Yelemiya 8 - Luganuzi Luswanu Kuli Wanhu Wose 2002

¹ “Na mu madaha gago i mafupa gose ge watemi na ge wawaha wa Yuda, na ge wakohani, na ge wawizi, hamonga ne mafupa ge wanhu wose wono wekalaga mumo mu Yelusalemi, mafupa gose gago golofukulwa mu vitenjelo vyayo.

² Hanyuma geyagazwe caka mwi 'hala, gehwane mboleya ya mu migunda. Golokwanzalikwa he'zuwa, no mwezi, hamonga ne zinyelezi, vyono wene wali wavyendile no kuvitumamila, hamonga no kuvitumbila no kuvihemba.

³ Ne wanhu wawa wabi, we likungugo lili, wono wowa wakali wasigaye womi, wono wowa wakali wekaye mu zi'si, mono naweyagaziza, wolokwenda wafwe si nho kwikala womi. Vyo nghutya ane no Muwaha Mulungu u Mudaha Vyose.”

U wubi no Wulipicizwe

⁴ U Muwaha Mulungu yakanonjela mbite nghawalonjele wanhu wakwe niwatye nhavi, “Wulenyi, hono munhu yekobale yagwe hasi, kokwikalilila baho hasi yagwiye du, hamba si kokwinuka kanyhi lo? Hamba hono munhu yajililwe nzila, si kowuya ne nyuma yayilondole kanyhi ng'o?

⁵ Ninga anye 'lu, nhawule vyo mukali du muvidindimiye i vihwani vyenyu viseswe, hamba si mukusaka kumbuyila ng'o.

⁶ Ane nghuwa hulicize du, ninga hamba si mulongaga ze mbeka yaye. Kanyhi muli nyenye, hasina hamba monga mono yakulajila vyono yakunena ku soko yo wubi wakwe ng'o. Hamba hasina mono yewuza mweneco yatye, ‘Mwene wubi wangu cicici?’ Ninga wanhu wose, munhu yatyatizye na nzila yakwe du, wehwanile nhe zifwalasi zono zikumanyhila ku wulugu.

⁷ Sunga ne yobwa ya mu wulanga nha yigamanyile ne madaha gayo go kuwuyila kwi nhuli lyayo, sunga ne zingungulima zose, ne zisamamba, hamonga ne zinghweli nghweli, zose zigamanyila madaha gayo go kuhamila, no kubita kwikala hanhu hanji. Ninga i wanhu wangu, woyi he! Hamba si mugamanyile ne malajilizo gono ane namulajilizenyi.

⁸ Alu hono muli nhavivyo, ho mosuma wule kulonga mutye, mwina mahala, kanyhi mugamanyile ne malajilizo gangu? Ninga mulanje vyono i wejizi wo wulajilize wawukawaniza wulajilize so wu wula cihuliko wawo.

⁹ Ne wanhu wenyu we mahala wakozwa cevu, nalu watimanjila, wegwiza weneco mu mutego. Hambi nha wayilema nghani yangu, alu zili hayi 'mbi, zono wakwiyitya 'ti wena mahala?

¹⁰ Holeka nane lu, noyisola migunda yawo, niwapele wanhu wanji, sole ne wacekulu zawo nawo, mhele walume wanji. Alu lanje, vyono wanhu wose i wawaha ne wadodo, wakujela kwitujila pesa mu zinzila zo wukoci. Sunga ne wawizi, hamonga ne wakohani, nawo nhavivyo du, wekalaga wakukonga-konga wanhu.

¹¹ Wakuziwona zinghomele ze wanhu wangu nha wikubule kubule du wudodo. Hanyuma wawa kutya, ‘Aa! Zose swanu du,’ na kumbe hasina swanu hamba monga.

¹² Ninga wule nyo wanhu wangu, mwakolwa cevu so makani gago ge cevu gono mwagetuma? Waco nye, hamba si mwakolwa cevu yaye, hamba si mwapuwa ng'o! Holeka luno nanye kolo nghumukundujizenyi, mogwa nha vyono wanji wagwa. Nanye nhondo, wuwo wowa wo mudumo wenyu. Vyo nghutya ane no Muwaha Mulungu.

¹³ “Nali nina wuhile wo kuwakongholela hamonga wanhu wangu, nha vyono munhu kakongholezaga nhwanga yakwe, ninga wanhu wangu wehwanile no mubici wo muzabibu, wono wusina zabibu, hamba mukuyu, wono wusina zinghuyu, wono sunga ne mahamha gayo gakondya kunyala. Holeka nane nghawaleka i wanhu wanji wayisole yisi.

¹⁴ “Nawo i wanhu wo Mulungu wakwiwuza wakutya, ‘Alu mwene nye!’ Nhawulenyi lo cikaye cinyamaye twii. Alenyi cimanyhile mu makaya gono gena magomawakali cikafwile mumo. Hambi u Muwaha Mulungu, u Mulungu wetu, nha yakondya kuciling'aniziza wufwe. Hambi nha kacipela 'se sumu, ciying'we, vyono nase cituma wubi hali mwene.

¹⁵ Hambi ase nha calanjililaga mulamu, ne madaha go kuponywa, ninga ziswanu hamba si zejela yaye, langa wogofywe wo wukacila muno.

¹⁶ Ne walugu wetu nha wakondya kwinjila mwi'kaya lya Dani, nase sunga nalu, cikugahulika i mazi ge zifwalasi zawo vyono zikuzoza. Sunga ne yisi yose yikucicima ku soko ye mililo ye zifwalasi zawo. Ne walugu wetu wawo, nha wakuza ho wayongomeze yisi yetu, hamonga ne vinhu vyose vyono vili mumo, i makaya hamonga ne wanhu wose wono wekaye mumo.

¹⁷ “U Muwaha Mulungu yakutya nhavi, Alu mwilanjililaje! Hambi 'ne nha nghumutumilenyi mazoka gono gena sumu nghali muno muno, gono gasina wuganga wo wose wono wosuma kugemila yaye, ho galece gamulumenyi.”

U wukalale wa Yelemiya kuli wanhu wakwe

¹⁸ U wukalale wangu, hasina hamba yunji mono kosuma kuwuwusa yaye, hambi nha nhamigwe mu nhumbula yangu.

¹⁹ Ale, hulicizenyi anye mono muli mu yisi yose. Hambi 'ne nha nghucihulika cililo ce wanhu wangu wakulila wakutya, “Alo mwene u Muwaha Mulungu yeza yali kusina kuko ku Sayuni? Hamba u mutemi we Sayuni, yeza yali kusina kuko?” Nayo u Muwaha Mulungu, u mutemi wawo yakupitula yakutya, “Nhawulenyi nanye mwanghoza likuwo, ku soko yo wuhemba vihwani wenyu, hamonga no winamila i milungu yenyu ye cijenzi, yono yisina wutazi wo wose?”

²⁰ Nawo i wanhu wo Mulungu wakulila wakutya, “Alu nhwanga yakondya kupuluta, ne cibahu naco capuluta, ninga ase hamba kupona yaye.”

²¹ Mbeka, ane Yelemiya, nhumbula yangu yikuzizidika muno, ku soko ye wanhu wangu wono wena wusungu mu zinhumbula zawo. Nane nghulila, no wucelewale wunyibate muno.

²² Alo mwene kuko ku Gileyadi, hongo kusina miti yo yose? Hamba kuko ku Gileyadi, kusina muganga wo wose hongo? Alu socici i wanhu wangu wakali sunga nalu si wanaponywa yaye?