Yohana 18 - Luganuzi Luswanu Kuli Wanhu Wose 2002

Yesu yakwibatwa

¹ Yesu yaza kukondya kulonga zizi, yakalawila hamonga ne wejizwa wakwe, wakabita ku nhumbi nzagwe ye cikolongo ca Kediloni. Ne hanhu baho hali ho yili busitani, nayo Yesu yakenjila mumo hamonga ne wejizwa wakwe.

² Nayo Yuda mono yamugaluka Yesu, yali yahamanyile ihanhu baho, hambi Yesu nha yabitaga kuko kali kenji, yena ne wejizwa wakwe.

³ Baho Yuda yakasola mhuga ye Wasilikale, ne wawaha we Nyumba yo Mulungu, wono walawa kuli Wakohani wawaha ne Wafalisayo, yakabitana nawo kuko ku busitani, wena ne zitala hamonga ne vitwalo.

⁴ Ninga Yesu vyono yali yamanyile na katali, zose zono sizoleka kumwagana, yakalawila, yakawatya, “Alo mukumulondola nani?”

⁵ Nawo wakamupitula wakatya, “Cikumulondola Yesu wa Nazaleti.” Nayo Yesu yakawatya, “Ane yo Nene.” Nayo Yuda mono yamugaluka, yali yemile baho hamonga nawo.

⁶ Baho Yesu yaza kuwatya, “Ane yo Nene.” Wakawuya ne nyuma wakagwa hasi.

⁷ Yesu yakawawuza kanyhi, yakatya, “Alo mukumulondola nani?” Nawo wakamutya, “Yesu wa Nazaleti.”

⁸ Yesu yakawatya, “Nha nimulonjelenyi nitya, ‘Ane yo nene.’ Holeka hono mukunondola nene, ale muwalece awa wabite.” (

⁹ Yazilonga zinghani zizo, ho yifisilizwe inghani yono yayilonga, yono yatya, “Muli wawa wono wamhela, si najiliza hamba yumonga.”)

¹⁰ Simoni Petelo vyono yali yena mumaje, yakawukwega, yakamubuha umwitumami wo Mukohani muwaha, ilikutu lyo kulume likawuka. Ne litagwa lyo mwitumami yuyo, lyali Maliko.

¹¹ Yesu yakamutya Petelo, “Gomole umumaje hanhu hayo. Alo ndece kung'wa i cikombe co wusungu, cono yamheye Baba?”

Yesu ha mwande yo Mukohani muwaha Anasi

¹² Icipuga cicilya ce Wasilikale, hamonga no muwaha wawo, hamonga ne walongola we Wayahudi, wakamwibata Yesu, wakamuwopa, wakamula kumutegula kuli Anasi.

¹³ Anasi yali mukwewe wa Kayafa mono yali mukohani muwaha mu mwaka wuwo.

¹⁴ Yo Kayafa yuyo mono yawapela ilihweso Iwayahudi, vyono, yinojeye munhu yumonga yafwe ku soko ye wanhu.

Petelo yakumukana yesu

¹⁵ Simoni Petelo, hamonga no mwijizwa yunji, wakamutyatya Yesu. Na yuyo u mwijizwa yunji, yali yamanyice kuli Mukohani muwaha. Holeka yakasuma kwinjila hamonga na Yesu mwikumbo lyo Mukohani muwaha.

¹⁶ Ninga Petelo yali yemile ha mulango hanze. Nayo u mwijizwa yuyo mono yali yamanyice kuli Mukohani muwaha, yakalawila kunze, vikalongana no mwana we cicekulu u mulindiliza mulango, yakamwinjiza Petelo kugati.

¹⁷ Nayo u muhinza mulindiliza mulango, yakamuwuza Petelo yakatya, “Wule, nagwe si wuli muyagwe ne wejizwa wo munhu yuyu?” Nayo Petelo yakatya, “Yo si nene.”

¹⁸ Iwetumami hamonga ne walongola, ku soko vyono yali mbeho lulo, wakawa wapembile moto wakota. Nayo Petelo yali yemile behi nawo, nayo yakota moto.

U Mukohani muwaha yakumuwuza Yesu

¹⁹ Nayo Mukohani muwaha yakawa kumuwuza Yesu ze wejizwa wakwe, na ze mejizo gakwe.

²⁰ Nayo Yesu yakamupitula yakutya, “Ane nali walonjelaga wanhu wose nhondo zose cagalanze. Nane nali kwijiza hanji na hanji mu matang'anilo gawo go wuhembelo, sunga na mu Nyumba yo Mulungu, ihanhu hono wekongholelaga Wayahudi wose, hamba nghali si nalonga cinji co cose cinyele.

²¹ Alu nhawule wukumbuza ane? Wuwawuzaje wawo wono wahulikaga, zono nawalonjelaga. Wene wamanyile zono nalonga.”

²² Nayo yaza kukondya kulonga zizi, hobaho umwitumami yunji mono yali yemile baho, yakamutowa Yesu na kofi, akuno yakutya, “Alu nhavivi vyo wukumupitula u Mukohani muwaha hongo?”

²³ Yesu yakamupitula yakamutya, “Alu hono niwe nonga vibi, wulonje i vibi vivyo vyo vya hayi, na hono niwe nonga viswanu, socici wukunhowa?”

²⁴ Baho, Anasi yakamutegula Yesu muwope kuli Kayafa Mukohani muwaha.

Petelo yakumukana Yesu kanyhi

²⁵ Simoni Petelo yali yali baho yakota moto. Wakamuwuza wakatya, “Nagwe si wuli muyagwe ne wejizwa wakwe?” Mwene Petelo yakakana yakatya, “Yo si nene.”

²⁶ Muyawo yumonga, u mwitumami wo Mukohani muwaha, u nduguye wa mono yabuhwa ilikutu na Petelo, yakatya, “Ane ma, si nakuwona gwegwe mu busitani wuli hamonga na Yesu?”

²⁷ Petelo yakakana kanyhi, na lulo baho du, nayo nzogolo yikawa kulila.

Yesu hamwande ya Pilato

²⁸ Ale, waza kwela hakali mitondo muno muno, wakamusola Yesu kulawa kwa Kayafa, wakamutegula kwi'kulu. Ninga wene i walongola we Wayahudi, vyono wahilaga kuyilya Pasaka, si wenjila mwi'kulu mugati, ho walece kwavufywa.

²⁹ Holeka Pilato yakawalawila kunze, yakawatya, “Alo mwina nghanici yono mukumusonjezeza u munhu yuyu?”

³⁰ Nawo wakamupitula wakamutya, “Mhali yuyu si mutenda vibi, si cali cimulete kwako.”

³¹ Pilato yakawatya, “Ale mumusolaje nyenye, mukamuling'anizize mu Wulajilize wenyu.” Nawo Wayahudi wakamutya, “Ase cisina u Wulajilize wo kumuwulaga munhu wo wose.” (

³² Yikawa nha vivyo, ho yifisilizwe inghani ya Yesu yono yalonga, lono yalajilaga vyono zowa zo wufwe wakwe wono kofwa.)

³³ Holeka Pilato yakenjila kanyhi mwi'kulu mugati, yakamucema Yesu yakamuwuza, yakutya, “Ati, yo gwegwe mutemi we Wayahudi?”

³⁴ Yesu yakapitula yakutya, “Mwene nghani zizi zako du gwegwe, hamba wanji wakulonjela zinghani zangu?”

³⁵ Pilato yakapitula yakatya, “Hambi ane nili Muyahudi?” Iwayahudi wayago hamonga ne Wakohani wawaha, wo wakuletile kono kwangu. Alu agwe wanoza cici?

³⁶ Yesu yakamupitula yakatya, “Wutemi wangu si we yinze yiyi. Wutemi wangu mhali wuwe we yinze yiyi, mhali vilewane ne wetumami wangu, ho ndece kulavywa kuli Wayahudi, alu ninga wutemi wangu si wa kononze ng'o.”

³⁷ Baho Pilato yakamutya, “Alu agwe wuli mutemi hongo?” Yesu yakapitula, “Kulonga heya, vyono ane nili mutemi. Ane nha nalelwa ku soko yiyo, na kanyhi ku soko yiyo nghaza kononze, ho niwalonjele wanhu muli ze mbeka. No munhu wo wose mono yali mu mbeka, yuyo kahulikaga.”

³⁸ Pilato yakamutya Yesu, “Alo yiyo imbeka co cici?” Nayo Pilato yaza kukondya kuzilonga zizo, yakawabitila kanyhi Wayahudi kunze, yakawatya, “Ane si nghuwona lisutya lyo lyose muli munhu yuyu.”

Yesu yakuling'anizwa yafwe

³⁹ Ninga nha vyono muzoweye ane nimuwopolelenyi mufungwa yumonga mu cipango ce Pasaka. Alu mukusaka nimuwopolelenyi u Mutemi we Wayahudi?

⁴⁰ Baho wakazoza kanyhi wakutya, “Ng'o si yuyo, langa Balaba.” Nayo Balaba yali muhizi na muwulaji.