Yohana 10 - Luganuzi Luswanu Kuli Wanhu Wose 2002

I cihwanicizo co mudimi we zingholo

¹ Yesu yakatya, “Munhu wo wose mono si yakwinjilila mu mulango we libululu lye zingholo, ninga yakukolela ha wukolo wunji, yuyo muhizi, kanyhi muboci.

² Langa mono yakwinjilila mu mulango, yuyo yo mudimi we zingholo.

³ U mulindiliza mulango we libululu, kamudigulilaga yuyo, ne zingholo zikuwa kumuhulika lizi lyakwe, nayo yakuwa kuzicema kwe matagwa zingholo zakwe, yimonga yimonga, kazitulusaga zilawile kunze.

⁴ Nayo kolo yazilavya kunze, kazilongolelaga ku mwande, nazo zingholo zimutyatyaga, hambi nha zimumanyile lizi lyakwe.

⁵ Ne zingholo zizo, si zidahile kumutyatya mujenzi, langa zomutiza, hambi nha si zimumanyile u mujenzi lizi lyakwe.”

⁶ Yesu yawalonjela i cihwanicizo cici, ninga wene hamba si watanga cono yawalonjelaga.

Yesu u Mudimi muswanu

⁷ Holeka Yesu yakawatya kanyhi, “Mbeka nghumutyenyi, Ane yo nene mulango we zingholo.

⁸ Na wose wono walongola kuza, lono ane nali nghali si naza, wawo wo wahizi, kanyhi waboci, nawo hamba ne zingholo si zawahulika.

⁹ Ane yo nene mulango, munhu hono yenjilile muli nene, kopona, kokwinjila kolawaniza, nayo kowona wudimo.

¹⁰ U muhizi si kazaga bwete, langa kazaga ho yahize, ho yawulaje no kongomeza. Ane naza, anye ho muwe no wumi. U wumi wono wukwilaniciye.”

¹¹ Ane yo nene mudimi muswanu. U mudimi muswanu, kawusuzaga u wumi wakwe ku soko ye zingholo zakwe.

¹² U munhu mono yakudima ku soko yo kulipwa musahala, yuyo si mudimi, hamba ne zingholo si sawo yakwe, kolo yakuwona liminzi likuza, yakuzileka zingholo, yakutiza. Nalyo liminzi likuzibata no kuziyagaza.

¹³ U mudimi mono kadimaga so musahala, katizaga no kuzileka i zingholo, vyono u mwene yakuzidima ku soko yo kulipwa musahala.

¹⁴ Ane yo nene u mudimi muswanu. Iwangu niwamanyile, nawo iwangu, wamanyile'ne,

¹⁵ nha vyono Baba yamanyile, nane vyono nimumanyile Baba. Nane nghuwulavya u wumi wangu, ku soko ye zingholo.

¹⁶ Hozili zingholo zangu zinji zono si zili mwi'bululu lili, yinojeye zizo nazo nizilete; Nazo zolihulika ilizi lyangu. Nazo zowa yitewa limonga no mudimi yumonga.

¹⁷ “Ku soko yiyo holeka Baba yanyendile, vyono nghuwulavya u wumi wangu, ho niwusole kanyhi.

¹⁸ Hasina munhu mono yakumboka u wumi wangu, langa nghuwulavya nene no mweneco. I vilungo vyo kuwulavizya, nina navyo, ne vilungo vyo kuwusolela kanyhi, nina navyo. Na Baba vyo yandajiliza nitume.”

¹⁹ Hakawa na witemanuce kanyhi muli Wayahudi so zinghani zizi.

²⁰ Wenji wayawo wakatya, “Yena macisi, kanyhi yena lukwale, alo so cici mukumuhuliciza?”

²¹ Wanji wakatya, “I milonjele ayi, si ya munhu mono yena lukwale, hambi i licisi lyosuma kunuguza meso ge wabofu?”

Yesu yakulemwa ne Wayahudi

²² Kuko ku Yelusalemi, kwali koyili Sikukuu yo Wusiwanule we Nyumba yo Mulungu, mu vilo vye cinyuli.

²³ Nayo Yesu lono yajendajendaga mu Nyumba yo Mulungu, mwi'kumbo lya Solomona.

²⁴ Iwayahudi wakamupilima, wakamuwuza wakutya, “Alo kojendelela kucenyhemeka mu zinhumbula zetu sunga nili? Hono yo gwegwe Kilisito, ale wucilonjelaje cimanye.”

²⁵ Yesu yakawapitula, yakawatya, “Nha nimulonjelenyi, ninga si mukwihuwila. I milimo yono nghwitumila mwitagwa lya Baba, yiyo yo yikuhomelela.

²⁶ Ninga anye si mukwihuwila, vyono si muli wayagwe ne zingholo zangu.

²⁷ Izingholo zangu zikuwa kulihulika ilizi lyangu, nane nizimanyile, nazo zinhyatyaga.

²⁸ Nane nghuzipela wumi we cibitilila, nazo si zolokwajilila yaye, hamba hasina yunji mono kosuma kuziboka mu muwoko wangu.

²⁹ Baba mono yamhela, yo Muwaha yacizize wose, na hasina munhu mono kosuma kuziwusa mu miwoko ya Baba.

³⁰ Ane na Baba yo monga.”

³¹ Iwayahudi wakatondola mabwe ho wamutowanje.

³² Yesu yakawatya, “Nha nimulajilenyi milimo minji yono yikulawa kuli Baba, alu mulimo wa hayi muli yiyo, wono woleka munhowe ne mabwe?”

³³ Wayahudi wakamutya, “Ase si cikukutowa ne mabwe ku soko ye milimo miswanu, langa ku soko vyono wukumutovula u Mulungu! Ku soko agwe wukwinoza nha wuli Mulungu, na kumbe agwe ho wuli munhu du.”

³⁴ Yesu yakawatya, “Wule, si yandicigwe mu Wulajilize wenyu vyono u Mulungu yatya, ‘Yo nyenye milungu?’

³⁵ Hono Mulungu yawatezaga milungu, wawalya wono wapegwa i nghani yakwe, holeka nase cimanyile vyono, Imandiko Gono Gelile, galongaga imbeka nhondo zose.

³⁶ Alu ma, u mwene mono Baba yamuhagula, yakamutuma kononze, mukumutya yakutovula, ati vyono nheye, ‘Ane nili Mwana wo Mulungu?’

³⁷ Holeka hono niwe si nghwituma i milimo ya Baba, ale mulece kunyihuwila,

³⁸ ninga hono niwe nghwituma na hono si munyihuwiye nene, ale mwali muyihuwile i milimo, ho mumanye no kwizuka vyono Baba yali muli nene, nane nili muli Baba.”

³⁹ Wakajela kanyhi kumwibata Yesu, ninga mwene yakawuka hali wene.

⁴⁰ Yesu yakabita kanyhi ku nhumbi nzagwe ya Yoludani, hono Yohana yabaputizizaga, yakekala kuko.

⁴¹ Ne wanhu wenji wakamubitila, wakatya, “Yohana si yanoza citanjilo co cose. Ninga zose zono Yohana yalonga za muli munhu ayu, za mbeka.”

⁴² Ne wanhu wenji wa kuko wakamwihuwila.