Yelemiya 52 - Luganuzi Luswanu Kuli Wanhu Wose 2002

U wugwe wa Yelusalemi

¹ Zedekiya yali yaficile myaka makumi mejete na wumonga, lono yatemela mu yisi ya Yuda. Nayo yakatema na mu Yelusalemi myaka yikumi na wumonga. No nyina yacemwaga Hamutali, yali mwana we cicekulu wa Yelemiya, mono yekalaga mwi'kaya lya Libuna.

² Ninga u mutemi Zedekiya, yetuma wubi hali Muwaha Mulungu, nha vyono u mutemi Yehoyakimu yetuma.

³ Nayo u Muwaha Mulungu, yakawakolelwa muno likuwo i wanhu wa Yelusalemi na Yuda, hobaho yakawa kuwawusa walece kuwa ha mwande ye meso gakwe. Zedekiya yakalemela lukulu kumuhulika Nebukadineza u mutemi wa Babiloni.

⁴ Ku soko yiyo, Nebukadineza nayo yakawa kuza hamonga ne wasilikale wakwe, wakawa kuyihoma Yelusalemi mwi'zuwa lye likumi, lya mu mwezi we likumi, wa mu mwaka we likumi, wo wuteme wa Zedekiya. Nawo wali weza kuza, wakasita nghambi yawo kunze ye likaya, hanyuma wakawa kuzenga majinji, gakalipilima likaya mbavu zose.

⁵ Nawo wakawa kulikaliza likaya, walipilime du, sunga mu mwaka we likumi na monga wo wuteme wa Zedekiya.

⁶ Na mwi'zuwa lye licenda, lya mu mwezi we kane, wa mu mwaka wuwo, lono wanhu wa mwi'kaya wali webatwa ne nzala mbaha, hambi nha wali weza wasina ndigwa hamba ndodo,

⁷ ale baho, lijinji likabenwa, ne wanhu wose wo wulugu wakatiza, wakawuka mwi'kaya ne cilo. Hamba wawe Wababiloni wali walipilime likaya, ninga wene wakatiza, wakakolela mu nzila yo mulango wono wali haciligati ye majinji mejete, behi ne busitani yo mutemi, wakatyatya nzila yono yibitile kwi'lolo lya Yoludani.

⁸ Ninga hamba nhavivyo, i wasilikale we Cibabiloni, wakamuwinga mutemi Zedekiya, sunga wakamwibatila mu mawimbi, behi ne yisi ya Yeliko. Ninga i wasilikale wakwe wose, wakatiza wakamuleka yali wene.

⁹ Hobaho Zedekiya yakawa kusolwa, yakawa kutegulwa kuli mutemi Nebukadineza, na mwi'daha lilyo, mwene Nebukadineza, yali yali mwi'kaya lya Libula mu yisi ya Hamati. Nayo Nebukadineza yakawa kulavya wuling'anizi muli Zedekiya.

¹⁰ Mutemi Nebukadineza, yakawawulaga wana wa Zedekiya, yakawawulajila ha meso go sogo yawo, kuko ku Libula. Yakawawulaga sunga ne wawaha wose wa Yuda.

¹¹ Hanyuma ya zizo, yakawa kumusola Zedekiya, yakawa kumukopozola meso gakwe, yakawa kumuwopa ne manyolo, yakawa kumutegula ku Babiloni. Yakamutajila mujela, nayo Zedekiya yekala mumo mu jela ku Babiloni sunga yakafwila mumo.

Wongomele we Nyumba yo Mulungu

¹² Na mwi'zuwa lye likumi, lya mu mwezi we 'hano wa mu mwaka we likumi ne 'cenda, wo mutemi Nebukadineza, u mutemi wa Babiloni, yakaza Nebuzaladani u muwaha we wasilikale i walindilizi wo mutemi wa Babiloni, yakenjila ku Yelusalemi.

¹³ Yakayipembela moto Nyumba yo Mulungu, hamonga ne kaya ye likulu, hamonga ne zikaya zose ze wawaha wa mu Yelusalemi.

¹⁴ Nawo i wasilikale wakwe, wakagakumula majinji ge likaya.

¹⁵ Nayo Nebuzaladani, yakawakonghola i wanhu wose wono wali wakali wasigaye mwi'kaya, hamonga ne wazenji wanghula, hamonga na wono wamanyhila ko mutemi wa Babiloni. Wose wawa, yakawategula ku Babiloni.

¹⁶ Ninga hamba nhavivyo, yawasigaza mumo mu Yuda, i wanhu waciwa muno, wono wali wasina sawo yo yose. Yakawenjiza mu milimo yo kuyikamisa migunda ye mizabibu no kuyilimila.

¹⁷ Wababiloni, wakagasola masumbili ge shaba, gono gali gali mu Nyumba yo Mulungu, ne mikokoteni yono yali yili mumo mu Nyumba yo Mulungu, hamonga ne litanji lye shaba lye malenga, wakavibenanga vikawa vidodo vidodo, wakawa kuvitegula vyose ku Babiloni.

¹⁸ Wakasola ne zikoleyo, ne viya vyono wetumamilaga so kuwusiza mavu mu cikumbicilo, hamonga ne viya vyose vyono wetumamilaga so kukoleleza zitala, ne zibakuli zono wambilaga sakami ye zimitugo ze makumbiko, ne zibakuli zono wetumamilaga kufusiza wuvumba, hamonga ne viya vyose vye shaba, vyono wetumamilaga mu wuhembi, mu Nyumba yo Mulungu.

¹⁹ Wakavisola vinhu vyose du, vye zahabu hamba fweza, hamonga sunga ne vibakuli vidodo-dodo vyose, hamonga ne visahani vyono wetumamilaga so kupalila makala go moto. Hamonga ne zibakuli zono wambilaga sakami ye zi mitugo ze makumbiko, ne viya vyo kuwusiza mavu, ne viwicilo vye zitala, ne visahani vyo kufusiza wuvumba, hamonga ne zibakuli zono wetumamilaga so vilavywa vye divayi.

²⁰ Hamonga ne vinhu vyose vye shaba, vyono mutemi Solomona yavinoza, so Nyumba yo Mulungu, nha cinji, i masumbili mejete ge shaba, ne mikokoteni, ne litanji liwaha, hamonga ne zing'ombe yikumi na nyejete ze shaba, zono zali njelekwe litanji lilyo mucanyha yazo. Ne viya vivyo vyose vye shaba, vyali vinji muno muno, vyono si vyasumika kumanyika no wuzito wayo.

²¹ Ne masumbili gago mejete, limonga lyali lina wutali wa mita munana, no wukangazi wayo wali wa mita yihano na lobo.

²² Masumbili gago gali gena mitwe ya shaba. Ne masumbili gago gose, limonga lyali lina mutwe wa shaba, kucanyha yalyo, no wutali wo mutwe monga wali mita nyejete na sentimita makumi mejete, hamonga no wutande wo lwavu lwe makomamanga mucanyha yo mutwe wayo mbavu zose, na vyose vyali vya shaba.

²³ Na mu wutande wo lwavu wa mu masumbili gose, mwali muwiciligwe makomamanga yigana limonga limonga. Ne makomamanga makumi cenda na mutandatu ga muli gaga, ago gejelaga calinze ku wulawa hasi.

I wanhu wa Yuda wakusolwa, no kutegulwa ku Babiloni

²⁴ Hamonga na zizo, yuyo Nebuzaladani, u muwaha we wasilikale walindilizi, yakawasola nha wafungwa, Selaya u mukohani muwaha, na Zefaniya u mukohani mutazi, hamonga na wanji wadatu, i wetumami wawaha wa mu Nyumba yo Mulungu.

²⁵ Kanyhi na mu wulawa mumo mwi'kaya, yakamusola muwaha yumonga mono yali muwaha we wasilikale, hamonga na wanji wahano, wono wali wo watazi wo mutemi, wono wali wakali wasigaye mwi'kaya, hamonga no muwaha mutazi yunji we kejete we wasilikale, mono yali yo mukamisa zinghani zose zo wulugu, hamonga na wanhu wanji makumi mutandatu we lilumbo.

²⁶ Yuyo Nebuzaladani, yakawasola, yakawategula kuli Nebukadineza mutemi wa Babiloni, mono mwi'pango lilyo, yali yali ku Libula,

²⁷ mu yisi ya Hamati. Nayo mutemi Nebukadineza, yakawabocela, yakawatowanga, yakawawulaga wose. Hanyuma i wanhu wa Yuda, wakasolwa, wakahamywa mu yisi yawo,

²⁸ liwalo lye wanhu wono Nebukadineza yawasola wafungwa lyo lino. Mu mwaka wo mupunghati, wa mu wuteme wakwe, yasola wanhu elufu yidatu na makumi mejete na wadatu.

²⁹ Mu mwaka we likumi na munana, wa mu wuteme wakwe, yasola wanhu magana munana na makumi madatu na wejete, mu wulawa mu Yelusalemi.

³⁰ Mu mwaka we makumi mejete ne 'datu, wa mu wuteme wakwe, yasola wanhu magana mupunghati na makumi mane na wahano. Ne wanhu wawo, wasolwa na Nebuzaladani no kutegulwa ku Babiloni. Ne liwalo lyawo, wali waficile wanhu elufu yine na magana mutandatu, wose hamonga.

³¹ Na mu mwaka wono Evilimelodaki yatemela mu Babiloni, yakamuwonela lusungu Yehoyakimu u mutemi wa Yuda, hodu yakawa kumuwopolela, yakawuka mu jela. Na zizi zejela mwi'zuwa lye makumi mejete ne hano, lya mu mwezi we likumi na nyejete, wa mu mwaka we makumi madatu na mupunghati, ku wulawa mu wuhamywe wakwe.

³² Mwene Evilimelodaki yakamutendela viswanu muno Yehoyakimu u mutemi wa Yuda yakamupela lilumbo yiwaha muno si nhe watemi wayagwe wose wono vyali vili hamonga nayo, kuko ku wuhamywe ku Babiloni.

³³ Hobaho, Yehoyakimu nhondo, yakawa kukombolwa yabite yakawanize myenda ya mu jela, yavwale myenda yakwe, kanyhi yakawa kuhanga kulya ndigwa, hamonga no mutemi mu vilo vyose vyo wikale wakwe.

³⁴ Na mu vilo vyose vyo wikale wakwe, vyono vyali vikali visigaye, yapegwaga wutazi no mutemi wono wamutazaga mu visakwa vyakwe vye nhondo zose, sunga lizuwa lyono yafwila.