Yohana 12 - Luganuzi Luswanu Kuli Wanhu Wose 2002

Yesu yakubakwa mafuta

¹ Lono vyali vikali vilo mutandatu, ho yiwe sikukuu ye Pasaka, Yesu yakaza ku Betaniya, kono yekalaga Lazalo, mono Yesu yamuzukula mu wafu.

² Wakamwitumamila kuko ndigwa za cinyamihe, nayo Malita yakawa kuwetumamila. Ninga Lazalo yali muyagwe na awalya wono wali wekaye ha zindigwa hamonga na Yesu.

³ Nayo Malyamu yakasola supa ye mafuta maswanu, go wuguzi wukamu, yakamubaka Yesu mu magulu gakwe, yakamupata kwe zimvili zakwe. Ne nyumba yose yikamema imhunjile swanu ye mafuta.

⁴ Ninga Yuda Musikaliyota, muyagwe ne wejizwa wakwe, mono kolomugaluka, yakatya,

⁵ “Alo so cici mafuta gaga si gaguzigwe pesa dinali magana madatu, ne zipesa zizo wapegwe waciwa?”

⁶ Yalonga zizi si vyono yawakumbucilaga waciwa, langa ku soko vyono u mwene yo yali mutunza mufuko we zipesa, kanyhi yali muhizi, na kenji na kenji, yahizaga zipesa zono zatajilagwa mumo.

⁷ Ninga Yesu yakatya, “Mulece kumugaza yuyu Malyamu. Mumulekaje yambikanizize cono yena, so lizuwa lyangu lyo kuzikwa mu citenjelo.

⁸ Hambi i waciwa nha mowa mwina nawo nhondo zose. Ninga ane si mowa nane nhondo zose.”

Wiwikanize wo kumuwulaga Lazalo

⁹ Iwayahudi wenji, wakamanya vyono Yesu yali kuko ku Betaniya, holeka wakaza kuko, si vyono wasakaga kumuwona Yesu du, langa wasakaga wamuwone na Lazalo nhavivilya, mono Yesu yamuzukula mu wafu.

¹⁰ Ninga Wakohani wawaha wali walamuye vyono, wamuwulaje na Lazalo nhavivilya.

¹¹ Ku soko vyono, Iwayahudi wenji, wali wawagaluka walongola wawo, no kumwihuwila Yesu, ku soko ya Lazalo.

Yesu yakwinjila mu Yelusalemi kwa sasamo

¹² Imitondo yaco, mhuga mbaha ye wanhu wono wali wazize ku sikukuu ye Pasaka, waza kuhulika vyono Yesu yakuza ku Yelusalemi,

¹³ ale, wakasola i manhambi ge mitende, wakalawila, wakabita kumuhinjiliza, wakazoza wakutya, “U Mulungu yalumbwe! Mumoti mono yakuziza mwitagwa lyo Muwaha. Mumoti mutemi wa Isilayeli.”

¹⁴ Nayo Yesu yaza kuyiwona inyana ye ndogowe, yakapanda mucanyha yayo, nha vyono gakutye Mandiko,

¹⁵ “Wulece kogopa go likaya lya Sayuni. Langa ta, u Mutemi wako yakuza. Yapandile mu nyana ye ndogowe.”

¹⁶ Na mwipango lilyo iwejizwa wakwe hamba si wasuma kuzitanga zizo. Ninga Yesu yaza kondya kukumywa, baho ho wakumbucilila vyono zizi zali zandikwe zo mwene, na vyo iwanhu wamutendela nhavivyo.

¹⁷ Ne mhuga ye wanhu, wono wali wali hamonga nayo mwi'pango lyono yamucemela Lazalo mu citenjelo, yakamuzukula mu wafu, nawo wakazilonga zizo zono zejela.

¹⁸ Holeka imhuga yose ye wanhu, yikamuhinjiliza, hambi nha wali wahulika vyono Yesu yali yacinoza i citanjilo cico.

¹⁹ Holeka Wafalisayo wakalongana weneco wose, wakutya, “Alu mwawona! Si cosuma kwituma nghani yo yose! Lanje, vyono we yinze wose wakumutyatya.”

Wagiliki wanji wakusaka kumuwona Yesu

²⁰ Kwali na Wagiliki wanji muli wawo wanhu, wano wali wazize ku Yelusalemi ku wuhembi, mwipango lye Sikukuu yiyo.

²¹ Wawo wakamuziza Filipo, (munya ku Betesayida ya ku Galilaya,) wakamutya, “Muwaha, cikusaka kumuwona Yesu.”

²² Filipo yakabita, yakamulonjela Andeleya. Nayo Andeleya wakabitana hamonga na Filipo, wakamulonjela Yesu.

²³ Nayo Yesu yakawatya, “Icidaha co kukumizywa u Mwana wo Munhu, cakondya kufika!

²⁴ Mbeka nghumulonjelenyi, imhece yo wuhemba, hono yilece kugwa mu muhangha yifwe, yosigala yili wene du. Langa hono yifwe, yilelaga mana menji.

²⁵ Mono yawendile wumi wakwe yo yakuwajiliza, nayo mono yawusulile wumi wakwe mono yinze yiyi, yo kolowukamisa sunga ku wumi we cibitilila.

²⁶ Munhu mono yakusaka kunyitumamila, yimunojeye yanhyatye, kanyhi ho hose hono nili honili ane, baho ho kowa no mwitumami wangu. No munhu wo wose mono yakunyitumamila ane, nayo Baba komupela lilumbo.

Yesu yakulonga muli ze lifwa lyakwe

²⁷ “Alu nhumbula yangu yikugazika, wule, alu noze cici? Hamba nitye, ‘Baba wulece kucikombola icidaha cici cificile?’ Ninga yo soko yono yaleka ane nghaza, ho nicikolele i cipango cici ce magazo.

²⁸ Baba wulikumyaje litagwa lyako.” Baho likaza lizi likulawa ku wulanga, likutya, “Nalikumya, kanyhi nolikumya.”

²⁹ Ne lipuga lye wanhu wono wali wemile behi, nawo wakalihulika 'lizi lilyo, na wanji wayawo wakatya, “Lyali yididimo lya Mvula.” Ninga wenji wa muli wawo, wakatya, “Malayika yalonjile nayo.”

³⁰ Ninga Yesu yakawalonjela yakatya, “Lizi lili, si lizize so nene, langa liza so nyenye.

³¹ Alu co cipango co kuling'anizwa iyinze yiyi, alu muwaha we yinze yiyi kotagwa kunze.

³² Nane kolo nghwinulwa hacanyha ye yisi, nowakwejela wanhu wose kono kwangu.”

³³ (Yazilonga zizi yakulajila wufwe wakwe vyono kofwa.)

³⁴ Holeka lipuga lye wanhu likamupitula, likatya, “Ase cahulika mu Wulajilize, vyono Kilisito kekalaga cibitilila. Alu agwe kosuma nhawule kutya, ati, ‘U Mwana wo Munhu si koleka kwinulwa?’ Alu yuyo u Mwana wo Munhu yo nani.”

³⁵ Yesu yakawatya, “Cikali cidaha cidodo, u wuzelu mwina nawo. Holeka mujende lono mukali mwina wuzelu wuwo, ho citi cilece kumwaganenyi. Ku soko mono yakujenda mu citi, si yamanyile na kono yakubita.

³⁶ Holeka lono mukali mwina wuzelu, muwihuwilaje wuwo wuzelu, ho muwe wana wo wuzelu.” Yesu yaza kukondya kulonga zizi, yakawuka, yakehundika.

I wanhu wasina wihuwilo

³⁷ Ninga hamba yawe yanoza vitanjilo vinji hali wene, si wamwihuwila ng'o.

³⁸ Holeka inghani yono yalongwa no muwizi Isaya, yikafisilizwa, yono yatya: “Gwe, Muwaha, nani'mbi, mono yehuwila zono calonga? Hamba nani 'mbi mono yagubulilwa i vilungo vyo Muwaha?”

³⁹ Ku soko yiyo, si wasuma kwihuwila, hambi Isaya nha yatya kanyhi:

⁴⁰ “U Mulungu kawabofuza meso gawo, Kawapuvya i mahala gawo Ho walece kuwona ne meso Hamba walece kwizuka mu mahala gawo Hamba kumhitucila ho niwaponye.”

⁴¹ Isaya yazilonga zizi, vyono yaluwona ulukumyo lwa Yesu, yakalonga zo mwene.

⁴² Hamba nhavivyo, iwalongola wenji we Wayahudi, wamwihuwila Yesu. Ninga si wasuma kumuvumila ciwonelela, vyono wawogopaga Iwafalisayo, ho walece kuwawinga mu nhang'anilo yo wuhembelo.

⁴³ Hambi wene nha wali wendile kukumywa ne wanhu si nho kukumywa no Mulungu.

I nghani ya Yesu yikuling'aniza

⁴⁴ Hanyuma, Yesu yakalonga na lizi iwaha, yakatya, “Munhu mono yanyihuwiye nene, si yanyihuwiye nene du, langa yamwihuwiye mono yanhuma.”

⁴⁵ Nayo mono yakumbona nene, yakumuwona na yuyo mono yanhuma.

⁴⁶ Ane naza, ho niwe wuzelu kononze, muli wose wono wonyihuwila, walece kwikala mu wutitu.

⁴⁷ Na munhu hono yazihulice zono nghulonga, nayo ho yalece kuzibata, ane singhumuling'aniza, hambi ane nha si naza ho niwaling'anize wa mononze, langa niwaponye wa mononze.

⁴⁸ Nayo mono si yakwibata zinghani zangu, yali baho mono yakumuling'aniza, Inghani yiyilya yono nalonga, yo yolomuling'aniza Mwizuwa lya ku Ndumo.

⁴⁹ Ku soko ane si nonjile ko wulajilize wangu no mweneco, langa Baba mono yanhuma, yo yandajilize zono nolonga na zono notya.

⁵⁰ Nane manyile vyono ililajilizo lyakwe, liletaga wumi we cibitilila, holeka ane nghulonga zizilya du, zono Baba yanonjela, zo nghulonga.