Yelemiya 41 - Luganuzi Luswanu Kuli Wanhu Wose 2002

¹ Na mu mwezi wo mupunghati wa mu mwaka wuwo du, Isimayeli u mwana wa Netaniya, kanyhi yo mwizukulu wa Elishama, na wo lulelo lwe citemitemi, kanyhi yo muyagwe ne wetumami wawaha wo mutemi, yakawa kubita ku Mizipa yakamulanje Gedaliya, yena ne wayagwe wanhu yikumi. Nawo lono wali watenga zindigwa, wakulya hamonga na Gedaliya,

² hobaho Isimayeli hamonga ne wanhu wawalya yikumi, wakawa kuyikwega mimaje yawo mu zinjasulu, wakawa kumuwulaga Gedaliya.

³ Yuyo Isimayeli, yawawulaga i Waisilayeli wose wono wekalaga hamonga na Gedaliya kuko ku Mizipa, hamonga ne wasilikale wose we Cibabiloni wono wejela kuko.

⁴ Na mwi'zuwa lye kejete, lono nghani yiyi yo wuwulagwe wa Gedaliya yali yikali si namanyika yaye,

⁵ wakawa kuza wanhu makumi munana, wakulawa ku Shekemu, na ku Shilo, na ku Samaliya. Ne wanhu wawo, wali wacetile zindevu zawo, kanyhi wakayidemulanga myenda yawo, akuno wetemanjile mu miwili yawo. Wakawa wadinghuye ne vilavywa vyawo vyo wusaje hamonga no wuvumba, wakuleta ho wavilavye mu Nyumba yo Mulungu.

⁶ Nayo Isimayeli yakawa kutuluka ku wulawa ku Mizipa yabite yakawahinjilize, nayo yajendaga mu nzila akuno yakulila. Yali yeza kuwaficila, yakawatya, “Ale, muze mukamuwone Gedaliya.”

⁷ Nawo baho baho du wali weza kwinjila mwi'kaya, hodu Isimayeli hamonga ne wanhu wakwe wakawa kuwazumhila, no kuwawulaga wose, wakawa kuyigumila mwi'kombo miwili yawo.

⁸ Ninga hamba nhavivyo, muli wanhu wawa makumi munana, mwali mowali wanji wanhu yikumi, wono wamunena Isimayeli wakumutya, “Gwe wayiko, cikukunena wulece kuciwulaga se! Hambi nha cina viwutwa vyetu vyono civihundice kuko kwi wimbi, nha cinji, ngano, na shayili, ne mafuta, hamonga no wuci.” Hodu nayo Isimayeli yakawa kuwaleka.

⁹ Ne likombo lilyo lyono Isimayeli yayigumila miwili ye wanhu wono yawawulaga, lyali yikombo yigazi muno muno. Lyo yikombo lyono u mutemi Asa yalihimba, mu vipango vyono yahomwagwa na Baasha u mutemi wa Isilayeli. Mwene Isimayeli, yakalimemya likombo lilyo ne mivimba.

¹⁰ Ne wanhu wose wono wasigala kuko ku Mizipa, mwene Isimayeli yakawasola nha wafungwa, i wana we cicekulu wo mutemi, ne wanhu wose, wono Nebuzaladani u muwaha we wasilikale, yawawika mu wulanjilizi wa Gedaliya. Yakawa kutuluka nawo, yakawategula ku yisi ya Amoni.

¹¹ Nayo Yohanani, hamonga ne lipuga lyose lye wawaha we wasilikale, wono wali wali hamonga nayo, wakazihulika zo wubi wono yetumile Isimayeli.

¹² Nawo wakawa kutuluka, hamonga ne wanhu wawo, wakawa kumulonda, wakamwagana behi ne malenga mawaha ga Gibeyoni.

¹³ Nawo i wanhu wono Isimayeli yali yawawopile, wali weza kumuwona Yohanani, yena ne lipuga lye wawaha we wasilikale, wakasangalala muno muno.

¹⁴ Hobaho wakawa kupituka no kuwamanyhilila.

¹⁵ Ninga mwene Isimayeli hamonga ne wanhu wakwe we makumi munana, wakamutiza Yohanani, wakatijila ku yisi ya Amoni.

¹⁶ Nayo Yohanani hamonga ne wawaha we wasilikale, wakawa kuwasola wanhu wose wono wali wasolwa na Isimayeli nha wafungwa ku Mizipa, lono yamuwulajila Gedaliya ne wasilikale wakwe, hamonga ne wanhu we cicekulu wose, ne wana, hamonga ne walume wose i wapaswe.

¹⁷ Na vyono wawogopaga muno i Wababiloni, na vyono Isimayeli yali yakondya kumuwulaga Gedaliya, u munhu mono u mutemi wa Babiloni yali yamuwika yawe mulongola we 'si,

¹⁸ hodu, Yohanani hamonga ne wayagwe wose, wakatiziza ku Misili, ho wawe kutali ne Wababiloni. Na lono wabitaga ku Misili, wakamula kusimya nghambi yawo ha Cimuhamu, yono yali yili behi na Betelehemu.