Yelemiya 34 - Luganuzi Luswanu Kuli Wanhu Wose 2002

Wusugulwe wa Zedekiya

¹ U Muwaha Mulungu, yakanonjela kanyhi, mu mapango lono Nebukadineza u mutemi wa Babiloni, ne wasilikale wakwe wose, no wutemi wose wa mono'nze, lono wali wuli mu vilungo vyakwe, hamonga ne makungugo gose, wehomaga na Yelusalemi ne vikaya vyayo vyose vye behi behi.

² U Muwaha Mulungu, u Mulungu wa Isilayeli, yanonjela mbite kuli Zedekiya u mutemi wa Yuda, nghamulonjele nitye nhavi, “Ane no Muwaha Mulungu, nomupela mutemi wa Babiloni likaya lili, nayo kolikongoga no moto.

³ Nagwe hamba si kololekwa yaye, langa kolotekwa no kusolwa no mwene. Nagwe kolokwiwona nayo cagalanze no kulongana nayo. Hanyuma wuwe kutegulwa ku Babiloni.

⁴ Alu Zedekiya, wuhulicize muno kuli zono nghukulonjela. Agwe si kolowulajilwa ku wulugu yaye,

⁵ langa kolofwa wupolile du. Kanyhi wanhu wolokufusiza wuvumba ha wuzikwe wako, nha vyono wanhu wawafusizaga wuvumba lono wawazikaga i walezi wako, wono wakulongolela kutema. Nawo wolokulilila akuno wakutya, ‘Woyi nye! Mutemi wetu yafwiza!’ Vyo nghutya, ane no Muwaha Mulungu.”

⁶ Ale du, nane nghawa kumubitila mutemi Zedekiya, kuko ku Yelusalemi,

⁷ mu mapango lono wasilikale wo mutemi wa Babiloni walihomaga likaya. Ne wasilikale wazihomaga Lakishi na Azeka, i makaya gono gali gakali gasigaye mu yisi ya Yuda.

U wutendelwe vibi we wawanda

⁸ U mutemi Zedekiya, hamonga ne wanhu wa Yelusalemi, wali wakondya kunoza wilumbanize, nha vyono,

⁹ wowaleka wawe welecele, i wawanda wawo we Cihebelaniya, i walume ne wacekulu. Ho halece kuwa na munhu wo wose mono kowa yena muwanda we Ciisilayeli.

¹⁰ Ne wanhu wose hamonga ne walongola wawo, wakelumbaniza vyono wawalece wawe welecele i wawanda wawo we Ciisilayeli, walecele lukulu kuwanoza kanyhi kuwa wawanda. Na mbeka wose wakawalecela wawe welecele.

¹¹ Ninga hanyuma yayo, wakawupitula wuhile wawo wuwo wuswanu. Wakawasola wakawagomoleza kanyhi mu wuwanda kwa vilungo.

¹² Hanyuma u Muwaha Mulungu,

¹³ u Mulungu wa Isilayeli, yakanonjela vyono, mbite nghawalonjele wanhu nitye nhavi, “Ane no Muwaha Mulungu, nanoza cilagane ne walezi wenyu, lono nawawusiza mu yisi ya Misili, no kuwakomboza mu wuwanda. Nghawalonjela nha vyono,

¹⁴ mu ndumilizo yo mwaka wo mupunghati, yimunojeye munhu wo wose yamulece yawe welecele u muwanda wo wose we Cihebelaniya, mono yakondya kumwitumamila myaka mutandatu. Ninga i walezi wenyu si wazicelelela yaye, hamba kuzihulika zono nawalonjela ng'o.

¹⁵ Nanye mu vilo vicefu vyono vipulute, mwali mwakondya kupituka mu wuhile wenyu no kwituma zono zikunyendeza 'ne. Nanye wose mukelumbaniza nha vyono mowaleka wawe welecele, i wandugu zenyu Waisilayeli. Nanye mwacinozeza cilagane cici hali 'ne, mu Nyumba yangu yono nghuwa kuhembelwa.

¹⁶ Ninga mukawupitula kanyhi wuhile wenyu, si mukamhela cogopo 'ne. Ne wawanda wose wono mwali mwawaleka wawe welecele, wabite kono wali wendile, alu mwawagomoleza kwe vilungo kanyhi mu wuwanda.

¹⁷ Holeka nane, ane no Muwaha Mulungu, nghuwona nha vyono, anye mwawula cogopo kuli 'ne. Hambi nha si muwakomboye wawe welecele i wandugu zenyu Waisilayeli. Ale, heya, viswanu. Nane nomupelenyi nanye welecele, u welecele wo kufwila ku wulugu, na mu matamwa, na mu nzala. Nane nowanoza makungugo gose, wogofywe muno so zono nomutendelenyi 'nye.

¹⁸ Nawo i wetumami wa mu yisi ya Yuda na Yelusalemi, hamonga ne wetumami we likulu, ne wakohani, hamonga ne walongola, wose wanoza nane cilagane mu mapango gono wayidumulila ndama vipiligwa vyejete, wakakola hagati ye vipiligwa vivyo.

¹⁹ Ninga hamba nhavivyo, wacibena cilagane cangu hamba kucifisiliza yaye. Holeka nane nowatendela wanhu wawa nha vyono wene wayitendela yiyo ndama.

²⁰ Ane nowatajila mu miwoko ye walugu wawo, wono wakuwalondola wawawulaje. Ne mivimba yawo yololigwa ne zindeje, ne malimu ga mu mbago.

²¹ Sunga no mutemi Zedekiya wa Yuda, hamonga ne wetumami wakwe wose, nowatajila mu miwoko ye wanhu wono wakuwalondola wawawulaje. Nolowatajila mu miwoko ye wasilikale we Cibabiloni, wono wali wakondya kuleka kumuhomenyi.

²² Nowalajiliza nawo wokuza kanyhi mwi'kaya lili. Wololihoma, walisole, no kulikongoga. Nane noganoza makaya ga Yuda, gawe nhe nyika, hawe hanhu hono hamba wanhu wo wose si wosuma kwikala mumo. Vyo nghutya ane no Muwaha Mulungu.”