Yelemiya 7 - Luganuzi Luswanu Kuli Wanhu Wose 2002

Yelemiya yakuganula mu Nyumba yo Mulungu

¹ U Muwaha Mulungu yakanhegula

² sunga ho ha mulango we Nyumba yo Mulungu, hono i wanhu wa Yuda wenjililaga, ho wamuhembe Mulungu. Yakanonjela nime baho ha mulango, niwalonjele i wanhu wa Yuda, zono u Muwaha Mulungu u Mudaha vyose, u Mulungu wa Isilayeli yakusaka yawalonjele. Nane nghawalonjela nghatya, “Hulicizenyi Nghani yo Muwaha Mulungu anye nyo wanhu wa Yuda, mono mwinjilaga mumu ho mumu hembe Muwaha Mulungu.

³ U Muwaha Mulungu we mihanga u Mulungu wa Isilayeli, yakutya nhavi. Muzipitule zinzila ze mikalile yenyu, hamonga ne makani mabi gono mwitumaga, holeka nayo komulecenyi mwikale hanhu baha.

⁴ Mulecele lukulu kwitumbila zinghani zizo zo wulambi, zo wutya ‘Ase cipolile, hambi ayi nha yo Nyumba yo Mulungu! Nha yo Nyumba yo Mulungu! Nha yo Nyumba yo Mulungu!’

⁵ “Ninga langa muyipitule nzila yenyu ye mikalile yono mwikalilaga, mulecele lukulu kwituma i zimbi zono mwitumaga. Muwe kwitendela ze ling'ani munhu na muyagwe.

⁶ Mulece kuwewonela wajenzi, hamba i wana wono wasina walezi wawo, hamba i wacekulu wafwile. Mulece kuwawulaga i wanhu wono wasina masutya mono yisi yiyi. Mulece kuyihemba milungu yinji, hambi zizo nha zo mongomezenyi bwete.

⁷ Na hono mbeka muyipitule mikalile yenyu, nane nomulecenyi mwikale hanhu baha, mu yisi yono nawapela i walezi wenyu, wuwe wo wuhazi wawo.

⁸ “Alu lanje! Mukwitumbila zinghani zo wulambi.

⁹ Mukuhiza, mukuwulaga, mukusenyha, mukwilahiza ko wulambi, kanyhi mukumulavizya Baali makumbiko, no kuyihemba i milungu yono si mwali muyimanyile hamba hadodo.

¹⁰ Mukwituma zinghani zono si nizendile hamba hadodo. Hanyuma kanyhi ti, ho muwa kuza kwima hali 'ne, mugati ye Nyumba yangu, no kutya, ‘Ase cipolile!’

¹¹ Anye lu, mukwihwesa nha vyono Nyumba yangu, heza hanhu ho wihundiko we wahizi lo? Ninga nane nakondya kuziwona zose zono mukuzituma.

¹² Ale, mubite ku Shilo, i hanhu halongozi, hono nahahagula, ho hawe i hanhu ho wuhembelo. Muwone na zono nayinozeza ku soko yo wubi we wanhu wangu Waisilayeli.

¹³ Nanye mwetuma u wubi wuwu wose, hamba niwe namulonjelenyi zizi zose kali kenji na kenji, ninga nye mukalema kuhulika 'ne. Yali yiwe yili ciba le, hono mwali mulece kwidika, lono nali kumucemenyi.

¹⁴ Hamba nhavivyo, zono netuma ku Shilo, zo noyitendela ne Nyumba yangu yiyi, yono anye muyitumbiye. Nane nohatendela i hanhu baha hono nawapela i walezi wenyu hamonga na nyenye, nha vyono nayitendela Shilo.

¹⁵ Nomuwinjenyi ha meso gangu, nha vyono nawawinga i wandugu zenyu, i wanhu wa Isilayeli. Vyo nghutya ane no Muwaha Mulungu.”

U wu wula cihuliko we wanhu

¹⁶ Muwaha Mulungu yakatya, “Gwe Yelemiya, wulece kuwalombela wanhu wawa. Wulece kulila hamba kulomba ku soko yawo. Hamba wulece kuneneleza 'ne, ku soko yawo, hambi 'ne nha si nokuhuliciza yaye.

¹⁷ Alu 'gwe si wukuziwona yaye, zinghani zono wakwituma mu makaya ga Yuda, na mu zinzila za mu Yelusalemi lo?

¹⁸ I wana wawo, wo watenyi we zingwagu, i wasogo zawo, wo wapembi wo moto, i wanyina zawo, wo wavuwi wo wusaje ho wamunozeze mikate, u mulungu we cicekulu mono wamucemaga, mulungu we cicekulu wa ku wulanga. No kuyijidila milungu yinji, i vilavywa vye divayi, ho wanghoze likuwo'ne.

¹⁹ Wene wakwihwesa nha vyono wakunhamisa nene, kumbe ho wakwitamisa weneco, hamonga no kwiyiletela cevu ca bwete.

²⁰ Holeka lu, ane no Muwaha Mulungu, nane nolijidila likuwo lyangu mumu mu Nyumba yangu. Hamonga na zizo, nolijidila sunga na muli wanhu, na muli vilimu, na mu mabici gose, sunga na mu vilimwa. Ne likuwo lyangu, lyowa lihwanile moto mukali, wono howa hasina munhu wo wose, mono kosuma kuwuzimya yaye.

²¹ “Nye nyo wanhu wangu, manyile'ne vyono anye, muzoweye kusola i makumbiko genyu ganji, muwa kugakongoga mu moto, na ganji go muwa kulya. Ninga ane no Muwaha Mulungu nghumutyenyi, vyono munojeye mweze kulya vyose du hamonga.

²² Hambi ane nha si nawapela malajilizo go gose i walezi wenyu, kuli ze vilavywa vinyanywe, hamba i makumbiko ge liwala linji lyo lyose, lono nawawusiza mu yisi ya Misili.

²³ Langa nawalajiliza nghawatya vyono, weze wali cihuliko du kuli'ne, nane niwe Mulungu wawo, nawo wawe wanhu wangu. Kanyhi nghawalajiliza, nha vyono, yiwanojeye wekale mu mikalile nha vyono nawalajiliza, holeka womoteswa mu milimo yawo yose.

²⁴ Ninga wene si wahulika 'ne, hamba kuzicelelela bwete, zono nawalonjela. Wene waketuma zimbi vyono wasakaga weneco mu zinhumbula zawo. Wakacila kuwa wabi muno, wakawuka ku wuswanu.

²⁵ Na ku wulawa lono i walezi wenyu wawucila mu yisi ya Misili, nghali niwatumaga kuli'nye wetumami wangu i wawizi sunga nalu.

²⁶ Ninga hasina hamba munhu monga, mono yawahulika, hamba kuzicelelela bwete zono wazilongaga. Ninga 'nye mukajendelela kuwa musina cihuliko kuli'ne, no kuwa wabezi muno si nhe walezi wenyu.

²⁷ “Holeka agwe Yelemiya, wuwalonjelaje inghani zizi zose, i wanhu wangu, ninga wene hamba si wokuhulika yaye. Agwe kowacema, ninga wene hamba si wokwidika ng'o.

²⁸ Wuwalonjele nha vyono, likungugo lyawo lisina cihuliko kuli'ne, ane no Muwaha Mulungu, u Mulungu wawo, hamba si wakusuma kwifundila mu wulipicizwe wawo. No wihuwilwa wawo wakondya kuwucila lukulu muli wene, hamba no kuwuduwila du kose, si wawuduwilaga yaye.

I metumo go wubi ga mwi'lolo lya Hinomu

²⁹ “Ale, mulile, anye nyo wanhu wa Yelusalemi, mucete zimvwili zenyu muzitaje kutali. Mwimbe zinyimbo ze maziko mu vizuli vye matunda, hambi ane no Muwaha Mulungu, nha ngholigwe ne likuwo, nakondya kuwalema ne wanhu wangu.

³⁰ “Nawo i wanhu wa Yuda, mbeka wetuma nghani 'mbi muno muno. Wene wawika i vihwani vyawo viseswe mu Nyumba yangu, wakayavufya.

³¹ Kanyhi wakazenga cikumbicilo cono cacemwaga Tofeti, mwi'lolo lya Hinomu, ho wawalavye i wana wawo we cilume na we cicekulu, wawakongojeze mu moto. Ninga nane ho si nawalajiliza wetume zizo. Kanyhi ne nghani yiyo, yali yili musina muli'ne.

³² Holeka ku soko ya zizo, ninga vilo vyolokuza, lono si holocemwa kanyhi Tofeti, hamba Lilolo lyo Mwana wa Hinomu. Langa holocemwa Lilolo lye Mawulaji. Nawo wolowa kuwazika mwi'lolo lilyo, i wanhu wose wono wasina i hanhu ho kuzikwa.

³³ Ne mivimba yiyo, yolowa ndigwa ye zindeje, hamonga ne malimu ga mu mbago. Na holowa hasina hamba munhu wo wose mono koziwinga yaye.

³⁴ Nayo yisi yololekwa nyhiwa. Nane noloyidumya nyemo yose no wusangalale, mu makaya ga Yuda, na mu zinzila zose za Yelusalemi, hamonga ne zinyemo zose za mu zindigwa ze zi halusi.