kong'wa malenga gono nomupela, si kokalucila lukulu. Malenga gono nomupela gowa muli mwene nha muvwilo wa malenga, gakuvwila sunga ku wumi we cibitilila.”

¹⁵ U mucekulu yuyo yakamutya, “Muwaha, ale wumhele malenga gago ho ndece kukaluka kanyhi, ho ndece kuza baha kanyhi kunega malenga.”

¹⁶ Yesu yakamutya, “Wubite wukamuceme u mulume wako wuze nayo bahano.”

¹⁷ U mucekulu yapitula yakamutya, “Ane sina mulume.” Nayo Yesu yakamutya, “Kulonga mbeka, vyono wuteye sina mulume.

¹⁸ Hambi nha wali na walume wahano, sunga na mono wikaye nayo lulu, si mulume wako, baho langa kulonga mbeka.”

¹⁹ Nayo mucekulu yakamutya, “Muwaha, nghuwona vyono agwe wuli muwizi.

²⁰ I wasetu wahembelaga mwitunda lili, ninga anye mutezaga, ku Yelusalemi ho hanojeye kumuhembela Mulungu.”

²¹ Yesu yakamutya, “Gwe yaya wunyihuwile, icipango cikuza, cono si molomuhemba u Sogo yo munhu, hamba mwi'tunda lili, kuko ku Yelusalemi.

²² Anye Wasamaliya, mumuhembaga ayulya mono imbeka, si mumumanyile yaye. Ninga ase langa co Wayahudi, cimumanyile yuyo mono cimuhembaga. Hambi i mhonelo nha yikulawa kuli Wayahudi.

²³ Ninga i cipango cikuza, na lulu caza, lono wahembi we mbeka, womuhemba u Sogo yo munhu mu mbeka, mu vilungo vyo Muhe wo Mulungu. Hambi Sogo yo Munhu nha wo kasakaga i wanhu wono wakumuhemba mu nzila yiyo.

²⁴ U Mulungu wo Muhe, ne wanhu wosuma kumuhemba mu mbeka, kwe vilungo vyo Muhe wakwe.”

²⁵ Nayo u mucekulu yakamutya, “Manyile vyono Kilisito yakuza, na kolo yakuza mwene, kocilonjela zose.”

²⁶ Yesu yakamutya, “Ane mono cikulongana nagwe, yo Nene.”

²⁷ Lulo baho i wejizwa wakwe wakaza, wakezina muno kuwona yakuduwana no mucekulu. Ninga hasina hamba munhu mono yamutya, “Wukusaka cici?” Hamba, “So cici mukuduwana no mucekulu.”

²⁸ Yuyo mucekulu yakayileka njilo yakwe baho, yakabita ku mujini, yakawalonjela wanhu yakutya,

²⁹ “Muze mukamuwone u munhu mono yanonjeye zinghani zose zono nitumaga, alo kowa yo mwene Kilisito?”

³⁰ I wanhu wakalawila mu mujini, wakamubitila Yesu.

³¹ Na mu cipango cico, i wejizwa wakwe wamunenelezaga Yesu, wakutya, “Mwijizi wulye zindigwa.”

³² Ninga Yesu yakawatya, “Ane nina ndigwa yono si muyimanyile anye.”

³³ I wejizwa wakwe wakawa kwiwuza weneco wose wakutya, “Alo munhu kamuletela ndigwa?”

³⁴ Yesu yakawatya, “I ndigwa yangu yoyi, nitume wuhile wa mono yanhuma, no kuwukondeleza u mulimo wakwe.

³⁵ Anye mutezaga, Yikali myezi du, i cipango cen hwanga cowa cafika. Ninga ane nghumulonjelenyi, muyilangaje migunda, vyono yapisa, yakondya ku wududule.

³⁶ Mono yakutwanga, yakubocela u musahala wakwe, nayo yakukonghola i nhwanga, ku soko yo wumi we cibitilila, mono yakuhadika na mono yakutwanga, ho wasangalalane hamonga.

³⁷ Holeka nghani yiyi ya mbeka, ‘Yunji yakuhadika, yunji nayo yakutwanga.’

³⁸ Ane namutumenyi, mutwanje nhwanga yono si mwayilavizya nhuguti, wanji wetuma, ninga anye mukumota vya munhuguti yawo.”

³⁹ Wasamaliya wenji wa mu citumbi cico, wakamwihuwila Yesu soko ye zinghani zono yalonga yuyo mucekulu, zono yatya, “Kanonjela zinghani zose zono nitumaga.”

⁴⁰ Wasamaliya wakamubitila Yesu, wakamulomba yekale nawo. Nayo yakekala baho vilo vyejete.

⁴¹ Ne wanhu wenji muno wakamwihuwila ku soko ye zinghani zakwe.

⁴² Wakamutya, yuyulya mucekulu, “Ase si cikwihuwila du ku soko yo wulonje wako, sese co weneco cihulika, na camanya mbeka vyono ayu yo Mukombozi we yinze.”

Kuponywa ko mwana wo muwaha yunji

⁴³ Hanyuma ya vilo vyejete, Yesu yakawuka baho, yakabita ku Galilaya.

⁴⁴ Hambi Yesu mweneco nha yalonga calinze, vyono, “Muwizi si katugaga lilumbo mu yisi yakwe.”

⁴⁵ Ale, yaza kufika ku Galilaya, Wagalilaya wenji wakamubocela. Ku soko nawo nhavivilya, wali wali kuko ku sikukuu yiyo ye Pasaka, wakaziwona zinghani zose zono Yesu yetuma kuko ku Yelusalemi, mu cipango ce sikukuu yiyo.

⁴⁶ Yesu yakabita kanyhi kuko ku Kana ya ku Galilaya, i hanhu hono yagagalusiza malenga gakawa divayi. Kwali ko yuli yunji muwaha we likulu, u mwanagwe we cilume yali yatamigwe ku Kapelanawumi.

⁴⁷ Hodu, yuyo muwaha we likulu, yaza kuhulika vyono Yesu kalawa ku Yudiya, kafika ku Galilaya, yakamubitila, yakamulomba yamuponye mwanagwe mono yali mutamwa muno muno, yali behi no kufwa.

⁴⁸ Yesu yakamutya, “Hono mulece kuwona vitanjilo ne mapoto, si mokwihuwila ng'o.”

⁴⁹ Yuyo u muwaha we likulu yakamutya, “Muwaha, nghukunena cibite lono mwanangu yakali si nafwa.”

⁵⁰ Yesu yakamutya, “Wubite du, mwanago mumi.” U munhu yuyo yakehuwila zinghani za Yesu, yakawa kubita.

⁵¹ Na lono yali yakali mu nzila, wetumami wakwe waketang'anila nayo, wakamulonjela vyono u mwanagwe mumi.

⁵² Nayo yakawawuza ilipango lyono mwana yamulila kutuga ciba. Wakamutya, “Yigolo saa saba mu misi, mhungo ho yamulecela.”

⁵³ Nayo sogwe yakamanya vyono lyali lye 'pango lilyo lyono Yesu yamulonjela, “U mwanago mumi.” Yakehuwila mwene, na wa mu nyumba yakwe wose.

⁵⁴ Aci co citanjilo ce kejete, cono yanoza Yesu lono yalawila ku Yudiya yakubita ku Galilaya.