Yelemiya 6 - Luganuzi Luswanu Kuli Wanhu Wose 2002

Yelusalemi yapilimwa ne walugu

¹ Ale, mutize ho mupone, anye nyo wanhu wa Benyamini! Muwuce mu Yelusalemi. Mutowe ndulele mu Tekowa, mwinule citanjilo co moto mu Beti-hakelemu. Hambi i mabi, hamonga no wongomezwe, nha vikuza vikulawilila ku lubavu lwa kusumuka.

² Ne likaya lya Sayuni, hamba liwe yiswanu muno, ninga lyolokongomezwa du.

³ Ne watemi wolokuza wasite nghambi baho he 'kaya, hamonga ne wasilikale wawo wo wulugu. Wolokoma ne mahema gawo walipilime likaya. Na muli wene wose, munhu wo wose kolosita nghambi yakwe hono kowa yakusaka mweneco.

⁴ Hanyuma yayo wolokwilonjela weneco wose wawe kutya, “Ale, mwiwikanizaje luno, cibite ciyihome Yelusalemi! Nhondo cibite mu madaha ge cinyamihe.” Ninga hanyuma kanyhi wolotya, “Nye, ninga cacela muno, mulanje luno, ne lizuwa lu lyeza kuswa, sunga ne mibeho ye cinyamihe yeza kutalimha.

⁵ Holeka yowa ciba hono cilihome likaya mu madaha ge cilo, cigongomeze ne magomawakali galyo.”

⁶ U Muwaha Mulungu yali yawalonjela i watemi wawo wateme mabici, wanozeze wunanucilo, wo kulihomela likaya lya Yelusalemi. Kanyhi yali yawatya nha vyono, “Ane no Muwaha Mulungu, nolilipiciza likaya lili, ku soko limemile nghani zo wiwonela wanhu du.

⁷ Nha vyono muwonaga lisima liwikaga malenga maswanu, ale nalyo likaya lya Yelusalemi, vyo liwikaga i makani galyo mabi. Nane nha nghuhulika zo wuhizi wo wuhodanjice du mwi'kaya, kanyhi nghuwona du matamwa, hamonga ne zinghomele mumo mwi'kaya.

⁸ Nye nyo wanhu wa Yelusalemi, alu mwali mulece ta i magayo gaga, gawe suguzi kuli nye ye, na hono si nhavivyo, hodu nane nomulecenyi, nilinoze likaya lyenyu, liwe nyika, hawe hanhu hono u munhu wo wose si kosuma kwikala mumo yaye.”

Isilayeli wabezi

⁹ U Muwaha Mulungu Mudaha Vyose yakanonjela yakatya, “Hambi Isilayeli nha wolowusizwa lukulu nhe mahalalizwa ge zabibu mu mubici wo muzabibu, wono wali wakondya kuhepwa zi zabibu zayo. Holeka aluno, yikunojeye wuwaponye wanhu wose wono kosuma, lono i cipango cico cikali si naza.”

¹⁰ Ninga nane nghamupitula nghatya, “Gwe go Muwaha Mulungu, alo nani mono kokwenda kuhulika 'ne waco, kolo neza kuwalonjela, nghuwasugula? Hambi nagwe nha wuwamanyile, vyono wo wanhu wono wasina cihuliko hamba hadodo, holeka hamba si wovumila yaye kuzihuliciza ne zinghani zako, woziwona nha nzwaji du, muli zose zono wukunhuma mbite nghawalonjele.

¹¹ Hambi nane nha memile likuwo lyako kuli wene, 'gwe go Muwaha Mulungu. Nane hamba si nosuma kwiyimila yaye.” Nayo u Muwaha Mulungu yakanonjela yakatya, “Alu wulimwagaje likuwo lyangu mu wana, wono wali mu zinzila, na mu wikongholelo we wazelelo. Nawo i walume hamonga ne wagolece zawo, wolosolwa no kutegulwa kutali, hamonga ne wakombi wose, nawo hamba si wolosigazwa yaye.

¹² Ne zikaya zawo, wolopegwa wanhu wanji, hamonga ne migunda yawo, ne wagolece zawo. Nane nhondo nowalipiciza i wanhu wose wa mu yisi yiyi.

¹³ Hambi wanhu wose i wadodo sunga ne wawaha, nha wahidimbaliye mu wutujila sawo, mu zinzila zo wuhizi du. Sunga ne wawizi, hamonga ne wakohani, nawo wose wakwituma metumo go wukoci du kuli wanhu.

¹⁴ Na kanyhi wakuziwona zinghomele ze wanhu wangu, kotya nha wikubule-kubule du wudodo. Hanyuma wawa kutya, ‘Aa! Zose swanu du.’ Na kumbe, hasina swanu hamba monga.

¹⁵ Wule, wukwihwesa wene wakuwona cevu, ku soko ye makani gago ge mawifyo, gono wetumile? Waco! Wayago hamba si waziceleleye yaye, holeka hamba ne cevu, wene si wacimanyile yaye. Holeka ku soko yiyo, nawo wologwa, nhe wayawo wanji vyono wagwa, kolo neza kuza nghuwalipiciza. Na wuwo wo wolowa wo mudumo wawo. Vyo nghutya ane no Muwaha Mulungu.”

Isilayeli yakuyilema i nzila yo Mulungu

¹⁶ U Muwaha Mulungu yakuwalonjela wanhu wakwe yakutya nhavi, “Nye nyo wanhu wangu, ale mwime mu zinzila zimbaha, mulanje. Mukawuze zinghani zo wukolo we katali, muyiwone nzila yo mugoloka. Nanye muyikole nzila yiyo, holeka nanye mokwikala mupolile.” Ninga wene wakatya, “Ase calema, hamba si cokola mu nzila yiyo ng'o.”

¹⁷ Hanyuma u Muwaha Mulungu yakawika walindilizi, ho wahulicize i lizi lye ndulele lyono likuwasugula. Ninga hamba nhavivyo, wene wakatya, “Ase si cikusaka hamba no kuhuliciza ng'o.”

¹⁸ Na ku soko yiyo, nayo Muwaha Mulungu yakutya, “Ale, muhulicize ta anye nyo makungugo, muwone cono cowaziza i wanhu wangu.

¹⁹ Nagwe go 'si, wuhulicize! Wuwone vyono neza kugalipiciza i mahweso gawo, no kuwongomeza i wanhu wawa, hambi nha wagalema i mejizo gangu, hamba kuzibocela yaye zinghani zangu.

²⁰ Alu nane nowa nina cambuzici, hono niwubocele wuvumba wono wakundetela ku wulawa Sheba, hamba no wudi wa mhunjile swanu wono wukulawa ku zi'si zo kutali? Nane hamba si novibocelela lukulu i vilavywa vyawo, hamba si nokwendezwa yaye ne makumbiko gawo.

²¹ Nane nowanoza wanhu wawa, wekobaze, wagwe. I wasogo zo munhu, ne wana wawo we cilume, ne weyendi wayawo, hamonga ne wekalani wayawo, wose wolo kongomezwa.”

U wulugu wukulawilila ku lubavu lwa kusumuka

²² U Muwaha Mulungu yakutya nhavi, “Ale, i wanhu wakuza wakulawa ku yisi yo lubavu lwa kusumuka, we likungugo lyono lili vilungo, wakwiwikaniza so wulugu.

²³ Wakondya kwibata no wupinde wawo mu miwoko, hamonga ne mimaje yawo. Kanyhi wene, wo wanhu wakali muno, kanyhi wasina hamba lusungu yaye. Nawo wakukoloma wenha i mawingo ge lilenga lono wapandile mu zifwalasi zawo. Nawo wakondizye kwiwikaniza waze wayihome Sayuni.”

²⁴ Nawo i wanhu wa Isilayeli wakutya nhavi, “Heya, nase cakondya kuzihulika zizo, ne miwoko yetu yawula vilungo, nase luno cakondya kwibatwa no wugaye, hamonga no wusungu, ceza cinha u mucekulu mono yali mu nghunga yo lusawo.

²⁵ Sunga nase nhondo, ceza kogopa muno muno ku wubita mu mawimbi, hamba kujenda-jenda du mu zinzila, hambi i walugu wetu nha wewikanize, kanyhi wacipilime mbavu zose ho wacihome.”

²⁶ Nayo u Muwaha Mulungu yakuwatya nhavi, i wanhu wakwe, “Ale, le, muvwale magunila mwivutuse mu mavu. Mulile ko wusungu wuwaha, mulavye ne mahozi nha vyono munojeye, nho mwana we cilume, we ciwene. Ku soko yuyo mono kokuza no wuhile wo kumongomezenyi, nha kosumwa musunho du.

²⁷ Alu 'gwe Yelemiya, ale, wuwajele wanhu wangu, nha vyono kucijelaga cuma, nagwe wuwamanye nha vyono wenha.

²⁸ Hambi wose nha wasina cihuliko hamba nhavi, webavyi, kanyhi wakamu na ku wuhulice, wenha shaba, hamba cuma. Kanyhi wose wahizi, wendile kubita ako na ako wena ze maheho go kuheha wayawo.

²⁹ Mivuwo yikufugutiza moto muwaha muno, ninga vyuma vye lisasi du vyo vyenjedukaga no kulawila mu moto. Holeka hasina cambuzi co kuweza i wanhu wangu, hambi i wabi nha wakali nawuswa yaye muli wene.

³⁰ Holeka i wanhu wowa kucemwa, ‘Makwe ga fweza.’ Hambi ane no Muwaha Mulungu nha nakondya kuwalema wene.”