Yelemiya 5 - Luganuzi Luswanu Kuli Wanhu Wose 2002

U wubi wa Yelusalemi

¹ Nye nyo wanhu wa Yelusalemi, ale ta mumanyhe ako na ako mu zinzila zenyu! Mulanje-lanje ako na ako! Mwiwonelele nyo weneco! Mulondole mu sokoni zose! Wule, mosuma kumuwona mbeka u munhu mono yakwituma ze ling'ani mono yakuhidimbala kuwa mwihuwilwa hali Mulungu? Na hono mbeka mumuwone u munhu mono yenha nhavivyo, nayo Muwaha Mulungu koyinenela Yelusalemi.

² Hamba yiwe mukwiyitya mukumuhemba Muwaha Mulungu, ninga mukwilonjela caka du, hamba si mukulonga mbeka.

³ Mwene u Muwaha Mulungu kalangaga wihuwilwa, hambi nha yamutowenyi, nanye hamba kuhulika ng'o, yakamukunhulanjenyi, ninga anye mukalema ku wiyijize. Hambi nha mwali musina cihuliko, hamba si mwasaka kuwuleka wubi wenyu.

⁴ Hobaho nane nghawa kutya, “I wanhu awa mbeka waciwa kanyhi walele. Hambi nha wakwituma zo wulele du, siwamanyile yaye, zono u Mulungu wawo yakuzisaka hamba zono u Muwaha Mulungu yakusaka wene wetume.

⁵ Ane, nane nowabitila wanhu, nghalongane nawo kwe vilungo, hambi awo nha wazimanyile zono u Mulungu wawo yakuzisaka, na zono u Muwaha Mulungu, yakuwasaka wene wetume.” Ninga wose wakawulema u wutemi wo Muwaha Mulungu, wakalema sunga no kumuhulika kose.

⁶ Na yiyi yo soko yono yoleka simba zilawe mu mbago zize ziwawulaje, nago maminzi gololawa mu nyika gaze gawahawanje no kuwalubutula mhonje mhonje. Nago masuwi golokwiwendya-wendya mu zikaya zawo. Nawo wanhu hono waze walawile kudeha, gaze gawahawanje nhugu nhugu, hambi u wubi wawo nha winji muno. Nawo wakacila kumuleka Mulungu yizuwa ne'zuwa.

⁷ Nayo u Muwaha Mulungu yakatya, “Alu mwene, ho nosuma wule kuwanenela wanhu wangu u wubi wawo lo? Hambi wene nha wakondya kundeka'ne nalu wakuyihemba i milungu yo wulambi. Ninga ane ho nawalisa wanhu wangu sunga wakeguta, ninga hamba nhavivyo, wene wakeyinjiza mu wusenyha, wakawa kwikala mu zinyumba hamonga ne wasenyha.

⁸ Wali wenha kotya fwalasi zinume zono zigute so masulumizi, mu madaha ga hakali mitondo. Na muli wene wose, munhu yakawa kumulilila mugolece wo muyagwe so masulumizi.

⁹ Alu nane hongo, ho ndece kuwalipiciza ku soko ye zinghani zizo? Hamba ma! I nhumbula yangu yilece kwilipiciza simbili mu nghungugo yono yinha yiyi?

¹⁰ “Alu nane nowatuma walugu, waze wayidumulanje mizabibu ye wanhu wangu, ninga si woyongomezeza lukulu yaye. Nowalonjela vyono wayidumulilaje manhambi du. Hambi i manhambi gago, nha si sawo yangu yaye.

¹¹ Hambi anye nyo wanhu wa Isilayeli na Yuda, nha mwakondya kungalucila lukulu. Vyo nghutya ane no Muwaha Mulungu.”

Nayo u Muwaha Mulungu yakuwalema wanhu wa Isilayeli

¹² I wanhu wo Muwaha Mulungu wakondya kumulema Mulungu wawo, akuno wakutya, “Hambi nha si kosuma kwituma cinji. Nase hamba si cosuma kutuga magaziko yaye, hamba si cosuma kuwa no wihomi, hamba kutuga nzala yaye.”

¹³ Kanyhi wakulonga wakutya nha vyono, i wawizi wasina nghani yo yose, langa wenha mbeho du, wasina nghani yo yose yono yikulawa kuli Muwaha Mulungu.

¹⁴ U Muwaha Mulungu yakanonjela yakatya, “Gwe Yelemiya, alu vyono i wanhu wawa wakulonga nha vivyo, alu nane noyinoza inghani yangu yiwe nha moto mu mulomo wako. Nawo wanhu wawa, wawe nha ngwagu, nawo moto, wowatakamiza wose.

¹⁵ Nye nyo wanhu wa Isilayeli, u Muwaha Mulungu koleta likungugo ku wulawa kutali, lize limuhomenyi. Ne likungugo lilyo lyowa lili vilungo muno, kanyhi lya katali. Likungugo lyono ne milonjele yalyo, anye si muyimanyile yaye.

¹⁶ Ne wasilikale walyo i waguma no wupinde, nha vitung'ati muno, wono wawulagaga wasina lusungu.

¹⁷ Nawo wololya vya mu nhwanga yenyu, hamonga ne zindigwa zenyu. Wolowawulaga i wana wenyu we cilume hamonga na we cicekulu. Wololya matewa ge zing'ombe zenyu, ne zingholo zenyu. Woloyihodanga ne mizabibu yenyu, hamonga ne mibici yenyu ye mikuyu. Ne makaya genyu gono mwitumbiye, gono gena magomawakali, gose gago, golokongomezezwa lukulu ne wasilikale wo wulugu.

¹⁸ “U Muwaha Mulungu yakutya, ‘Ninga hamba nhavivyo mu vilo vivyo, si nolowongomezeza lukulu wanhu wangu.’

¹⁹ Ninga nawo kolo wakukuwuza wakutya. ‘Alu socici u Muwaha Mulungu kacinozeza zizi zose.’ Nagwe Yelemiya, wuwalonjele nha vyono, niwatendela zizo vyono wene wandeka, wakeyitumamila i milungu mijenzi mu yisi yawo weneco. Holeka luno nawo, wolowetumamila wajenzi mu yisi yono si yawo weneco.”

U Mulungu yakuwasugula wanhu wakwe

²⁰ U Muwaha Mulungu yakutya, Ale, wuwalonjelaje wo lulelo lwa Yakobo, hamonga ne wanhu wa Yuda, wutye,

²¹ “Ale muhulicize anye nyo wanhu walele, mono musina nhumbula yo wizuce, nyo wanhu mono mwina meso, ninga si mukuwona, mwina makutu, ninga si mukuhulika yaye.

²² Hambi ane nha yo nene Muwaha Mulungu, alu so cici si mukunyogopa yaye? Hamba socici si mukucicima hali'ne ng'o? Ane nha nawuwika musawawa wuwe wo mupaka we lilenga, wuwe wo mupaka we vilo vyose, wono lilenga si lyosuma kuwuponghola yaye. Heya hamba mawingo galyo gatunhume muno muno, ninga si gosuma kuponghola yaye. Ne mawingo, heya gokoloma muno muno, ninga hamba nhavivyo si gosuma kulapucila ku nhumbi yo mupaka yaye.

²³ Ninga anye nyo wanhu, mbeka muli zeze, kanyhi muliwabezi, hambi nha mwakondya kundeka 'ne, no kupatucila kunji.

²⁴ Musina ne lihweso hamba hadodo, lyo kumhela cogopo, ane mono nghumuletelenyi mvula ye mhinga na ye mahwela mu vipango vyayo. No kumupelenyi vilo vye nhwanga mu myaka yose.

²⁵ Ninga 'lu, u wubi wenyu, wakondya kumwimilenyi zizi zose iziswanu, zono zali zinojeye muzituje.

²⁶ Ne wanhu wabi nawo wekalane du ne wanhu wangu, wekalaga wawatejeze, nhe wanhu wono watandazaga zinyavu zawo ho wawagwize nhe zindeje, ninga kumbe watandaze zinyavu zawo ho wagwize wanhu.

²⁷ Kanyhi, wehwanile u mupelembi, mono kamemyaga zindeje mwi'tundu lyakwe, ale nhavivyo nawo vyo wamevizye mu zikaya zawo, i vinhu vyono wavitecile. Na yiyo yo soko yono yikuleka weza wali vilungo, kanyhi wagoli.

²⁸ Nalu lanjeta, vyono wajinile, wakung'alala nhavivi ku soko wasina wiyimile mu wituma zimbi. Kanyhi hamba si wakusuma no kuwanozeza ling'ani i wana wono wasina walezi wawo, hamba kulajila ling'ani yaye, kuli wono wakwiwonelwa.

²⁹ “Ninga nane, ane no Muwaha Mulungu, mbeka, nowalipiciza du ku soko ye zinghani zawo zizo. Na mbeka, nowalipiciza du likungugo lili.

³⁰ Nalu mezino ne mawifyo gejela mu'si.

³¹ Hambi i wawizi nha weza wasina nghani zo kulonga, langa wakuwila zo wulambi du. I wakohani nawo, wakulondola zawo du weneco. I wanhu wangu nawo, wasina hamba zo kulonga muli zizo wene wakuwona zose swanu du. Ninga lu magu ta, hamba wolotendaci nhondo, kolo zeza kuza baho ku ndumo yayo?”